🔯মন্ত্ৰী পীযুষ হাজৰিকাৰে কোচ ৰাজবংশী জাতীয় পৰিষদৰ নেতৃত্বৰ টেলিফোনিক আলোচনা🔯

🔯মন্ত্ৰী পীযুষ হাজৰিকাৰে কোচ ৰাজবংশী জাতীয় পৰিষদৰ নেতৃত্বৰ টেলিফোনিক আলোচনা🔯

🔯২৫ জুলাইৰ কমতাপুৰ বন্ধ আৰু ২ আগষ্টৰ পথ বন্ধৰ কাৰ্যসূচী সাময়িকভাৱে স্থগিত🔯

📝বঙাইগাঁওঃ ২৩ জুলাইঃ কমতাপুৰ ৰাজ্য পুনৰ গঠন আৰু কোচ ৰাজবংশী জনগোষ্ঠীক জনজাতিকৰণৰ দাবীত অহা ২৫ জুলাইৰ পুৱা ৬ বজাৰ পৰা ২ বজালৈ আহ্বান জনোৱা ৮ ঘন্টীয়া কমতাপুৰ বন্ধ আৰু ২ আগষ্টৰ পথ বন্ধৰ কাৰ্যসূচী সাময়িকভাৱে কোচ ৰাজবংশী জাতীয় পৰিষদে স্থগিত ৰাখিছে ৷ শনিবাৰে ৰাজ্য চৰকাৰৰ মন্ত্ৰী পীযুষ হাজৰিকাৰ সৈতে সংগঠনটোৰ নেতৃত্বৰ মাজত হোৱা টেলিফোনিক আলোচনাৰ পিচতে জাতীয় পৰিষদৰ নেতৃত্বই পূৰ্বে ঘোষিত আন্দোলনৰ কাৰ্যসূচী সাময়িকভাৱে স্থগিত ৰাখে ৷ উল্লেখ্য যে শনিবাৰে বিয়লি ৫ বজাত বঙাইগাঁও জিলা আৰক্ষী অধীক্ষকৰ কাৰ্য়ালয়ত বঙাইগাঁও জিলাৰ উপায়ুক্ত নবদ্বীপ পাঠক আৰু আৰক্ষী অধীক্ষক স্বপ্ননীল ডেকাই কোচ ৰাজবংশী জাতীয় পৰিষদৰ কেন্দ্ৰীয় সভাপতি বিমল কুমাৰ বৰ্মনৰ নেতৃত্বত যোৱা এটি পাঁচ জনীয়া প্ৰতিনিধি দলৰ সৈতে কমতাপুৰ ৰাজ্য পুনৰ গঠন আৰু জনজাতিকৰণৰ দাবীত সংগঠনটোৱে পূৰ্বে ঘোষণা কৰা আন্দোলনৰ কাৰ্যসূচী সম্পৰ্কে আলোচনা কৰে ৷ এই  আলোচনাৰ সময়তে মুখ্যমন্ত্ৰীৰ নিৰ্দেশ মৰ্মে অসম চৰকাৰৰ মন্ত্ৰী পীযুষ হাজৰিকাই কোচ ৰাজবংশী জাতীয় পৰিষদৰ নেতৃত্বৰে টেলিফোন যোগে আলোচনা কৰে আৰু জাতীয় পৰিষদে আহ্বান জনোৱা কাৰ্যসূচী স্থগিত ৰাখিবলৈ অনুৰোধ জনায়।

মন্ত্ৰী হাজৰিকাই সংগঠনটোৰ নেতৃত্বক মুখ্যমন্ত্ৰী ডঃ হিমন্ত বিশ্ব শৰ্মা বৰ্তমান চৰকাৰী কাৰ্যসূচীৰ বাবে নতুন দিল্লীত ব্যস্ত থকা বাবে জাতীয় পৰিষদৰে আনুষ্ঠানিক বৈঠক কৰিব নোৱাৰিলে বুলিও অৱগত কৰে৷ লগতে অহা ২৫ জুলাইত অসম চৰকাৰৰ জনজাতি পৰিক্ৰমা বিভাগে গুৱাহাটীত ছয় জনগোষ্ঠীৰ জনজাতিকৰণৰ দাবী সম্পৰ্কে আলোচনা কৰাৰ বাবে আহ্বান কৰা আলোচনালৈ জাতীয় পৰিষদৰ প্ৰতিনিধিক উপস্থিত থাকিবলৈ আহ্বান জনায় আৰু অচিৰেই অসমৰ মুখ্যমন্ত্ৰী ড° হিমন্ত বিশ্ব শৰ্মাৰ সৈতে বৈঠক অনুষ্ঠিত কৰাৰ আশ্বাস দিয়াত জাতীয় পৰিষদে আহবান কৰা ২৫ জুলাইৰ ৮ ঘণ্টীয়া কমতাপুৰ বন্ধ আৰু ২ আগষ্টৰ ১২ ঘণ্টীয়া পথ বন্ধ কাৰ্যসূচী সাময়িক ভাবে স্থগিত ৰাখে বুলি এক বিবৃতি যোগে কোচ ৰাজবংশী জাতীয় পৰিষদৰ সাধাৰণ সম্পাদক বিশ্বজিৎ ৰায়ে জানিবলৈ দিছে ৷ উল্লেখ্য যে আলোচনাত জাতীয় পৰিষদৰ সাধাৰণ সম্পাদক বিশ্বজিৎ ৰায়ৰ লগতে উপদেষ্টা সতীশ পাটগিৰী, সহকাৰী সাধাৰণ সম্পাদকদ্বয় ভূপেন ৰায় আৰু জগন্নাথ ৰায়ো উপস্থিত আছিল। বিবৃতিটোত অসমৰ মুখ্যমন্ত্ৰী ড° হিমন্ত বিশ্ব শৰ্মাৰ প্ৰতিনিধি হিচাপে মন্ত্ৰী পীযুষ হাজৰিকাৰ সৈতে কথা পাতি দিয়া বাবে বঙাইগাঁও জিলাৰ উপায়ুক্ত আৰু আৰক্ষী অধীক্ষকক জাতীয় পৰিষদে ধন্যবাদ জনায় ।

🔯