🔯স্বাস্থ্যমন্ত্ৰী কেশৱ মহন্তৰ ৰাজহুৱা স্বাস্থ্য সম্পৰ্কীয় শেহতীয়া পৰিস্থিতি পৰ্যালোচনা🔯

🔯কেইবাখনো জিলাৰ অসামৰিক চিকিৎসালয়ক জাপানীজ 'ডেজিগনেটেড চিকিৎসালয়' হিচাপে সাজু কৰিবলৈ বৈঠকত স্থিৰ🔯 

📝News4Bongaigaon:১৩ জুলাইঃ স্বাস্থ্যমন্ত্ৰী কেশৱ মহন্তই বুধবাৰে এনএইচএমৰ ৰাজ্যিক কাৰ্যালয়ত স্বাস্থ্য বিভাগৰ শীৰ্ষ বিষয়াসকলৰ সৈতে আজি এখন বৈঠকত মিলিত হৈ ৰাজ্যখনৰ ৰাজহুৱা স্বাস্থ্য সম্পৰ্কীয় শেহতীয়া পৰিস্থিতি পৰ্যালোচনা কৰে ৷ শেহতীয়াকৈ কেইবাখনো জিলাত দেখা দিয়া জাপানীজ এনকেফেলাইটিজ আৰু উৎকট জ্বৰৰ লক্ষণযুক্ত ৰোগ (জেই-এইএছ), মেলেৰিয়াৰ প্ৰাদুৰ্ভাৱ আদিৰ বিষয়ে বিস্তাৰিত ভাৱে আলোচনা কৰাৰ উপৰি শেহতীয়া ক'ভিড পৰিস্থিতিৰো বৈঠকত পৰ্যালোচনা কৰা হয়। জাপানীজ এনকেফেলাইটিজ আৰু উৎকট জ্বৰৰ লক্ষণযুক্ত ৰোগত আক্ৰান্তৰ জৰুৰী চিকিৎসাৰ বাবে প্ৰতিখন চিকিৎসা মহাবিদ্যালয়ৰ চিকিৎসালয়ৰ উপৰি ভালেকেইখন জিলাৰ অসামৰিক চিকিৎসালয়কো জাপানীজ 'ডেজিগনেটেড চিকিৎসালয়' হিচাপে সাজু কৰিবলৈ বৈঠকত স্থিৰ কৰা হয়। এই ডেজিগনেটেড জিলা অসামৰিক চিকিৎসালয়সমূহতে সংশ্লিষ্ট জিলাৰ সন্দেহযুক্ত এনকেফেলাইটিজ ৰোগীৰ সু-চিকিৎসাৰ বাবে চিকিৎসকৰ লগতে প্ৰয়োজনীয় সা-সুবিধা তাৎক্ষণিক ভাৱে উপলব্ধ কৰাবলৈও বিভাগীয় বিষয়াসকলক দিহা দিও। আনহাতে, ক'ভিড টিকাকৰণ, নিয়মীয়া টিকাকৰণ কাৰ্যসূচী আদিৰ অগ্ৰগতিও পৰ্যালোচনা কৰা হয়। বৈঠকত স্বাস্থ্য বিভাগৰ প্ৰধান সচিব অবিনাশ যোশী, এনএইচএমৰ ৰাজ্যিক অভিযান সঞ্চালক ডাঃ এম এছ লক্ষ্মীপ্ৰিয়া, চিকিৎসা শিক্ষা সঞ্চালক ডাঃ অনুপ কুমাৰ বৰ্মন, স্বাস্থ্যসেৱা সঞ্চালক (পৰিয়াল কল্যাণ) কমলজিৎ তালুকদাৰ, এনএইচএমৰ কাৰ্যবাহী সঞ্চালক ডাঃ মনোজ কুমাৰ চৌধুৰীকে ধৰি বিভাগীয় বিষয়াসকল উপস্থিত থাকে। ইফালে, জেই-এইইৰ প্ৰাদুৰ্ভাৱ সন্দৰ্ভত বৃহস্পতিবাৰেও জিলাসমূহৰ উপায়ুক্ত আৰু যুটীয়া স্বাস্থ্যসেৱা সঞ্চালকসকলৰ সৈতেও এখন ভিডিঅ' কনফাৰেন্স বৈঠকৰ আয়োজন কৰা হৈছে।🔯