🔯বঙাইগাঁৱত শিক্ষক দিৱস পালন🔯

🔯বঙাইগাঁৱত শিক্ষক দিৱস পালন🔯

🔯শিক্ষকসকলে ছাত্ৰ - ছাত্ৰীসকলৰ হৃদয় আলোকিত কৰিবৰ কাৰণে চেষ্টা কৰিব লাগিব- থানেশ্বৰ মালাকাৰ🔯

📝বঙাইগাঁওঃ ৫ ছেপ্টেম্বৰ: বঙাইগাঁও জিলা প্ৰশাসনৰ উদ্যোগত তথা জিলা শিক্ষা বিভাগৰ সহযোগত সোমবাৰে প্ৰাক্তন ৰাষ্ট্ৰপতি , মহান দাৰ্শনিক , শিক্ষাবিদ ড:সৰ্বেপল্লী ৰাধাকৃষ্ণণৰ জন্ম দিৱসটি শিক্ষক দিৱস হিচাপে পালন কৰা হয় ৷ বঙাইগাঁও জিলা পুথিভঁৰাল প্ৰেক্ষাগৃহত উদযাপন কৰা ৬১ সংখ্যক শিক্ষক দিৱস উপলক্ষে কাৰ্যসূচীৰ আৰম্ভণিতে অনুষ্ঠানত মুখ্য অতিথি হিচাপে উপস্থিত থকা সৰ্ব শিক্ষা অভিযানৰ প্ৰাক্তন পৰিচালন সঞ্চালক তথা নগৰ উন্নয়ন বিভাগৰ আয়ুক্ত সচিব আৰু বিশিষ্ট লেখক থানেশ্বৰ মালাকাৰে ভাৰতৰত্ন ড:সৰ্বেপল্লী ৰাধাকৃষ্ণণৰ প্ৰতিচ্ছবিৰ সন্মুখত বন্তি প্ৰজ্বলন আৰু মাল্যাৰ্পণ কৰি শ্ৰদ্ধাঞ্জলি জ্ঞাপন কৰে ৷ একেদৰে জিলা উপায়ুক্ত নবদ্বীপ পাঠক,  অতিৰিক্ত উপায়ুক্ত শ্যামল ক্ষেত্ৰ গগৈ আদিয়েও বন্তি প্ৰজ্বলন কৰি দাৰ্শনিকগৰাকীলৈ শ্ৰদ্ধা নিবেদন কৰে ৷ ইয়াৰ পিচতে জিলা উপায়ুক্ত নবদ্বীপ পাঠকৰ সভাপতিত্বত অনুষ্ঠিত সভাত সভাপতিৰ ভাষণত  তেওঁ গুৰু-শিষ্য সম্পৰ্কত আলোকপাত কৰে আৰু এই অনুষ্ঠানৰ পৰাই তেওঁৰ শিক্ষকসকলক শ্ৰদ্ধাৰে সোঁৱৰে। তেওঁ কয় যে পিতৃ আৰু মাতৃৰ পিচতে যদি কাৰোবাৰ স্থান থাকে তেতিয়াহলে তেওঁলোক হ'ল শিক্ষাগুৰুসকল ৷

বঙাইগাঁও জিলা অধিবিদ্যা পৰিষদৰ সচিব সমীৰ ৰায়ে উদ্দেশ্য ব্যাখ্যা কৰা সভাত মুখ্য অতিথি হিচাপে অংশগ্ৰহণ কৰে সৰ্ব শিক্ষাৰ প্ৰাক্তন পৰিচালন সঞ্চালক তথা নগৰ উন্নয়ন বিভাগৰ আয়ুক্ত সচিব আৰু বিশিষ্ট লেখক থানেশ্বৰ মালাকাৰে। তেওঁ ভাষণ প্ৰসংগত কয় যে এগৰাকী শিক্ষক প্ৰাথমিক বিদ্যালয়ৰেই হওক বা হাইস্কুলৰেই হওক তেওঁ এজন ছাত্ৰৰ বাবে গোটেই জীৱনৰ কাৰণেই শিক্ষক ৷ কেবল প্ৰাথমিক বা হাইস্কুলত পঢ়া কালৰহে শিক্ষক বুলি ক'ব নোৱাৰি।শিক্ষকসকলৰ সামাজিক সন্মান মহাভাৰতৰ দিনৰ পৰাই আছে। মৰুভূমি সেউজীয়া কৰাৰ সামৰ্থ্য যেনেদৰে কেবল মেঘৰেই আছে তেনেদৰেই শিক্ষকসকলেই পৃথিৱীখন সজীৱ কৰি ৰাখিব পাৰে। তেওঁ আৰু কয় যে শিক্ষকসকলে ছাত্ৰ - ছাত্ৰীসকলৰ হৃদয় আলোকিত কৰিবৰ কাৰণে চেষ্টা কৰিব লাগিব ৷ পাঠ্য পুথিত যিখিনি আছে সেইখিনিৰ বাহিৰেও তেওঁলোকৰ যিখিনি অন্তৰ্নিহিত গুণ সেইখিনি কেনেকৈ উলিয়াই আনিব পাৰি সেই সম্পৰ্কত শিক্ষকসকলে কাম কৰিব লাগিব ৷ লগতে আমাৰ দুখীয়া পিতৃ - মাতৃসকলৰ সন্তানসকলৰ প্ৰতি আমি বিশেষ নজৰ দিব লাগিব ৷ তেওঁলোকৰ মেধা আছে কিন্তু তেওঁলোকক আমি সম্পূৰ্ণভাৱে পৰিচালিত কৰিব পৰা গাইড কৰিব পৰা হ'ব লাগিব বুলিও কয় ৷ তেওঁ মহান দাৰ্শনিক পণ্ডিত সৰ্বেপল্লী ৰাধাকৃষ্ণণৰ জীৱন আৰু আদৰ্শৰ ওপৰতো আলোকপাত কৰে। উল্লেখ্য যে সভাত প্ৰাথমিক বিদ্যালয় পৰ্যায়ৰ আঠগৰাকীৰ লগতে উচ্চ আৰু উচ্চতৰ মাধ্যমিক বিদ্যালয়ৰ আঠগৰাকী তথা দুগৰাকী মণ্ডল সমল কেন্দ্ৰ সমন্বয়ক(CRCC)কে ধৰি মুঠ ১৮ গৰাকী শিক্ষক - শিক্ষয়িত্ৰীক একোখন ফুলাম গামোচা আৰু মান পত্ৰৰে সম্বৰ্ধনা জনোৱা হয় ৷ সভাত অতিৰিক্ত উপায়ুক্ত(শিক্ষা) শ্যামল ক্ষেত্ৰ গগৈৰ লগতে কেবাগৰাকীও শিক্ষা বিষয়া আৰু ভালে সংখ্যক শিক্ষক উপস্থিত থাকে ৷ সভাত আঁত ধৰে বঙাইগাঁও জিলাৰ প্ৰাথমিক শিক্ষা বিষয়া তথা বঙাইগাঁও জিলা চক্ৰৰ বিদ্যালয়সমূহৰ পৰিদৰ্শক(ভাৰপ্ৰাপ্ত) জ্যোৎস্না ৰাণী বৰ্মনে।🔯