🔯বঙাইগাঁৱত অসম বিজ্ঞান সমিতিৰ "বিশ্ব পৰিৱেশ দিৱস' উদযাপন🔯

🔯বঙাইগাঁৱত অসম বিজ্ঞান সমিতিৰ "বিশ্ব পৰিৱেশ দিৱস' উদযাপন🔯

📝বঙাইগাঁওঃ ৫ জুনঃ অসম বিজ্ঞান সমিতিৰ বঙাইগাঁও শাখাৰ উদ্যোগত বঙাইগাঁৱৰ বীৰঝৰা উচ্চতৰ মাধ্যমিক বিদ্যালয়ত দেওবাৰে দিনজোৰা কাৰ্যসূচীৰে 'বিশ্ব পৰিৱেশ দিৱস' উদযাপন কৰা হয়। এই বছৰৰ 'বিশ্ব পৰিৱেশ দিৱস'ৰ মূল বিষয় হৈছে - 'একমাত্ৰ একেখনেই পৃথিবী'। উল্লেখ্য যে অসম বিজ্ঞান সমিতিৰ 'ক্ষুদ্ৰ অৰণ্য সৃষ্টি আঁচনি'ৰ অধীনত শীঘ্ৰেই চলন্তাপাৰা উচ্চতৰ মাধ্যমিক বিদ্যালয়ত ক্ষুদ্ৰ অৰণ্যৰ বাবে ব্যৱস্থা গ্ৰহণ কৰিব সমিতিয়ে ৷ কাৰ্যসূচীৰ অংশ হিচাপে পুৱা ১০ বজাত ষষ্ঠ শ্ৰেণীৰ পৰা অষ্টম শ্ৰেণীৰ ছাত্ৰৰ মাজত পৰিৱেশ সংৰক্ষণ সম্পৰ্কে চিত্ৰাংকন প্ৰতিযোগিতা অনুষ্ঠিত কৰা হয়। এই চিত্ৰাংকন প্ৰতিযোগিতাত ৰাজু গোৱালাই প্ৰথম, প্ৰিয়াংকৰ দাসে দ্বিতীয়, জুন ৰাভাই তৃতীয় আৰু গৌৰভ নাথে চতুৰ্থ স্থান লাভ কৰে।

আনহাতে নৱম আৰু দশম শ্ৰেণীৰ ছাত্ৰসকলৰ বাবে পোষ্টাৰ লিখা প্ৰতিযোগিতা অনুষ্ঠিত কৰা হয়। এই পোষ্টাৰ লিখা প্ৰতিযোগিতাত প্ৰিতম দাসে প্ৰথম আৰু শেখৰ দেৱনাথে দ্বিতীয় স্থান লাভ কৰে। ইয়াৰ পিছত বিদ্যালয়ৰ চৌহদত ছাত্ৰসকলৰ দ্বাৰা গছপুলি ৰোপণ কৰা হয় আৰু বিদ্যালয়ৰ প্ৰেক্ষাগৃহত পৰিৱেশ সজাগতা আৰু পুৰস্কাৰ বিতৰণৰ বাবে এখন মুকলি সভা অনুষ্ঠিত হয়। সভাখন সঞ্চালনা কৰে অসম বিজ্ঞান সমিতিৰ বঙাইগাঁও শাখাৰ উপসভাপতি মানবেন্দ্ৰ দাসে। সভাত বীৰঝৰা মহাবিদ্যালয়ৰ অধ্যাপক ড০ মুনীন্দ্ৰ নাথ ঠাকুৰীয়া আৰু বীৰঝৰা উচ্চতৰ মাধ্যমিক বিদ্যালয়ৰ বিষয় শিক্ষক কন্দৰ্প কুমাৰ নাথে ভাষণ প্ৰদান কৰে। সভাত বিভিন্ন প্ৰতিযোগিতাৰ পুৰস্কাৰসমূহ বিতৰণ কৰা হয়।🔯