🔯বঙাইগাঁৱত জালিয়াতিৰে আনৰ নামত ভূমি হস্তান্তৰ🔯

🔯বঙাইগাঁৱত জালিয়াতিৰে আনৰ নামত ভূমি হস্তান্তৰ🔯

🔯গ্ৰেপ্তাৰ কৰা উপ- পঞ্জীয়ক, নৈশ চকীদাৰ আৰু মহৰীক জেললৈ প্ৰেৰণ🔯

📝বঙাইগাঁওঃ ২৪ জুন: বঙাইগাঁও আৰক্ষীয়ে এক ভূমি জালিয়াতিৰ গোচৰত গ্ৰেপ্তাৰ কৰা মহৰী গিয়াছ উদ্দিন আহমেদৰ লগতে বৃহস্পতিবাৰে সোধপোছৰ বাবে প্ৰথমে আটক কৰি পিচত গ্ৰেপ্তাৰ কৰা বঙাইগাঁও জিলা উপায়ুক্ত কাৰ্যালয়ৰ উপ পঞ্জীয়ক কুলেন চন্দ্ৰ দাস আৰু নৈশ চকীদাৰ অনন্ত ৰায়ক শুকুৰবাৰে আদালতত হাজিৰ কৰোৱাত আদালতে জেললৈ প্ৰেৰণ কৰে ৷ উল্লেখ্য যে ২০২১ বৰ্ষতে বঙাইগাঁও সদৰ থানাত ৰুজু হোৱা ভূমি জালিয়াতিৰ এক গোচৰৰ ভিত্তিত আৰক্ষীয়ে মহৰীজনৰ লগতে চৰকাৰী কৰ্মচাৰী দুজনক গ্ৰেপ্তাৰ কৰিছিল ৷ জানিব পৰা মতে বিগত ২০২১ চনত জালিয়াতিৰে আনৰ নামত ভূমি হস্তান্তৰ সম্পৰ্কীয় এক গোচৰ ৰুজু হৈছিল ৷ 

বঙাইগাঁও সদৰ থানাত ৰুজু হোৱা ৭৪২/২১ (ভাৰতীয় দণ্ডবিধি আইনৰ 120 (b) / 420/ 468/471 ধাৰাৰ অধীনত ) নম্বৰৰ গোচৰটোৰ আধাৰত আৰক্ষীয়ে তদন্ত অব্যাহত ৰাখিছিল৷ এই গোচৰটোৰ সংক্ৰান্তত ইতিপূৰ্বে চাৰি গৰাকী কৈ ব্যক্তিক আৰক্ষীয়ে গ্ৰেপ্তাৰ  কৰিছিল যদিও পিচত জামিন লাভ কৰিছিল ৷ কিন্তু এই ভূমি জালিয়াতিৰ গোচৰৰ ভিত্তিত আৰক্ষীয়ে তদন্তৰ বাবে মাটিৰ নথি - পত্ৰ আদি ফ'ৰনেচিক পৰীক্ষাৰ বাবে প্ৰেৰণ কৰিছিল ৷ বিশেষকৈ হাতৰ আখৰ, চহী আদি পৰীক্ষাৰ বাবে প্ৰেৰণ কৰিছিল ৷ পিচত ফ'ৰেনচিক পৰীক্ষাৰ প্ৰতিবেদনত মাটিৰ নথিত প্ৰকৃৃত গৰাকীৰ চহী অমিল পায় ৷ অৰ্থাৎ মাটিৰ নথিত থকা চহী প্ৰকৃত মাটিৰ গৰাকীৰ নহয় ৷ এই বিষয়টো পোহৰলৈ অহাৰ পিচতে আৰক্ষীয়ে তদন্ত আৰম্ভ কৰে আৰু তদন্তৰ বাবে এই তিনিজন ব্যক্তিক সোধ - পোছ কৰাটো জৰুৰী বুলি বিৱেচনা কৰি আটক কৰে আৰু পিচত গ্ৰেপ্তাৰ কৰে ৷ উল্লেখ্য যে আজমিনা খাতুন নামৰ এগৰাকী মহিলাই এই গোচৰ ৰুজু কৰিছিল ৷🔯