🔯কোচ ৰাজবংশী সাহিত্য সভাৰ দ্বাৰা গৌৰীপুৰত ব্যৱহৃত ভাষাক ৰাজবংশী ভাষাৰ মান্যৰূপ দিয়াৰ সিদ্ধান্ত🔯

🔯কোচ ৰাজবংশী সাহিত্য সভাৰ দ্বাৰা গৌৰীপুৰত ব্যৱহৃত ভাষাক ৰাজবংশী ভাষাৰ মান্যৰূপ দিয়াৰ সিদ্ধান্ত🔯

🔯কোচ ৰাজবংশী ভাষা সম্পৰ্কীয় আহ্বায়ক সমিতিৰ তীব্ৰ বিৰোধিতাঃঅগণতান্ত্ৰিক আৰু স্বেচ্ছাচাৰী আখ্যা🔯

🔯২৭ আৰু ২৮ আগষ্টত বঙাইগাঁৱত এখন ভাষা ভিত্তিক আলোচনা চক্ৰৰ আয়োজন🔯

📝বঙাইগাঁওঃ ১৭ জুলাইঃ কোচ ৰাজবংশী সাহিত্য সভাই গৌৰীপুৰত ব্যৱহৃত ৰাজবংশী ভাষাটোক ৰাজবংশী ভাষাৰ মান্যৰূপ দিয়াৰ যি সিদ্ধান্ত গ্ৰহণ কৰিছে তাৰ তীব্ৰ বিৰোধিতা কৰিছে কোচ ৰাজবংশী ভাষা সম্পৰ্কীয় আহ্বায়ক সমিতিয়ে ৷ দেওবাৰে গ্ৰেটাৰ বঙাইগাঁও প্ৰেছ ক্লাবত আয়োজিত এখন সংবাদ মেলত সমিতিৰ আহ্বায়কসকলে লগতে কোচ ৰাজবংশী সাহিত্য সভাক এই সিদ্ধান্ত অতি সোনকালে প্ৰত্যাহাৰ কৰিবলৈকো আহ্বান জনায় ৷ উল্লেখ্য যে সংবাদ মেলত সমিতিৰ আহ্বায়ক হৰমোহন মেধিয়ে কয় যে শেহতীয়াভাৱে কোচ ৰাজবংশী সাহিত্য সভাই গৌৰীপুৰত ব্যৱহৃত ৰাজবংশী ভাষাটোক মান্যৰূপ দিয়াৰ  সিদ্ধান্ত গ্ৰহণ কৰিছে যদিও তাত অসমৰ প্রায় ৯৫ শতাংশ কোচ ৰাজবংশী লোকেই বিৰোধিতা কৰিছে। গতিকে কোচ ৰাজবংশী সাহিত্য সভাৰ এই সিদ্ধান্তই আৰু গৌৰীপুৰৰ ৰাজবংশী ভাষাটোয়ে যিহেতু কোচ ৰাজবংশী সকলৰ মাজত জাতীয় ঐক্য গঢ়ি তুলিব নোৱাৰে সেয়ে আমি কোচ ৰাজবংশী ভাষা সম্পৰ্কীয় আহ্বায়ক সমিতিয়ে গৌৰীপুৰৰ ভাষাটোক ৰাজবংশী ভাষাৰ মান্যৰূপ দিয়াৰ তীব্ৰ বিৰোধিতা কৰিছো আৰু এই সিদ্ধান্ত অতি সোনকালে প্রত্যাহাৰ কৰাৰ বাবে আহ্বান জনাইছোঁ ৷ তাৰোপৰি কোচ ৰাজবংশী সাহিত্য সভাই কোচ ৰাজবংশীৰ অন্যান্য জাতীয় দল সংগঠনৰ লগত আলোচনা নকৰাকৈ সম্পূৰ্ণ একপক্ষীয়ভাৱে এই সিদ্ধান্ত কোচ ৰাজবংশী ৰাইজৰ ওপৰত বলপূৰ্বক ভাৱে জাপি দিবলৈ প্ৰয়াস কৰা বুলি মন্তব্য কৰি সাহিত্য সভাৰ এই সিদ্ধান্তক অগণতান্ত্ৰিক আৰু স্বেচ্ছাচাৰী আখ্যা দিছে ৷ আহ্বায়কগৰাকীয়ে আৰু কয় যে কোচ ৰাজবংশী সাহিত্য সভাই গৌৰীপুৰ অঞ্চলৰ নিৰ্দিষ্ট সংখ্যক বা তেনেই কম সংখ্যক মানুহে কোৱা ভাষাটোক ৰাজবংশী ভাষাৰ মান্যৰূপ দিব বিচাৰিলে তাক কোচ ৰাজবংশীৰ সকলোৱে মানি ল’ব বুলি ভবাটো ভুল। কাৰণ একপক্ষীয়, স্বেচ্ছাচাৰী এনে সিদ্ধান্ত গণতন্ত্ৰৰ বিৰোধী। আজিৰ দিনত সকলো শিক্ষিত মানুহেই গণতন্ত্রত বিশ্বাসী। গতিকে গণতন্ত্রত বিশ্বাসী শিক্ষিত মানুহে স্বেচ্ছাচাৰী সিদ্ধান্ত মানি নলয় ৷ 

আমাৰ স্পষ্ট কথা, আমি কোচ ৰাজবংশী সমাজৰ কোনো এটা অঞ্চলৰ ভাষা-সংস্কৃতিৰ বিৰোধী নহয় ৷ আমি প্ৰতিটো অঞ্চলৰে ভাষা-সংস্কৃতিৰ উন্নয়ণ বিচাৰোঁ। আজি গৌৰীপুৰ অঞ্চলেই হওক বা গোসাইগাঁও অঞ্চলেই হওক, চাপৰ-শালকোচা-বিলাসীপাৰা অঞ্চলেই হওক বা চিদলী-বিজনী অঞ্চলেই হওক, গোৱালাপাৰা অঞ্চলেই হওক বা বাক্সা-ওদাগুৰী- দৰং অঞ্চলেই হওক, প্ৰতিটো অঞ্চলৰেই ভাষা-সংস্কৃতিৰ আমি উন্নয়ণ বিচাৰো। কিন্তু কোনো এটা অঞ্চলৰ ভাষা-সংস্কৃতিৰ আস্তিত্বৰ প্ৰতি ভাবুকি সৃষ্টি কৰি অকল নিজৰ অঞ্চলৰ ভাষা-সংস্কৃতিৰ উন্নয়নৰ কাম কৰাৰ যি অগণতান্ত্রিক পৰম্পৰা তাক আমি বিৰোধিতা কৰো। গতিকে কোচ ৰাজবংশী সাহিত্য সভাক নিজৰ সিদ্ধান্তটো প্রত্যাহাৰ কৰি, এটা সঠিক পথেৰে সকলো পক্ষৰে সৈতে আলাপ-আলোচনাৰ মাজেৰে, এটা সৰ্বসন্মত সিদ্ধান্তৰে 'ৰাজবংশী’ ভাষাৰ মান্যৰূপ নিৰ্ধাৰণ কৰাৰ পদক্ষেপ হাতত ল’বলৈ আৰু নিজৰ দাম্ভিকতা, অহংকাৰ, স্বেচ্ছাচাৰীতা পৰিত্যাগ কৰি ভাষা-সংস্কৃতিৰ চৰ্চা আৰু উন্নয়ণৰ এটা সুস্থিৰ পৰিবেশ গঢ়ি তোলাৰ বাবে আহ্বান জনায় ৷ অন্যথা আনাগত দিনত কোচ ৰাজবংশী সাহিত্য সভাই আৰু অধিক তীব্র প্রতিবাদৰ সন্মুখীন হ’ব লাগিব বুলিও কয় ৷ সংবাদ মেলত কোচ ৰাজবংশী ভাষাৰ মান্যৰূপ দিয়াৰ বিষয়টোৰ ওপৰত যোৱা ১৯ জুনত জনগোষ্ঠীটোৰ বুদ্ধিজীৱী, শিক্ষাবিদ, বিশিষ্ট ব্যক্তি আৰু কোচ ৰাজবংশী ছাত্ৰ সন্থা (আক্ৰাছু), কোচ ৰাজবংশী যুৱ ছাত্ৰ সন্মিলনী আদি সংগঠনৰ নেতৃবৃন্দৰ উপস্থিতিত অনুষ্ঠিত এখন গুৰুত্বপূৰ্ণ সভাত লোৱা সিদ্ধান্তমৰ্মে কোচ ৰাজবংশী ভাষা সম্পৰ্কীয় আহ্বায়ক সমিতিৰ উদ্যোগত ২৭ আৰু ২৮ আগষ্টত বঙাইগাঁও বীৰঝৰা উচ্চতৰ মাধ্যমিক বিদ্যালয়ৰ প্ৰেক্ষগৃহত এখন ভাষা ভিত্তিক আলোচনা চক্ৰৰ আয়োজন কৰা বুলিও জানিবলৈ দিয়ে৷ এই আলোচনা চক্ৰ সম্পৰ্কত সমিতিৰ আন এগৰাকী আহ্বায়ক  বিশ্বজিৎ ৰায়ে উল্লেখ কৰা মতে 'পশ্চিম অসমৰ কোচ ৰাজবংশী জনগোষ্ঠীৰ মান্যভাষা আৰু গ্ৰহণযোগ্যতা' শীৰ্ষক মূল বিষয়ক লৈ আয়োজন কৰা এই আলোচনা চক্ৰত কোচ ৰাজবংশী জনগোষ্ঠীৰ অঞ্চল ভিত্তিক ভাষা - এটা বিশ্লেষণাত্মক অধ্যয়ণ, কোচ ৰাজবংশী জনগোষ্ঠীৰ ভাষাৰ ধ্বনিতাত্বিক আৰু ৰূপতাত্বিক বিশ্লেষণ আৰু গ্ৰহণযোগ্যতা, কোচ ৰাজবংশী জনগোষ্ঠীৰ ভাষাৰ শব্দতাত্বিক অধ্যয়ণ আৰু গ্ৰহণযোগ্যতা, কোচ ৰাজবংশী সংস্কৃতিৰ লগত জড়িত কোচ ৰাজবংশী জনগোষ্ঠীৰ ভাষাৰ শব্দ ৰূপৰ এটা বিশ্লেষণাত্মক অধ্যয়ণ আৰু কোচ ৰাজবংশী লোক সংস্কৃতিত প্রতিফলিত ভাষিক ৰূপ-এটা বিশ্লেষণাত্মক অধ্যয়ণ (ধর্ম-সামাজিক, লোক-ঔষধ/চিকিৎসা,বিশ্বাস/পৰম্পৰা/ঐতিহ্য/খাদ্য সম্ভাৰ/পূজা পাতল) বিষয়ত আলোচনা অনুষ্ঠিত হ'ব ৷ এই আলোচনা চক্ৰত ছাত্ৰ - ছাত্ৰী, গৱেষক , মহাবিদ্যালয়, বিশ্ববিদ্যালয় তথা বিভিন্ন অঞ্চলৰ লেখক আদিয়ে অংশ গ্ৰহণ কৰিব পাৰিব ৷ আলোচনা চক্ৰত অংশ গ্ৰহণ কৰিব বিচৰাসকলক উপৰোক্ত বিষয়ৰ আলোচনা পত্ৰসমূহ ২০ আগষ্টৰ ভিতৰত আলোচনা চক্ৰ পৰিচালনা সমিতিৰ সম্পাদক হৰমোহন মেধি, (৮৪৭২৯৭৬৩২৪ ) আৰু সহকাৰী সম্পাদক উৎপল সিংহ (৯১০১৩৭২৪৯১) ৰ সৈতে যোগাযোগ কৰি জমা দিবলৈ আহ্বান জনায়৷ সংবাদ মেলত সমিতিৰ আহ্বায়ক উৎপল  সিংহ, দ্বীপ নাৰায়ণ ৰায়, পৱিত্ৰ কুমাৰ ৰায়, ভূপেন ৰায় আদিও উপস্থিত থাকে ৷🔯