🔯প্ৰকৃতি প্ৰেমী সংগঠন বায়'মৰ ( BIOME) উদ্যোগত সিদলসতীৰ আনন্দৰাম বৰুৱা মডেল স্কুলত বিশ্ব পৰিৱেশ দিৱস উদযাপন🔯

🔯প্ৰকৃতি প্ৰেমী সংগঠন বায়'মৰ ( BIOME) উদ্যোগত সিদলসতীৰ আনন্দৰাম বৰুৱা মডেল স্কুলত বিশ্ব পৰিৱেশ দিৱস উদযাপন🔯

📝বঙাইগাঁওঃ ৫ জুন: প্ৰকৃতি প্ৰেমী সংগঠন বায়'মৰ ( BIOME) উদ্যোগত আৰু বঙাইগাঁওস্থিত আই ভেলী বন উপত্যকা সংমণ্ডলৰ সহযোগত দেওবাৰে বঙাইগাঁও জিলাৰ সিদলসতীস্থিত "আনন্দৰাম বৰুৱা মডেল স্কুলত "বিশ্ব পৰিৱেশ দিৱস" উদযাপন কৰা হয় । বিশ্ব পৰিৱেশ দিৱসৰ লগত সংগতি ৰাখি সংগঠনটোৱে ছাত্ৰ-ছাত্ৰীসকলৰ মাজত ছবি অকাঁ প্ৰতিযোগিতাৰে কাৰ্যসূচীৰ শুভাৰম্ভণি কৰে । ছবি অকাঁ প্ৰতিযোগিতাত মুঠ ৬০ জন ছাত্ৰ-ছাত্ৰীয়ে অংশগ্ৰহণ কৰে । ইয়াৰ পিছতে বিদ্যালয় চৌহদত গছপুলি ৰোপণ কাৰ্যসূচী সম্পন্ন কৰা হয় । আনন্দৰাম বৰুৱা মডেল স্কুলৰ প্ৰধান শিক্ষক প্ৰমোদ কুমাৰ ৰায়ে গছপুলি ৰোপণ কৰে ৷ অনুষ্ঠানত সংগঠনটোৰ সচিব সতীশ ৰায়, বায়'মৰ সভানেত্ৰী ড° ৰাণু ৰায়, বন বিভাগৰ জয়ন্ত দাস আৰু বিদ্যালয়ৰ কিছু সংখ্যক ছাত্ৰ-ছাত্ৰীয়ে গছপুলি ৰোপণ কৰে ।  ইয়াৰ পিছত এখন সাধাৰণ সভা অনুষ্ঠিত হয় ।

সভাত ছাত্ৰ-ছাত্ৰীৰ লগতে বিদ্যালয়ৰ  শিক্ষক- শিক্ষয়িত্ৰী আৰু অভিভাৱকো উপস্থিত থাকে । সভাৰ আৰম্ভণিতে বিশিষ্ট অতিথি সকলক সম্বৰ্ধনা জনোৱা হয় । বায়'মৰ সক্ৰিয় সদস্য নীলকমল চৌধুৰীয়ে উদ্দেশ্য ব্যাখ্যা কৰা সভাত 'বায়'ম'(BIOME) সংগঠন সম্পৰ্কত আলোকপাত কৰে উপ-সভাপতি ড° মানবেন্দ্ৰ ৰায় চৌধুৰীয়ে । বায়'মৰ সভানেত্ৰী ড° ৰাণু ৰায়ে "বিশ্ব পৰিৱেশ দিৱস"ৰ তাৎপৰ্য আৰু পৰিৱেশ সংৰক্ষণৰ বাবে কৰণীয়ৰ ওপৰত গভীৰভাৱে আলোকপাত কৰি এক বহুমূলীয়া বক্তৃতা আগবঢ়ায় । ধুবুৰী সমবায় বিভাগৰ কণিষ্ঠ পৰিদৰ্শক ৰাজেশ ৰায়ে পৰিৱেশ সংৰক্ষণৰ ওপৰত এক সজাগতামূলক ভাষণ প্ৰদান কৰে। স্থানীয় তথা সক্ৰিয় পৰিৱেশকৰ্মী সঞ্জীৱ ৰায়ে কাকৈজানা বনাঞ্চলৰ জৈৱ বৈচিত্ৰ্য আৰু ইয়াৰ সংৰক্ষণৰ ওপৰত উৎসাহপূৰ্ণ বক্তব্য দাঙি ধৰে। ইয়াৰ পিছতে ছাত্ৰ-ছাত্ৰীসকলৰ মাজত এক মুকলি কুইজ প্ৰতিযোগিতা অনুষ্ঠিত হয় । ছাত্ৰ-ছাত্ৰীয়ে সক্ৰিয়ভাৱে অংশগ্ৰহণ কৰা এই প্ৰতিযোগীতা পৰিচালনা কৰে শিক্ষয়ত্ৰী ৰশ্মিতা দাসে ।একেটা অনুষ্ঠানত ছাত্ৰ-ছাত্ৰীসকলৰ মাজত পুৰস্কাৰ বিতৰণ কৰা হয় । সভাত উপস্থিত থকা সকলোৱে পৰিৱেশ সংৰক্ষণৰ বাবে শপত লয় । অনুষ্ঠানৰ শেষত  শলাগৰ শৰাই আগবঢ়ায় ড° মানবেন্দ্ৰ ৰায় চৌধুৰীয়ে । প্ৰত্যেক গৰাকী ছাত্ৰ-ছাত্ৰীকে এজোপাকৈ গছপুলি বিতৰণ কৰা হয়🔯