🔯বঙাইগাঁৱত জালিয়াতিৰে আনৰ নামত ভূমি হস্তান্তৰ🔯

🔯বঙাইগাঁৱত জালিয়াতিৰে আনৰ নামত ভূমি হস্তান্তৰ🔯 

🔯গ্ৰেপ্তাৰ  উপায়ুক্ত কাৰ্যালয়ৰ উপ- পঞ্জীয় আৰু নৈশ চকীদাৰৰ লগতে এজন মহৰী🔯

📝বঙাইগাঁওঃ ২৩ জুন: বঙাইগাঁও আৰক্ষীয়ে এক ভূমি জালিয়াতিৰ গোচৰত এজন মহৰীক গ্ৰেপ্তাৰ কৰাৰ বিপৰীতে দুজন চৰকাৰী কৰ্মচাৰীক সোধ- পোছৰ বাবে আটক কৰি পিচত গ্ৰেপ্তাৰ কৰে ৷ বিগত ২০২১ বৰ্ষতে বঙাইগাঁও সদৰ থানাত ৰুজু হোৱা ভূমি জালিয়াতিৰ এক গোচৰৰ ভিত্তিত আৰক্ষীয়ে মহৰীজনৰ লগতে  চৰকাৰী কৰ্মচাৰী দুজনক গ্ৰেপ্তাৰ কৰে ৷ বঙাইগাঁও আৰক্ষীয়ে গোচৰটোৰ ভিত্তিত মহৰী গিয়াছ উদ্দিন আহমেদক বুধবাৰে গ্ৰেপ্তাৰ কৰাৰ বিপৰীতে আজি বঙাইগাঁও জিলা উপায়ুক্ত কাৰ্যালয়ৰ উপ পঞ্জীয়ক কুলেন চন্দ্ৰ দাস আৰু নৈশ চকীদাৰ অনন্ত ৰায়ক সোধ- পোছৰ বাবে আটক কৰে যদিও পিচত গ্ৰেপ্তাৰ কৰে ৷ এই সন্দৰ্ভত বঙাইগাঁও জিলাৰ অতিৰিক্ত আৰক্ষী অধীক্ষক লুণা সোনোৱালে সংবাদ মাধ্যমক জানিবলৈ দিয়া মতে বিগত ২০২১ চনত জালিয়াতিৰে আনৰ নামত ভূমি হস্তান্তৰ সম্পৰ্কীয় এক গোচৰ ৰুজু হৈছিল ৷ বঙাইগাঁও সদৰ থানাত ৰুজু হোৱা ৭৪২/২১ (ভাৰতীয় দণ্ডবিধি আইনৰ 120 (b) / 420/ 468/471 ধাৰাৰ অধীনত ) নম্বৰৰ গোচৰটোৰ আধাৰত আৰক্ষীয়ে তদন্ত অব্যাহত ৰাখিছিল৷ এই গোচৰটোৰ সংক্ৰান্তত ইতিপূৰ্বে চাৰি গৰাকী কৈ ব্যক্তিক আৰক্ষীয়ে গ্ৰেপ্তাৰ  কৰিছিল যদিও পিচত জামিন লাভ কৰিছিল ৷ কিন্তু এই ভূমি জালিয়াতিৰ গোচৰৰ ভিত্তিত আৰক্ষীয়ে তদন্তৰ বাবে মাটিৰ নথি - পত্ৰ আদি ফ'ৰনেচিক পৰীক্ষাৰ বাবে প্ৰেৰণ কৰিছিল ৷ বিশেষকৈ হাতৰ আখৰ, চহী আদি পৰীক্ষাৰ বাবে প্ৰেৰণ কৰিছিল ৷ ফ'ৰেনচিক পৰীক্ষাৰ যি প্ৰতিবেদন আহিছে সেই অনুসৰি মাটিৰ প্ৰকৃৃত গৰাকীৰ চহী অমিল পায় ৷ অৰ্থাৎ মাটিৰ নথিত থকা চহী প্ৰকৃত মাটিৰ গৰাকীৰ নহয় ৷ এই বিষয়টো পোহৰলৈ অহাৰ পিচতে আৰক্ষীয়ে তদন্ত আৰম্ভ কৰে আৰু তদন্তৰ বাবে এই তিনিজন ব্যক্তিক সোধ - পোছ কৰাটো জৰুৰী বুলি বিৱেচনা কৰি আটক কৰে বুলি কয় ৷ লগতে আটক কৰা ব্যক্তি সকলক জেৰা কৰাৰ সময়ত যদি তেওঁলোকৰ বিৰুদ্ধে  উপযুক্ত প্ৰমাণ লাভ কৰে তেতিয়াহলে তেওঁলোকক গ্ৰেপ্তাৰ কৰিব বুলিও অতিৰিক্ত আৰক্ষী অধীক্ষক লুণা সোনোৱালে সংবাদ মাধ্যমৰ আগত প্ৰকাশ কৰে ৷ ইপিনে বুধবাৰে আৰক্ষীয়ে গ্ৰেপ্তাৰ কৰা মহৰী গিয়াছ উদ্দিন আহমেদক বৃহস্পতিবাৰে আদালতত হাজৰি কৰোৱাত আদালতে এদিনৰ বাবে আৰক্ষী জিম্মালৈ প্ৰেৰণ কৰে ৷ উত্থাপিত অভিযোগ মতে মহৰী গিয়াছ উদ্দিন আহমেদ কেইবাবছৰ পূৰ্বে ছীড ফাণ্ড কেলেংকাৰীৰ গোচৰত গ্ৰেপ্তাৰ হৈ ৰঙাঘৰৰ আলহী হৈছিল ৷ পিচত জেলৰ পৰা ওলাই আহি মহৰীৰ কামত আত্মনিয়োগ কৰাৰ সমান্তৰালভাৱে মাটিৰ দালালি কাৰ্যতো লিপ্ত হৈ পৰে ৷ ইপিনে এই ভূমি জালিয়াতিৰ গোচৰত এজন অধিবক্তাৰ নামো সাঙোৰ খাই থকা বুলি জানিব পৰা গৈছে ৷ উল্লেখ্য যে আজমিনা খাতুন নামৰ এগৰাকী মহিলাই এই গোচৰ ৰুজু কৰিছিল ৷ আনহাতে সোধ - পোছৰ বাবে আটক কৰা উপ পঞ্জীয়ক কুলেন চন্দ্ৰ দাস আৰু নৈশ চকীদাৰ অনন্ত ৰায়ক পিচত নিশা গ্ৰেপ্তাৰ কৰে ৷🔯