🔯মুখ্যমন্ত্ৰীৰ প্ৰতিষ্ঠানিক বৃক্ষৰোপণ প্ৰকল্প'🔯

🔯মুখ্যমন্ত্ৰীৰ প্ৰতিষ্ঠানিক বৃক্ষৰোপণ প্ৰকল্প'🔯

🔯প্ৰকল্পটোৰ কাৰ্যৰূপায়ণ তথা ৰাজ্যজোৰা শুভাৰম্ভণি কাৰ্যসূচীৰ প্ৰস্তুতিৰ পৰ্যালোচনা মন্ত্ৰী কেশৱ মহন্তৰ🔯

📝News4Bongaigaon: ১৩ জুলাইঃ জলবায়ু পৰিবৰ্তনৰ সংকট প্ৰতিৰোধত সহায়ক হোৱাকৈ ৰাজ্যখনত সেউজ আৱৰণ বৃদ্ধিৰ সামূহিক প্ৰয়াসক উদগণি যোগোৱাৰ উদ্দেশ্যে অসম চৰকাৰৰ বিজ্ঞান, প্ৰযুক্তিবিদ্যা আৰু জলবায়ু পৰিবৰ্তন বিভাগে অহা ১৭ জুলাইৰ পৰা ১৫ আগষ্টলৈ ৰাজ্যৰ সকলো চৰকাৰী কাৰ্যালয়, পঞ্চায়তীৰাজ প্ৰতিষ্ঠান, শিক্ষানুষ্ঠান আদিৰ চৌহদত ফলমূল, ঔষধি আৰু সৌন্দৰ্যবৰ্ধনকাৰী থলুৱা প্ৰজাতিৰ গছপুলি ৰোপণৰ এক বিশেষ প্ৰকল্প ৰূপায়ণৰ উদ্যোগ লৈছে। 'আজাদী কা অমৃত মহোৎসৱ'ৰ অংশ হিচাপে আয়োজিত 'মুখ্যমন্ত্ৰীৰ প্ৰতিষ্ঠানিক বৃক্ষৰোপণ প্ৰকল্প' (চিএমআইপিপি) শীৰ্ষক এই বিশেষ প্ৰকল্পটি অহা ১৭ জুলাইত দিছপুৰৰ জনতা ভৱন চৌহদ মুখ্যমন্ত্ৰী ড০ হিমন্ত বিশ্ব শৰ্মাই আনুষ্ঠানিক ভাৱে শুভাৰম্ভ কৰিব। এই উদ্দেশ্যে বুধবাৰে বিয়লি মন্ত্ৰী কেশৱ মহন্তই দিছপুৰত সাধাৰণ প্ৰশাসন বিভাগ, বিজ্ঞান-প্ৰযুক্তিবিদ্যা আৰু জলবায়ু পৰিবৰ্তন বিভাগ, সামাজিক বনানীকৰণ বিভাগ, কৃষি বিভাগ, উদ্যান‌‌ শস্য তথা খাদ্য-সংস্কৰণ বিভাগৰ লগতে অসম বিজ্ঞান, প্ৰযুক্তিবিদ্যা আৰু  পৰিবেশ পৰিষদ (এছটেক)ৰ শীৰ্ষ বিষয়াসকল, এমট্ৰন আৰু তথ্যপ্ৰযুক্তি, ইলেকট্ৰনিকছ আৰু যোগাযোগ সঞ্চালকালয় (ডাইটেক)ৰ প্ৰতিনিধিৰ সৈতে এখন বৈঠকত মিলিত হৈ এই বিশেষ প্ৰকল্পটোৰ কাৰ্যৰূপায়ণ তথা ৰাজ্যজোৰা শুভাৰম্ভণি কাৰ্যসূচীৰ বাবে চলোৱা প্ৰস্তুতিৰ পৰ্যালোচনা কৰে। বৈঠকত সাধাৰণ প্ৰশাসন বিভাগৰ প্ৰধান সচিব অবিনাশ যোশী, কৃষি সঞ্চালক অনন্তলাল জ্ঞানী, বিজ্ঞান-প্ৰযুক্তিবিদ্যা আৰু জলবায়ু পৰিবৰ্তন বিভাগৰ সচিব লয়া মাদ্দুৰী, বিশেষ সচিব পি এল এন ৰাজু, অতিৰিক্ত সচিব তথা অসম বিজ্ঞান, প্ৰযুক্তিবিদ্যা আৰু  পৰিবেশ পৰিষদ (এছটেক)ৰ সঞ্চালক কিমনেই চাংছন, সামাজিক বনানীকৰণ বিভাগৰ বিশেষ প্ৰধান মুখ্য বন সংপালক এ স্বৰ্গিয়াৰী, উদ্যানশস্য আৰু খাদ্য-প্ৰসংস্কৰণ সঞ্চালক ত্ৰিৰঙ্গ ভাৰতীয় বৰা, সাধাৰণ প্ৰশাসন বিভাগৰ যুটীয়া সচিব জয়ন্ত কুমাৰ বৰা আৰু এছটেকৰ জলবায়ু পৰিবৰ্তন কোষৰ প্ৰমুখ ড০ জয়দ্বীপ বৰুৱায়ো অংশগ্ৰহণ কৰে।

মুখ্যমন্ত্ৰীৰ দ্বাৰা 'মুখ্যমন্ত্ৰীৰ প্ৰতিষ্ঠানিক গছপুলি ৰোপণ প্ৰকল্প'ৰ আনুষ্ঠানিক উদ্বোধনৰ পাছতে অহা ১৮ জুলাইৰ পৰা ৰাজ্যৰ মন্ত্ৰীসকল, মুখ্যসচিব, স্বায়ত্ব পৰিষদসমূহৰ মুখ্য কাৰ্যবাহী সদস্যসকল আৰু কাৰ্যবাহী সদস্যসকল, অসম চৰকাৰৰ প্ৰতিটো বিভাগৰে জ্যেষ্ঠতম সচিবসকলেও নিজ নিজ কাৰ্যালয় চৌহদত এই প্ৰতিষ্ঠানিক গছপুলি ৰোপণ কাৰ্যসূচীৰ আনুষ্ঠানিক শুভাৰম্ভণি কৰিব। জিলাসমূহতো উপায়ুক্তকে ধৰি প্ৰতিটো চৰকাৰী কাৰ্যালয়, শিক্ষানুষ্ঠান, পঞ্চায়তীৰাজ প্ৰতিষ্ঠান আদিৰ মূৰব্বীয়ে ১৮ জুলাইৰ পৰা নিজ কাৰ্যালয়, শিক্ষানুষ্ঠান, প্ৰতিষ্ঠানৰ চৌহদত এই কাৰ্যসূচী আৰম্ভ কৰিব। এই প্ৰকল্পৰ অধীনত অহা ১৫ আগষ্টলৈ ৰাজ্যৰ সকলো কাৰ্যালয়, শিক্ষানুষ্ঠান, পঞ্চায়তীৰাজ প্ৰতিষ্ঠানৰ চৌহদত ৰোপণ কৰিব লগা প্ৰতিজোপা গছপুলি তিনিবছৰলৈকে তদাৰক কৰাৰো দায়িত্ব সংশ্লিষ্ট কাৰ্যালয়, শিক্ষানুষ্ঠান, পঞ্চায়তীৰাজ প্ৰতিষ্ঠান আদিয়েই বহন কৰি গছপুলিসমূহ ডাঙৰ হোৱাটো সুনিশ্চিত কৰিব।   এই মহত্বপূৰ্ণ প্ৰকল্পটোৰ মূল দিশসমূহ তদাৰকৰ দায়িত্বত থকা অসম বিজ্ঞান, প্ৰযুক্তিবিদ্যা আৰু  পৰিবেশ পৰিষদ (এছটেক)-এ 'মুখ্যমন্ত্ৰীৰ প্ৰতিষ্ঠানিক গছপুলি ৰোপণ প্ৰকল্প'ৰ অধীনত প্ৰতিটো কাৰ্যালয়, শিক্ষানুষ্ঠান, প্ৰতিষ্ঠানৰ চৌহদত ৰোপণ কৰা প্ৰতিজোপা গছপুলিৰ আলোকচিত্ৰ, ৰোপকৰ নাম আৰু পদবী, গছপুলিৰ অসমীয়া, ইংৰাজী আৰু বৈজ্ঞানিক নামসহ বিতং তথ্য ৰোপণ কৰাৰ দিনাৰে পৰা কমেও পৰৱৰ্তী তিনিবছৰলৈ সংৰক্ষিত হৈ থকাকৈ 'শ্যামলীচৌহদ' শীৰ্ষক এটা ৱেবপ'ৰ্টেলো শীঘ্ৰে মুকলি কৰিব পৰাকৈ ইতিমধ্যে সাজু কৰিছে।🔯