🔯বানপীড়িত ১,০১,৫৩৯ শিক্ষাৰ্থীলৈ মুখ্যমন্ত্ৰীৰ বিশেষ পুথি অনুদান আঁচনিৰ অধীনত ১০০০ টকাকৈ মুকলি🔯

🔯বানপীড়িত ১,০১,৫৩৯ শিক্ষাৰ্থীলৈ মুখ্যমন্ত্ৰীৰ বিশেষ পুথি অনুদান আঁচনিৰ অধীনত ১০০০ টকাকৈ মুকলি🔯

📝দিছপুৰঃ১৬ জুলাইঃ আজি মুখ্যমন্ত্ৰী ডঃ হিমন্ত বিশ্ব শৰ্মাই জনতা ভৱনত এখন সংবাদ মেল সম্বোধন কৰি অসমক জর্জৰিত কৰা দুটাকৈ বানৰ পাছৰ পৰিস্থিতিৰ শেহতীয়া তথ্য তথা বান আক্রান্তসকলৰ বাবে চৰকাৰে গ্রহণ কৰা পদক্ষেপ সম্পর্কে বিস্তাৰিতভাৱে অৱগত কৰে ৷ তেওঁ সংবাদ মেলত কয় যে এই বছৰৰ দুটা বানৰ ঢৌৱে ৩৪খন জিলাৰ প্রায় ৯০ লাখ লোক তথা প্রায় ২,৪০,০৯৬ হেক্টৰ খেতি মাটি প্রভাৱিত কৰিছে।বানপীড়িতসকলক আগন্তুক পৰিস্থিতিৰ সৈতে মোকাবিলা কৰাত সহায় আগবঢ়োৱাৰ বাবে সাহায্য শিবিৰ এৰি যোৱাৰ সময়ত তেনে পৰিয়ালৰ বেংক একাউণ্টলৈ ৩৮০০ টকাকৈ প্রেৰণ কৰা হৈছে।  অৱশ্যে এই ধন পাবলগীয়া ১,৮৯,৭৫২টা পৰিয়ালৰ ভিতৰত  ৩৫ হাজাৰ পৰিয়ালে এতিয়াও বেংক প্রক্রিয়াগত কাৰণত প্ৰাপ্ত কৰিবলৈ বাকী আছে। বান আৰু ভূমিস্খলনৰ ফলত জীৱন হেৰুওৱা ১৯৫ গৰাকী লোকৰ পৰিয়াললৈ ইতিমধ্যে ৪ লাখ টকাকৈ চৰকাৰৰ তৰফৰ পৰা প্রদান কৰা হৈছে বুলিও কয় ৷

সেইদৰে আন এক পদক্ষেপ হিচাপে বানপীড়িত ১,০১,৫৩৯ শিক্ষাৰ্থীলৈ ১০০০ টকাকৈ মুখ্যমন্ত্ৰীৰ বিশেষ পুথি অনুদান মুকলি কৰি দিয়া হৈছে। মুখ্যমন্ত্রী সাহায্য পুঁজিৰ ধনেৰে পোনপটীয়া হস্তান্তৰৰ জৰিয়তে শিক্ষাৰ্থীসকলৰ বেংক একাউণ্টলৈ এই ধনৰাশি স্থানান্তৰ কৰা হৈছে। তদুপৰি শিক্ষা বিভাগে বানত ক্ষতিগ্ৰস্ত শিক্ষাৰ্থীক অতিৰিক্ত পাঠ্যপুথি প্ৰদানৰ বাবে মূল্যায়ন কৰি আছে আৰু এই প্রক্রিয়া ১৫ আগষ্টৰ ভিতৰত সম্পূৰ্ণ কৰা হ'ব বুলিও কয় মুখ্যমন্ত্ৰী শৰ্মাই ৷ এতিয়ালৈকে প্রাপ্ত তথ্য অনুসৰি সম্পূর্ণ আৰু আংশিকভাৱে সর্বমুঠ ৩,০৩,৯৩০টা ক্ষতিগ্ৰস্ত ঘৰৰ পৰিয়াললৈ প্রক্রিয়াগতভাৱে স্বচ্ছতা বজাই পুনৰীক্ষণ আদিৰ জৰিয়তে ক্ষতিপূৰণ ৰাশি প্রদান প্রক্রিয়া অব্যাহত থাকিব। ইয়াৰ লগতে আগষ্টৰ পৰা মথাউৰি, বিদ্যালয় ভৱন বা অন্যান্য আন্ত:গাঁথনিমূলক মেৰামতিৰ ক্ষেত্রত চৰকাৰে পদক্ষেপ গ্রহণ কৰিব বুলিও মুখ্যমন্ত্ৰীগৰীকে উল্লেখ কৰে ৷ সংবাদ মেলত শিক্ষামন্ত্ৰী ডাঃ ৰণোজ পেগু আৰু যোগেন মহন উপস্থিত আছিল ৷🔯