🔯চিৰাঙৰ বিজনীত ডকাইতি কাণ্ডৰ লগত জড়িত বিজেপি নেতা🔯

🔯চিৰাঙৰ বিজনীত ডকাইতি কাণ্ডৰ লগত জড়িত বিজেপি নেতা🔯

🔯আৰক্ষীৰ অভিযানত গ্ৰেপ্তাৰ দুই ডকাইত, পলাতক পাঁচ🔯

📝বঙাইগাঁও, ৩১ মে' : চিৰাঙৰ বিজনীত ডকাইতি কাণ্ডৰ সৈতে জড়িত বিজেপি নেতাসহ আন এজন ডকাইত গ্ৰেপ্তাৰ হোৱা ঘটনাই  চাঞ্চল্যৰ সৃষ্টি কৰিছে ৷ উল্লেখ্য যে বিজনীৰ নিকটৱৰ্তী ২৭ নং ৰাষ্ট্ৰীয় ঘাইপথৰ ডাঙাইগাঁৱত সোমবাৰে নিশা এটা সাত জনীয়া ডকাইতৰ দলে এখন ট্ৰাকৰ পৰা বৈধ বিলাতী সুৰা লুট কৰাৰ প্ৰচেষ্টা চলাওঁতে আৰক্ষীয়ে গ্ৰেপ্তাৰ কৰে দুটা ডকাইতক। ধৃত ডকাইত দুটা ক্ৰমে বিজনীৰ বাটাবাৰী নিবাসী মামদ ফুলচান আলী (৩২) আৰু মোনাকোচা নিবাসী ৰিয়াজ আহমেদ (২৬)। গুৱাহাটীৰ পৰা বঙাইগাঁও অভিমুখে বৈধ বিলাতী সুৰা কঢ়িয়াই আহি থকা ডব্লিউ বি ৫১ চি ৪৯৫৬ নম্বৰৰ ট্ৰাকখনক ডকাইতৰ দলটোৱে বৰপেটাৰ পৰা অনুসৰণ কৰা বুলি জানিব পাৰি ট্ৰাকখনৰ চালকে ভয়তে ডাঙাইগাঁওস্থিত ভাই ভাই ধাৱাত ৰখাই দিয়ে। পাছত ডকাইতৰ দলটোৱে ট্ৰাকখনৰ কাগজ-পাতি, সামগ্ৰীৰ চালান কাঢ়িলৈ পেলাই দিয়ে আৰু বিলাতী সুৰাসমূহ লুট কৰাৰ চেষ্টা চলায়।

পিচত কোনো লোকে বিজনী থানাৰ আৰক্ষীক খবৰ দিয়াত ঘটনাস্থলিত আৰক্ষী উপস্থিত হৈ ডকাইতৰ দলটোৱে ব্যৱহাৰ কৰা এ এছ ০১ ই এইছ ৯৮৯৬ নম্বৰৰ এখন এল্ট' গাড়ী, নম্বৰ প্লেটবিহীন এখন টিভিএছ আপাছি বাইকসহ দুজন ডকাইতক গ্ৰেপ্তাৰ কৰে যদিও আন পাঁচজন পলাই সাৰিবলৈ সক্ষম হয়।আৰক্ষীয়ে পলাতক ডকাইত কেইজনক বিচাৰি অভিযান অব্যাহত ৰাখিছে। জানিব পৰা মতে ধৃত ডকাইত ৰিয়াজ আহমেদ বিজেপিৰ থুৰিবাৰী মণ্ডল সমিতিৰ সংখ্যালঘু মৰ্চাৰ সম্পাদক। বিজেপিৰ নেতা হৈ ডকাইতি কাণ্ডৰ লগত জড়িত বিষয়টোৱে বিজনীত তুমুল চৰ্চাৰ কেন্দ্ৰবিন্দু হৈ পৰা পৰিলক্ষিত হৈছে।🔯