🔯বৰ্তমানেও বঙাইগাঁও জিলাৰ ১১৫ খন গাঁও বানৰ কবলত🔯

🔯বৰ্তমানেও বঙাইগাঁও জিলাৰ ১১৫ খন গাঁও বানৰ কবলত🔯

 🔯বানত আক্ৰান্ত ১,৩০,৮০৮ গৰাকী লোক🔯

📝বঙাইগাঁওঃ ২০জুনঃ  বঙাইগাঁও জিলাৰ বান পৰিস্থিতিৰ উন্নতি হোৱা নাই ৷ বৰং সোমবাৰে পুনৰ নতুন নতুন অঞ্চল বানৰ কবলত পৰিছে ৷দেওবাৰে জিলাখন ৮৮ খন গাঁও বানৰ কবলত আছিল যদিও সেই সংখ্যা ১১৫ খনলৈ বৃদ্ধি পাইছে ৷ জিলাখনৰ বইটামাৰী, মাণিকপুৰ আৰু সৃজনগ্ৰাম ৰাজহ চক্ৰৰ অন্তৰ্গত ১১৫ খন গাঁও বৰ্তমান বানৰ কবলত আছে। তাৰে ভিতৰত বইটামাৰীৰ ২২খন গাঁও, মাণিকপুৰৰ ২খন আৰু সৃজনগ্ৰাম ৰাজহ চক্ৰৰ ৯১খন গাঁও বানাক্ৰান্ত হৈ আছে। ফলত বানত আক্ৰান্ত হৈছে ১,৩০,৮০৮  (এক লাখ ত্ৰিশ হেজাৰ আঠ শ আঠ) গৰাকী লোক ৷ বঙাইগাঁও জিলা প্ৰশাসনে বানাক্ৰান্ত লোকসকলৰ বাবে আশ্ৰয় শিবিৰ স্থাপন, খোৱা পানীৰ ব্যৱস্থা,অনাময় ব্যৱস্থা, চিকিৎসা ব্যৱস্থা, খাদ্য আৰু অন্যান্য সাহায্য সামগ্ৰী আদি প্ৰদান কৰি আছে। সেইদৰে সোমবাৰে জিলাখনৰ ২,৪৪৫ হেক্টৰ কৃষিভূমি প্লাবিত হৈ আছে। জিলাখনৰ ৩০  টা আশ্ৰয় শিবিৰত বৰ্তমান ৮,৪৩০ গৰাকী লোকে আশ্ৰয় লৈ আছে ৷ তাৰে ভিতৰত ১০৩৩ টি শিশু আৰু ৮৯ গৰাকী গৰ্ভৱতী মহিলা আৰু মাতৃদুগ্ধ পান কৰি থকা শিশুৰ মাতৃও আছে। নয়াগাঁও এল পি স্কুল আৰু ২নং বাশবাৰী ৰিলিফ বিতৰণ কেন্দ্ৰৰ যোগেদি বন্যাৰ্তসকলক সাহায্য সামগ্ৰী বিতৰণ কৰা হৈছে৷ সোমবাৰে জিলা প্ৰশাসনৰ তৰফৰ পৰা চাউল ৬০৮.৭১ কুইন্টল, দাইল ১১৪.৭০  কুইন্টল, নিমখ ৩৪.৬২  কুইন্টল আৰু মিঠাতেল ২৯৬৬.২৬ লিটাৰ আৰু শিশুখাদ্য বিতৰণ কৰা হয় ৷ আনহাতে পশুখাদ্য হিচাপে দিয়া হৈছে ৮৯০.৪০ কুইন্টল গোমৰ ভুচি। ইয়াৰ উপৰিও ত্ৰিপাল, চেনিটাৰী নেপকিন আদিও প্ৰদান কৰা হৈছে।🔯