🔯বঙাইগাঁও জিলাত ১৪৪ ধাৰা জাৰি🔯

🔯বঙাইগাঁও জিলাত ১৪৪ ধাৰা জাৰি🔯 

📝বঙাইগাঁওঃ ১২জুন: ৰাঁচী, কোচবিহাৰ,জম্মু আৰু কাশ্মীৰ, কলকাতা, কানপুৰ, প্ৰয়াগৰাজ আদি ঠাইত ঘটা পৰিস্থিতি আৰু কিছুসংখ্যক সংগঠনৰ প্ৰতিবাদী সমদল আদিলৈ চাই বঙাইগাঁও জিলাতো তেনেকুৱা ঘটনা সংঘটিত হোৱাৰ আশংকা কৰি তথা জিলাখনত শান্তি-শৃংখলা বিঘ্নিত হোৱাৰ আশংকা কৰি জিলাখনৰ অতিৰিক্ত জিলা দণ্ডাধীশ পংকজ চমুৱাৰ এক নিৰ্দেশনামৰ্মে সমগ্ৰ বঙাইগাঁও জিলাতে কাৰ্যকৰী হোৱাকৈ ভাৰতীয় ফৌজদাৰী আইনৰ ১৪৪ ধাৰাৰ অধীনত কেতবোৰ নিষেধাজ্ঞা জাৰি কৰা হৈছে। সেইমৰ্মে বঙাইগাঁও জিলা প্ৰশাসনৰ অনুমতি অবিহনে কোনো মুকলি ঠাইত বা প্ৰেক্ষাগৃহ, হল আদিত কোনো সভা, সমাৱেশ আদি অনুষ্ঠিত কৰিব নোৱাৰিব। অনুভাষ যন্ত্ৰ ব্যৱহাৰ কৰি আনৰ ধৰ্মীয় অনুভূতিক আঘাত কৰা কোনো ধৰণৰ বক্তব্য দিব নোৱাৰিব। প্ৰশাসনৰ অনুমতি অবিহনে কোনো ৰাজহুৱা স্থানত একে সময়তে ৫ জন বা ততোধিক লোক সমবেত হ'ব নোৱাৰিব।ৰাজহুৱা স্থানত লাঠি, আগ্নেয়াস্ত্ৰ বা জীৱনৰ প্ৰতি ভাবুকিৰ সৃষ্টি কৰিব পৰা কোনো সামগ্ৰী লৈ ফুৰিব নোৱাৰিব। আন সম্প্ৰদায়ৰ ধৰ্মীয় স্থানত শোভাযাত্ৰা কৰি যোৱা বা প্ৰৰোচনামূলক শ্লোগান দিয়া বা মন্তব্য দিয়া নিষিদ্ধ কৰা হৈছে।কোনো ধৰণৰ চান্দা সংগ্ৰহ কৰাটোও নিষিদ্ধ কৰা হৈছে। ওপৰোক্ত ৰাজহুৱা স্থানত ৫ জন বা ততোধিক লোক সমবেত হ'ব নোৱাৰা নিৰ্দেশনাটো বজাৰ, খেলপথাৰ, ৰেলষ্টেশ্যন, বাছ ষ্টেণ্ড বা দৈনন্দিন জীৱনৰ কাম-কাজ, ব্যৱসায় বা বিবাহ অনুষ্ঠান আদিৰ ক্ষেত্ৰত প্ৰযোজ্য নহ'ব। ১৪৪ ধাৰাৰ অধীনত ঘোষণা কৰা নিষেধাজ্ঞাসমূহ তৎকালীনভাৱে বলবৎ হ'ব আৰু পৰৱৰ্তী নিৰ্দেশ নিদিয়া পৰ্যন্ত বাহাল থাকিব।নিষেধাজ্ঞাসমূহ উলংঘা কৰিলে ভাৰতীয় দণ্ডবিধিৰ ১৮৮ ধাৰা আৰু আন প্ৰাসংগিক আইনৰ অধীনত শাস্তি বিহা হ'ব। নিষেধাজ্ঞাসমূহৰ ক্ষেত্ৰত কাৰোবাৰ কিবা আপত্তি থাকিলে,কিবা সলনি কৰিব লগা বা বাতিল কৰিব লগা থাকিলে সংশ্লিষ্ট কৰ্তৃপক্ষৰ সৈতে যোগাযোগ কৰিব পাৰে।🔯