🔯ৰাজহুৱা বিতৰণ ব্যৱস্থাৰ চাউলৰ চোৰাং বেহাত জড়িতসকলক কোনোপধ্যে ৰেহাই দিয়া নহ'ব- মন্ত্ৰী ৰণজিৎ কুমাৰ দাস🔯

🔯ৰাজহুৱা বিতৰণ ব্যৱস্থাৰ চাউলৰ চোৰাং বেহাত জড়িতসকলক কোনোপধ্যে ৰেহাই দিয়া নহ'ব- মন্ত্ৰী ৰণজিৎ কুমাৰ দাস🔯

📝বঙাইগাঁওঃ ২১ জুনঃ ৰাজহুৱা বিতৰণ ব্যৱস্থাৰ চাউলকলৈ চলি থকা চোৰাং বেহাৰ সৈতে জড়িতসকলক কোনোপধ্যে ৰেহাই দিয়া নহ'ব ৷ যিসকল এনে কাৰ্যত জড়িত আছে সেইসকলে অতিশীঘ্ৰে জেলৰ ভাত খাব লাগিব ৷ এই মন্তব্য কৰিছে  খাদ্য আৰু অসামৰিক যোগান বিভাগৰ মন্ত্ৰী ৰণজিৎ কুমাৰ দাসে ৷ মঙলবাৰে বঙাইগাঁৱত সংবাদ মাধ্যমৰ আগত এই মন্তব্য কৰে মন্ত্ৰী দাসে ৷ উল্লেখ্য যে সোমবাৰে বঙাইগাঁও সদৰ থানাৰ অন্তৰ্গত চিটকাগাঁও হীৰাপাৰাত আৰক্ষী আৰু যোগান বিভাগে অভিযান চলাই এটা গৃহৰ পৰা অবৈধভাবে মজুত কৰি ৰখা ৰাজহুৱা বিতৰণ ব্যৱস্থাৰ ৭০০ বস্তাতকৈও অধিক চাউল উদ্ধাৰ কৰি জব্দ কৰিছিল ৷ কৃষ্ণ বাহাদুৰ প্ৰধানৰ গৃহৰ পৰা উদ্ধাৰ কৰা হৈছিল এই বৃহৎ পৰিমাণৰ চাউলখিনি ৷ কৃষ্ণ বাহাদুৰ প্ৰধানৰ পুত্ৰ বিনোদ প্ৰধানে এনেদৰে চাউলৰ বস্তাসমূহ মজুত কৰি ৰাখিছিল ৷ কিন্তু আৰক্ষী আৰু যোগান বিভাগে চলোৱা অভিযানৰ সময়ত বিনোদ প্ৰধান পলাতক অস্থাত আছিল ৷ এই বৃহৎ পৰিমাণৰ চাউল জব্দ হোৱাৰ পিছতে জিলাখনত যে ৰাজহুৱা বিতৰণ ব্যৱস্থাৰ চাউলকলৈ চোৰাং বেহা চলি আছে সেয়া উন্মোচিত হৈ পৰে ৷ ইয়াৰ মাজতে মঙলবাৰে যোগান মন্ত্ৰী তথা বঙাইগাঁও জিলাৰ অভিভাৱক মন্ত্ৰী ৰণজিৎ কুমাৰ দাসে জিলাখনৰ বান পৰিস্থিতি পৰিদৰ্শন কৰিবলৈ অহাত এই বিষয়ে সাংবাদিকে প্ৰশ্ন কৰাত তেওঁ কয় যে এই বিষয়টো ইতিমধ্যে জিলা উপায়ুক্তক তৎকালীনভাৱে তদন্ত কৰিবলৈ দিছো ৷ কিছুমানে এই চোৰাং চাউলসমূহ যোগান বিভাগে উদ্ধাৰ কৰা বুলি কৈছে ৷ গতিকে যোগান বিভাগে যদি উদ্ধাৰ কৰিছে তেতিয়াহলে যোগান বিভাগৰ মানুহে কেনেকৈ এই চক্ৰটোক সহযোগ কৰিব ? গতিকে যোগান বিভাগ ইয়াত জড়িত নাই ৷ কিন্তু যি এনে কাৰ্যত জড়িত আছে সেইসকলে অতিশীঘ্ৰে জেলৰ ভাত খাব লাগিব ৷ তেওঁ আৰু কয় যে আমি ইতিমধ্যে এজাহাৰ দাখিল কৰিবলৈ দিছো ৷ আনহাতে এই কাৰ্যৰ লগত জড়িত বিনোদ প্ৰধান নামৰ ব্যক্তিজন  পলাতক হৈ আছে বুলি সাংবাদিকে কোৱাত মন্ত্ৰীগৰাকীয়ে কয় যে পলাতক হৈ আছে যদিও এদিন হলেওতো আহিব লাগিবই ৷ ৰাইজৰ মুখৰ ভাত কাঢ়ি খোৱা এনেকুৱা লোকক আমি কোনো পধ্যে ক্ষমা নকৰো ৷ যি সময়ত  বানাক্ৰান্তক সহায় কৰিব লাগে সেই সময়ত যদি তেওঁলোকৰ মুখৰ চাউল কোনোবাই কাঢ়ি লৈ যায় , তেতিয়াহলে এইটো এটা গুৰুতৰ অপৰাধ বুলি ভাবো ৷ সেয়ে নিশ্চিতভাৱে জামিনবিহীন গোচৰ এটা ৰুজু হ'ব আৰু কৰায়ত্ত হোৱাৰ পিচত জেলত থাকিব লাগিব বুলিও কয় মন্ত্ৰীগৰাকীয়ে ৷🔯