🔯বঙাইগাঁও- চিৰাঙৰ বিভিন্ন ঠাইত ২০৯ সংখ্যক ভানু জয়ন্তী উদযাপন🔯

🔯বঙাইগাঁও- চিৰাঙৰ বিভিন্ন ঠাইত ২০৯ সংখ্যক ভানু জয়ন্তী উদযাপন🔯

📝বঙাইগাঁওঃ ১৩ জুলাইঃ নেপালী সাহিত্যৰ আদি কবি ভানুভক্ত আচাৰ্যৰ ২০৯ সংখ্যক জন্ম জয়ন্তী বুধবাৰে বঙাইগাঁও জিলাৰ বিভিন্ন স্থানত৷দিনজোৰা কাৰ্যসূচীৰে "ভানু জয়ন্তী" ৰূপে উদযাপন কৰা হয়। জিলা সমিতিৰ অন্তৰ্গত  জিলাখনৰ খাৰিজা দোলাইগাঁও দ্বিতীয় খণ্ডৰ (কিষান বজাৰ) ভোলানাথ সংঘত আয়োজন কৰা ভানু জয়ন্তী উদযাপন কাৰ্যসূচী অনুসৰি পুৱা ৯ বজাত অভ্যৰ্থনা সমিতিৰ সভাপতি ধন বাহাদুৰ ছেত্ৰীয়ে আদি কবিৰ প্ৰতিৰূপত বন্তি প্ৰজ্বলন কৰে। লগতে বঙাইগাঁও জিলা সমিতিৰ প্ৰাক্তন  সভাপতি গোপাল ভট্টৰায়ে পুষ্পমাল্য অৰ্পণ কৰে।তদুপৰি পুৱা  ৯-৩০ বজাত কুৰিৰো অধিক লোকে অংশগ্ৰহণেৰে অনুষ্ঠিত কৰা ভানুভক্তীয় ৰামায়ণ আবৃত্তি প্ৰতিযোগিতাখন উদ্বোধন কৰে সমাজকৰ্মী গোপাল বাহাদুৰ ছেত্ৰীয়ে। খাৰিজা দোলাইগাঁও কালী মন্দিৰ সমিতিৰ সভাপতি সমুদ্ৰ বসুমতাৰী আৰু অৱসৰপ্ৰাপ্ত শিক্ষক এগ্য প্ৰসাদ উপাধ্যায়ে দহ বজাত বৃক্ষ ৰোপণৰ আগ ধৰে ৷ইয়াৰ পিচতে ছাত্ৰ-ছাত্ৰীসকলৰ মাজত চিত্ৰাংকণ প্ৰতিযোগিতা, কুইজ, আকস্মিক বক্তৃতা, সংগিনী নৃত্য, কবিতা আবৃতি আদি প্ৰতিযোগিতা অনুষ্ঠিত কৰা হয়। দিনৰ ১ বজাত কিষান বজাৰ-ছিট্কাগাঁও শাখা সভাপতি লোক বাহাদুৰ ছেত্ৰীৰ সভাপতিত্বত অনুষ্ঠিত মুকলি সভাখন উদ্বোধন কৰে জিলা সমিতি সভাপতি পূৰ্ণ প্ৰসাদ কাফ্লেই । 

অসম নেপালী সাহিত্য সভাৰ উপ সভাপতি ভবানী প্ৰসাদ শৰ্মাই সভাত মুখ্য অতিথি হিচাপে উপস্থিত থাকি কয় যে, “ আদি কবি ভানুভক্ত আচাৰ্যই নেপালী সাহিত্য জগতৰ আদিকবি ৰূপে এইবাবেই স্বীকৃতি লাভ কৰে যে তেওঁ শুদ্ধ নেপালী ভাষাত বাল্মিকী ৰামায়ণ অনুবাদ কৰিছিল।” কিয়নো তেওঁৰ পূৰ্বেও প্ৰায় ৭৯ গৰাকী কবি আছিল যদিও তেওঁলোকৰ ভাষাত ভাৰতীয়মূলৰ বিভিন্ন  ভাষাৰ শব্দ সংমিশ্ৰণ পোৱা যায়। কেৱল ভানুভক্তইহে আধুনিক সৰল নেপালী ভাষাৰ ৰূপ দিছিল বাবেই কবি মতিৰাম ভট্টই তেওঁক আদিকবিৰ স্বীকৃতি দিছিল। তেওঁ  দেশৰ মান উন্নত কৰা আৰু  জাতীয় সংস্কৃতিৰ সংৰক্ষণ কেৱল শিক্ষাৰ দ্বাৰাহে সম্ভৱ বুলি মন্তব্য কৰি উঠি অহা প্ৰজন্মক ভাল শিক্ষাৰে শিক্ষিত কৰি তোলাৰ ক্ষেত্ৰৰ বিশেষ গুৰুত্ব প্ৰদান কৰিবলৈ অভিভাৱকসকলক আহ্বান জনায়।  বঙাইগাঁও জিলা সমিতি আগছুৰ সাধাৰণ সম্পাদক   বিকাশ পৌড়েল,  আঞ্চলিক পঞ্চায়তৰ সদস্য প্ৰফুল্ল ৰায়, কবি হৰিপ্ৰসাদ নাথ আদি কেবাগৰাকীও বিশিষ্ট অতিথিসকল উপস্থিত থকা উক্ত সভাত অসম নেপালী সাহিত্য সভাৰ বঙাইগাঁও জিলা সমিতিৰ সাধাৰণ সম্পাদক ৰাম কুমাৰ শৰ্মা , জিলা সাহিত্য সভাৰ প্ৰাক্তন সভাপতি গোপাল ভট্টৰাই, অসম  গোৰ্খা সন্মিলনৰ প্ৰাক্তন উপ সভাপতি  খড়্গ কাৰ্কী, আদিয়ে ভানুভক্ত আচাৰ্যৰ সাহিত্যিক আৰু  সামাজিক অৱদানৰ ওপৰত বক্তব্য আগবঢ়ায়।  সমাৰোহত উচ্চ আৰু  উচ্চতৰ মাধ্যমিকৰ উপৰি উচ্চ শিক্ষাত সুখ্যাতিৰে উত্তীৰ্ণ হোৱা কিষাণ বজাৰ- ছিটকাগাঁও এলেকাৰ ৩২ গৰাকী ছাত্ৰ - ছাত্ৰীক সম্বৰ্ধনা জনোৱা হয়। উল্লেখ্য যে বঙাইগাঁও জিলা সমিতি তত্বাৱধানত জিলাখনৰ ধলাপুখুৰী, ভাদ্ৰাগাঁও, দোলাইগাঁও উজানপাৰা শাখা সমিতিৰ  লগতে চিৰাং জিলাৰ ভাৰত ভূটান সীমান্তৱৰ্তী হাতিসাৰ, মালিভিটা, বাতাবাৰী  আদিতো ভানু জয়ন্তী  উলহ মালহেৰে পালন কৰে ।🔯