🔯বৃহত্তৰ বঙাইগাঁও প্ৰেছ ক্লাবত বিষ্ণু ৰাভা দিৱস উদযাপন🔯

🔯বৃহত্তৰ বঙাইগাঁও প্ৰেছ ক্লাবত বিষ্ণু ৰাভা দিৱস উদযাপন🔯

📝বঙাইগাঁওঃ ২০ জুনঃ সৈনিক শিল্পী কলাগুৰু বিষ্ণু প্ৰসাদ ৰাভাৰ স্মৃতি দিৱসটি সোমবাৰে  বঙাইগাঁও প্ৰেছ ক্লাবতো পালন কৰা হয় ৷ বন্তি প্ৰজ্বলন আৰু বিষ্ণু প্ৰসাদ ৰাভাৰ প্ৰতিচ্ছবিত মাল্যাৰ্পণৰ যোগেদি অনুষ্ঠানৰ আৰম্ভণি কৰে বৃহত্তৰ বঙাইগাঁও প্ৰেছ ক্লাবৰ সভাপতি ৰঞ্জিত কুমাৰ শৰ্মাই ৷ বৃহত্তৰ বঙাইগাঁও প্ৰেছ ক্লাবৰ সাধাৰণ সম্পাদক প্ৰণৱ কুমাৰ ডেকাই আঁত ধৰা অনুষ্ঠানত সভাপতি শৰ্মাই নিজৰ চমু বক্তব্যত অসমৰ সমাজ আৰু সাংস্কৃতিক জীৱনৰ পুৰোধা ব্যক্তি কলাগুৰু বিষ্ণু প্ৰসাদ ৰাভাৰ চিন্তা আৰু চেতনাৰে ভৱিষ্যৎ প্ৰজন্ম আগুৱাই যাব বুলি আশা ব্যক্ত কৰে ৷ অনুষ্ঠানত  শিশু শিল্পীৰ এটি দলে সমবেত সংগীত পৰিবেশন কৰাৰ লগতে শিশু শিল্পী অম্লান জ্যোতি ডেকা আৰু সাংবাদিক কুলেন্দ্ৰ শইকীয়াই  বিষ্ণু প্ৰসাদ ৰাভাৰ গীত পৰিবেশন কৰে ৷ 

🔯নৰ্থ বইটামাৰীত বিষ্ণুৰাভা দিৱস উদযাপন 

📝বঙাইগাঁও জিলাৰ নৰ্থ বইটামাৰী মহিলা কল্যাণ সমিতিৰ উদ্যোগত সোমবাৰে দিনজোৰা কাৰ্যসূচীৰে স্থানীয় প্ৰীতিনিবাস সমূহীয়া কেন্দ্ৰত বিষ্ণু ৰাভা দিৱস উদযাপন কৰা হয়৷ তদুপলক্ষে নৰ্থ বইটামাৰী মহিলা কল্যাণ সমিতিৰ সম্পাদিকা অমৰাৱতী নাথে পুৱা বন্তি প্ৰজ্বলনেৰে অনুষ্ঠানৰ শুভাৰম্ভ কৰে৷কলাগুৰুৰ প্ৰতিচ্ছৱিত মাল্যাৰ্পন কৰে ডাংতল আঞ্চলিক পঞ্চায়তৰ সদস্য বংকিম চন্দ্ৰ বৰ্মনে৷ বিষ্ণু ৰাভা দিৱসৰ লগত সংগতি ৰাখি গছপুলি ৰোপন কৰে বঙাইগাঁও টাউন হাইস্কুলৰ অৱসৰপ্ৰাপ্ত প্ৰধান শিক্ষক পৰেশ চন্দ্ৰ নাথে । ইয়াৰ পিছতে অনুষ্ঠিত হয় প্ৰতিযোগিতামূলক খেল-ধেমালি আৰু সাহিত্য চ’ৰা ৷ দূপৰীয়া বিষ্ণু ৰাভা সংগীত, জ্যোতি সংগীত, ভূপেন্দ্ৰ সংগীত প্ৰতিযোগিতা অনুষ্ঠিত হয় । বিয়লিৰ ভাগত অনুষ্ঠিত হয় মুকলি সভা । বঙাইগাঁও টাউন হাইস্কুলৰ অৱসৰপ্ৰাপ্ত প্ৰধান শিক্ষক পৰেশ চন্দ্ৰ নাথৰ সভাপতিত্বত অনুষ্ঠিত সভাত মূলাগাঁৱৰ লালবাহাদুৰ শাস্ত্ৰী বিদ্যাপীঠৰ অৱসৰপ্ৰাপ্ত প্ৰধান শিক্ষক যোগেশ চন্দ্ৰ নাথে বিশিষ্ট অতিথি হিচাপে উপস্থিত থাকি বিষ্ণুপ্ৰসাদ ৰাভাৰ জীৱনচৰিত তথা কৰ্মৰাজিৰ বিষয়ত আলোকপাত কৰে । সভাত বিশিষ্ট সমাজকৰ্মী বৰোদা কলিতাই বিষ্ণুপ্ৰসাদ ৰাভাই শোষিত নিপীড়িত শ্ৰেণীৰ হকে কৰা বিপ্লৱ তথা জীৱন সংগামৰ বিষয়ে বক্তব্য প্ৰদান কৰে । ধলাগাঁও এম ই স্কুলৰ শিক্ষক জয়ধৰ নাথ, সমাজকৰ্মী পৰমানন্দ ৰায়, নৰ্থ বইটামাৰী গাঁও পঞ্চায়তৰ সভানেত্ৰী হিমানী নাথ,অৱসৰপ্ৰাপ্ত শিক্ষয়িত্ৰী চন্দ্ৰাৱতী নাথ, বিজয়লক্ষ্মী শৰ্মা, বীণা গোস্বামীৰ লগতে বহু বিশিষ্ট ব্যক্তি উপস্থিত থাকে৷একেখন সভাত সদ্যঘোষিত হাইস্কুল শিক্ষান্ত পৰীক্ষাত সুখ্যাতিৰে উত্তীৰ্ণ হোৱা অঞ্চলটোৰ কেবাগৰাকী কৃতী শিক্ষাৰ্থীক মহিলা কল্যাণ সমিতিয়ে সম্বৰ্ধনা জনায় ।

🔯বঙাইগাঁও জিলা শিল্পী সমাজৰ ৰাভা দিৱস উদযাপন 

📝বঙাইগাঁও জিলা শিল্পী সমাজৰ উদ্যোগত আৰু শংকৰদেৱ শিশু বিদ্যা নিকেতন,বঙাইগাঁৱৰ সহযোগত স্থানীয় শংকৰদেৱ শিশু বিদ্যা নিকেতন চৌহদত দিনজোৰা কাৰ্যসূচীৰে বিষ্ণু প্ৰসাদ ৰাভাৰ ৫৩ তম মৃত্যু দিৱস পালন কৰা হয়৷বঙাইগাঁও জিলা শিল্পী সমাজৰ সভাপতি নন্দলাল বৰ্মনে বন্তি প্ৰজ্বলন কৰি অনুষ্ঠানৰ শুভাৰম্ভ কৰে৷ শংকৰদেৱ শিশু বিদ্যা নিকেতন আচাৰ্য মনোৰঞ্জন ৰয়ে বিষ্ণু প্ৰসাদ ৰাভাৰ প্ৰতিচ্ছবিত মাল্যাৰ্পণ কৰে ৷ বইটামাৰীস্থিত ইন্দিৰা গান্ধী কলেজৰ অসমীয়া বিভাগৰ প্ৰবক্তা সোণামনি বৰ্মনে অনুষ্ঠানত  কলাগুৰুৰ ওপৰত আলোকপাত কৰে ৷ উল্লেখ্য, অনুষ্ঠানৰ লগত সংগতি ৰাখি 'ক' আৰু 'খ' দুটা শাখাত কলাগুৰুৰ গীতৰ প্ৰতিযোগিতা অনুষ্ঠিত হয়৷ আনহাতে নিখিল ৰাভা ছাত্ৰ সন্থাৰ বঙাইগাঁও জিলা সমিতি তথা শংকৰঘোলা আঞ্চলিক সমিতিৰ যৌথ উদ্যোগত আৰু স্থানীয় ৰাইজৰ সহযোগত বঙাইগাঁও জিলাৰ ঐতিহাসিক  ভৈৰৱচূড়া পাহাৰৰ নামনিৰ ১২৫ নম্বৰ শংকৰঘোলা প্ৰাথমিক বিদ্যালয় প্ৰাংগণত বিভিন্ন কাৰ্যসূচীৰে কলাগুৰু বিষ্ণু প্ৰসাদ ৰাভাৰ স্মৃতি দিৱস পালন  কৰে ৷ সেইদৰে বঙাইগাঁৱৰ বীৰঝৰা পাব্লিক লাইব্ৰেৰীৰ উদ্যোগত আৰু বৰপাৰা নৱজেউতি ক্লাবৰ সহযোগত দুদিনীয়াকৈ কলাগুৰু বিষ্ণু প্ৰসাদ ৰাভা দিৱস পালন কৰা হয় ৷ বীৰঝৰা পাব্লিক লাইব্ৰেৰী প্ৰাংগণত অনুষ্ঠিত বিষ্ণু ৰাভা দিৱসৰ কাৰ্যসূচী অনুসৰি প্ৰতিচ্ছবিত শ্ৰদ্ধাঞ্জলি জ্ঞাপন কৰি কাৰ্যসূচীৰ শুভাৰম্ভ কৰা হয় ৷ ইয়াৰ পিচতে  চিত্ৰাংকণ প্ৰতিযোগিতা, বিষ্ণু ৰাভা সংগীত প্ৰতিযোগিতা আদি অনুষ্ঠিত হয় ৷ আনহাতে ২১ জুনত প্ৰদৰ্শিত হ'ব নাট্যকাৰ দ্বিজেন নাথৰ ৰচনা আৰু যোগীৰাজ চক্ৰৱৰ্তীৰ পৰিচালনাৰে শিশু নাট ' লুকা ভাকু ভাল নালাগে' আৰু নাট্যকাৰ মহেন্দ্ৰ বৰঠাকুৰৰ 'সিঁঁচা পানীৰ মাছ' ৷ নাটখনৰ পৰিচালনা সীমান্ত প্ৰতীম চৌধুৰীৰ ৷ ইপিনে অসম কৃষ্টি বিকাশ সংঘ আৰু বৃহত্তৰ বঙাইগাঁও জ্যেষ্ঠ নাগৰিক সন্মিলনীৰ উদ্যোগতো বিষ্ণু প্ৰসাদ ৰাভা দিৱস উদযাপন কৰা হয় ৷  দিৱস উপলক্ষে আন কাৰ্যসূচীৰ লগতে শিল্পী সম্বৰ্ধনা আৰু গ্ৰন্থ উন্মোচনী অনুষ্ঠান অনুষ্ঠিত হয় ৷ একেদৰে নতুন সাহিত্য পৰিষদৰ উদ্যোগত  বঙাইগাঁৱৰ ৰাস মন্দিৰ প্ৰাংগণত বিষ্ণু ৰাভা দিৱস পালন কৰা হয় ৷🔯