🔯বঙাইগাঁৱত বিজেপিৰ মহিলা মৰ্চাৰ ৰাজ্যিক কায্যনিৰ্বাহক সভা🔯

🔯বঙাইগাঁৱত বিজেপিৰ মহিলা মৰ্চাৰ ৰাজ্যিক কায্যনিৰ্বাহক সভা🔯

🔯বৰ্দ্ধিত জনসংখ্যা দেশৰ বাবেই নহয়, বিশ্বৰ বাবেই এক ভয়াৱহ ইংগিত- সভানেত্ৰী আঙুৰলতা ডেকা🔯

🔯দেশৰ জনসংখ্যা নিয়ন্ত্ৰণৰ বাবে “হম দো, হামাৰী দো” নীতি অনুসৰণ কৰিবলৈ আহ্বান🔯

🔯সম্পৰ্ক গঢ়োতে আমি সুন্দৰ চেহেৰা অথবা ফটো চাই নহয়, প্রকৃত পৰিচয় চাব লাগিব🔯

📝বঙাইগাওঁঃ ৩ ছেপ্তেম্বৰঃ বৰ্দ্ধিত জনসংখ্যাক দেশৰ বাবেই নহয় বিশ্বৰ বাবেই এক ভয়াৱহ ইংগিত বুলি অভিহিত কৰিছে ভাৰতীয় জনতা পাৰ্টিৰ অসম প্ৰদেশ মহিলা মৰ্চাৰ সভানেত্ৰী আঙুৰলতা ডেকাই ৷ তেওঁ কয় যে এখন প্রগতিশীল অসমৰ স্বাৰ্থত এখন সুস্থ সমাজ নিৰ্মাণৰ বাবে আৰু সকলোৰে উন্নতিৰ স্বাৰ্থত ভাৰতবৰ্ষৰ দৰে এখন দেশত সাম্প্রতিক বৰ্দ্ধিত জনসংখ্যাৰ ওপৰত নিয়ন্ত্ৰণ ৰখাটো অত্যন্ত প্রয়োজনীয় হৈ পৰিছে। উল্লেখ্য যে ভাৰতীয় জনতা পার্টিৰ অসম প্রদেশ মহিলা মৰ্চাৰ দ্বিতীয়খন ৰাজ্যিক কাৰ্যনিৰ্বাহক সভা আজিৰে পৰা দুদিনীয়া কাৰ্যসূচীৰে বঙাইগাওঁ জিলাত আৰম্ভ হৈছে।  ৰাজ্যিক কায্যনিৰ্বাহক সভাৰ প্ৰথম দিনা বিয়লিৰ ভাগত বঙাইগাঁও জিলা বিজেপি কাৰ্যালয়ৰ সভাক্ষত অনুষ্ঠিত হয় বিষয়ববীয়াৰ সভা ৷ কায্যনিৰ্বাহক সভাৰ লগত সংগতি ৰাখি বিষয়ববীয়া সভাৰ পূৰ্বে মহিলা মৰ্চাৰ সভানেত্ৰী আঙুৰলতা ডেকাই ইয়াতে এখন সংবাদ মেল সম্বোধন কৰি এই মন্তব্য কৰে ৷ বঙাইগাঁও জিলা বিজেপিৰ সভানেত্ৰী হিমানী অধিকাৰী উপস্থিত থকা সংবাদ মেলত ৰাজ্যিক সভানেত্ৰী আঙুৰলতা ডেকাই কয় যে অজ্ঞতা, শিক্ষাৰ অভাৱ অথৱা অন্যান্য কিছু কাৰণত ৰাজ্যখনৰ বহু অঞ্চল বৰ্তমান ভয়াৱহ জন বিস্ফোৰণৰ কবলত পৰিছে। যাৰ ফলত আমাৰ সমাজত অস্থিৰতা বৃদ্ধি পাইছে, নানান দুস্কৃতি সংঘটিত হৈছে। এই ক্ষেত্ৰত ভাৰতীয় জনতা পাৰ্টিৰ বৰ্তমানৰ চৰকাৰে শীঘ্ৰেই এক উপযুক্ত ব্যৱস্থা গ্ৰহণ কৰিব বুলি মহিলা মৰ্চাই আশা ব্যক্ত কৰে। লগতে সভানেত্ৰী ডেকাই দেশৰ ভৱিষ্যৎ প্ৰজন্মৰ সুৰক্ষাৰ কথা চিন্তা কৰি নাৰী সকলৰ মাজত এক জাগৰণৰ সৃষ্টিৰ লগতে সকলোকে দেশৰ জনসংখ্যা নিয়ন্ত্ৰণৰ বাবে “হম দো, হামাৰী দো” নীতি অনুসৰণ কৰিবলৈ আহ্বান জনাই তেওঁ কয় যে নাৰী এগৰাকী এখন ঘৰৰ মূল চালিকাশক্তি, এখন সমাজ নিৰ্মাণত নাৰী এগৰাকীৰ ভূমিকা অসীম। গতিকে মহিলা মৰ্চাৰ তৰফৰ পৰা সমাজৰ প্ৰতিগৰাকী নাৰীৰ মাজত জনবিস্ফোৰণ ৰোধৰ বাবে জন্ম নিয়ন্ত্ৰণৰ ক্ষেত্ৰত সজাগতা সৃষ্টিৰ প্ৰয়াস কৰা হ’ব আৰু এই ক্ষেত্ৰত সকলোৰে সহযোগিতাৰ বিচৰা হৈছে বুলিও কয় ৷ সংবাদ মেলত ডেকাই আৰু কয় যে আমাৰ নাৰী অবিহনে এখন ঘৰ শূণ্য, এখন সমাজ শূণ্য। মমতাৰ প্ৰতীক নাৰী আছে বাবেই এই ধৰিত্ৰীত মানৱতা, মৰম, স্নেহ আছে। যি সময়ত দেশৰ প্ৰধানমন্ত্ৰী নৰেন্দ্ৰ মোদীয়ে সমগ্ৰ দেশত আৰু অসমৰ মুখ্যমন্ত্ৰী ড০ হিমন্ত বিশ্ব শৰ্মাই সমগ্র ৰাজ্যজুৰি নাৰীৰ সম বিকাশ, সম অধিকাৰৰ ক্ষেত্ৰত বলিষ্ঠ পদক্ষেপ গ্ৰহণ কৰিছে, যি সময়ত ভাৰতীয় জনতা পার্টি নেতৃত্বাধীন চৰকাৰখনে দেশৰ ৰাজনৈতিক, সামৰিক, অর্থনৈতিক, সামাজিক ক্ষেত্ৰত দেশৰ নাৰী শক্তি উজ্বলি উঠিব পৰাকৈ এখন মঞ্চ প্ৰদান কৰিছে সেই সময়ত কিন্তু এচাম দুষ্কৃতিকাৰীয়ে নাৰী জাতিৰ ওপৰত অতি গোপনে আক্রমন চলাইছে। সেয়ে সঘনাই আমাৰ সমাজত এক শ্ৰেণীৰ মানুহৰ হাতত নাৰী নির্যাতিত হোৱা প্ৰায়েই দেখা পাওঁ। সেই দুষ্কৃতিকাৰী ভুৱা প্ৰেমিক ৰূপত অথবা ভাল বন্ধু ৰূপত আমাৰ মাজলৈ আহিব পাৰে। কিন্তু আমি সেইসকলক চিনাক্ত কৰিবলৈ সমৰ্থ হ'ব লাগিব। সম্পর্ক গঢ়োতে আমি সুন্দৰ চেহেৰা অথবা ফটো চাই নহয়, প্রকৃত পৰিচয় চাব লাগিব। মই ভাবোঁ আমি সতী সাধনীৰ দেশৰ মহিলা ৷ আমাৰ তেজত বীৰ মূলা গাভৰুৰ ৰক্ত নিহিত হৈ আছে। আমাৰ সমাজৰ প্ৰতি গৰাকী নাৰীয়েই সমাজৰ এনে অপ শক্তিৰ বিৰুদ্ধে সাহসেৰে যুঁজ দিবলৈ সামৰ্থ ৷ তেওঁ কয় যে এই ক্ষেত্ৰত মহিলা আৰু কিশোৰীসকলক সজাগ কৰাৰ বাবে মহিলা মৰ্চাই জিলাই জিলাই সজাগতা সভা অনুষ্ঠিত কৰিব ৷ এই সজাগতা সভাৰ জৰিয়তে মহিলা আৰু কিশোৰীসকলৰ মাজত বাৰ্তা প্ৰেৰণ কৰা হ'ব যাতে যিকোনো ব্যক্তি এজনৰ প্ৰকৃত পৰিচয়, নাম,ঠিৰনা, ধৰ্ম আদি সঠিককৈ নজনাকৈ সম্বন্ধত গুচি নেযায় ৷ কাৰণ প্ৰেম হৈছে এটা স্বৰ্গীয় অনুভূতি ৷ গতিকে সেই প্ৰেমত পৰি পিছত নিজে সৰ্বস্বান্ত হৈ যোৱা পয্যায়লৈ যাতে নাযায় তেনে এটা পৰিৱেশ সৃষ্টি কৰা গঢ়ি তোলাৰ চেষ্টা কৰিম ৷ আনহাতে মহিলা মৰ্চাৰ আগন্তুক কৰ্মৰাজিৰ বিষয়ত সভানেত্ৰী গৰাকীয়ে কয়, সমাগত ৰাষ্ট্ৰীয় পোষণ মাহ উপলক্ষে মহিলা মৰ্চাৰ তৰফৰ পৰা ৰাজ্যৰ বিভিন্ন প্ৰান্তত আদর্শ অংগনবাড়ী কেন্দ্র নির্বাচিত কৰি মহিলাৰ স্বাস্থ্য সম্পৰ্কীয় বিষয় সন্দৰ্ভত সজাগতা সৃষ্টিৰ বাবে প্ৰচেষ্টা গ্ৰহণ কৰাৰ লগতে অংগনৱাড়ী কেন্দ্ৰত ঔষধি গুণসম্পন্ন গছপুলি ৰোপন, যোগাভ্যাসৰ জৰিয়তে স্বাস্থ্য ৰক্ষা সম্পর্কে সজাগতা সৃষ্টি আদি কাৰ্যসূচী হাতত লোবা হ’ব। 

একেদৰে ১৭ ছেপ্তেম্বৰত প্ৰধানমন্ত্ৰী নৰেন্দ্ৰী মোদী, ২৫ ছেপ্তেম্বৰত দীনদয়াল উপাধ্যায় আৰু ২ অক্টোৱৰত মহাত্মা গান্ধীৰ জন্ম দিনৰ লগত সংগতি ৰাখি মহিলা মৰ্চাই সমগ্র ৰাজ্যজুৰি ফল মূল বিতৰণ আৰু স্বচ্ছতামূলক কাৰ্যসূচী গ্ৰহণ কৰিব। আনহাতে নৱেম্বৰত মহিলা মৰ্চাৰ উদ্যোগত সমগ্ৰ ৰাজ্যজুৰি মামনি ৰয়ছম গোস্বামীৰ সোঁৱৰণত বক্তৃতা অনুষ্ঠান আয়োজন কৰিব বুলি সংবাদ মেলৰ জৰিয়তে ৰাজ্যিক মহিলা মৰ্চাৰ সভানেত্রী আঙুৰলতা ডেকাই জানিব দিছে। উল্লেখ্য যে কমনৱেলথ গেমছত স্বৰ্ণ পদক লাভ কৰি দেশ থকা ৰাজ্যলৈ গৌৰৱ কঢ়িয়াই অনা নয়নমণি শইকীয়াক আজি মুখ্যমন্ত্ৰীয়ে ৫০ লাখ টকাৰ চেক প্ৰদান কৰাৰ লগতে উপ আৰক্ষী অধীক্ষক পদত নিযুক্তি দিয়াত অসম চৰকাৰক ধন্যবাদ জ্ঞাপন কৰে ৷ লগতে নয়নমণি শইকীয়াকো শুভেচ্ছা জ্ঞাপন কৰে সভানেত্ৰীগৰাকীয়ে ৷ সংবাদ মেলত সভানেত্ৰীগৰাকীয়ে জানিবলৈ দিয়া মতে কায্যনিৰ্বাহক সভাত সাংগঠনিক দিশৰ ওপৰত আলোচনা কৰাৰ লগতে আগন্তুক দিনত মহিলা মৰ্চাৰ কৰণীয় কাম তথা মহিলা মৰ্চাক শক্তিশালী কৰাৰ ক্ষেত্ৰত বিভিন্ন নীতি নিৰ্দেশনা গ্ৰহণ কৰা হ'ব ৷ সেইদৰে কাইলৈৰ মূল কাৰ্যনিৰ্বাহক সভাত ৰাজ্যিক বিজেপিৰ সভাপতি ভৱেশ কলিতা, মন্ত্ৰী অজন্তা নেওগ, মন্ত্ৰী ৰঞ্জিত কুমাৰ দাস , মন্ত্ৰী নন্দিতা গাৰ্লোচা, কেন্দ্ৰীয় মন্ত্ৰী ৰামেশ্বৰ তেলী, বিধায়িকা সুনমহৰিপ্ৰিয়া আদি উপস্থিত থাকিব বুলিও সদৰি কৰে ৷ ৰাজ্যিক কায্যনিৰ্বাহক সভাৰ দ্বিতীয় দিনাৰ কায্যসূচী অনুসৰি কাইলৈ পুৱা ৮.৩০ বজাত দলীয় পতাকা উত্তোলন কৰিব মহিলা মৰ্চাৰ ৰাজ্যিক সভানেত্রী আঙুৰলতা ডেকাই ৷ ইয়াৰ পিছতে গছপুলি ৰোপন, ভাৰতমাতা, পণ্ডিত দীনদয়াল উপাধ্যায় আৰু ড০ শ্যামাপ্রসাদ মুখাৰ্জীদেৱৰ প্ৰতিচ্ছবিত বন্তি প্ৰজ্বলন আৰু শ্ৰদ্ধাঞ্জলি জ্ঞাপন কৰা হ'ব ৷ বৰগীত পৰিৱেশন কৰিব ৰাজ্যিক কোষাধক্ষ্য উপাসনা বৰাই ৷ পুৱা ৯ বজাত জিলা মৰ্চাৰ সভানেত্ৰীৰ আদৰণি ভাষণৰ পিছতে ৰাজ্যিক সভানেত্ৰী আঙুৰলতাই ডেকাই প্ৰাস্তাৱিক ভাষণ আগবঢ়াব ৷ ইয়াৰ পিছতে বিজেপিৰ ৰাজ্যিক সাংগঠনিক সাধাৰণ সম্পাদক ফনীন্দ্ৰ নাথ শৰ্মাই ভাষণ দিব ৷ আনহাতে “ভাৰতীয় জনতা পাৰ্টিৰ নীতি আৰু আদৰ্শ”শীৰ্ষক বিষয়ৰ বক্তৃতা প্ৰতিযোগিতাত বক্তব্য ৰাখিব বিজেপিৰ ৰাজ্যিক সাধাৰণ সম্পাদক পুলক গোঁহাইয়ে ৷ ৰাজনৈতিক প্ৰস্তাৱ পাঠ কৰিব  ৰাজ্যিক সম্পাদিকা মধুষ্মিতা ডেকা হাজৰিকাই ৷ কায্যনিৰ্বাহক সভাত বিজেপিৰ সাংগঠনিক জিলাসমূহৰ পৰা ২৮৫ গৰাকীৰো অধিক মহিলা প্ৰতিনিধিয়ে অংশ গ্ৰহণ কৰিব ৷ এইদৰে বিভিন্ন কাৰ্যসূচী থাকিব ৷ সংবাদ মেলত অন্যান্য বিষয়ববীয়াসকলো উপস্থিত আছিল ৷ ইপিনে পুৱাৰ ভাগত মন্ত্ৰী ৰঞ্জিত কুমাৰ দাসে মহিলা মৰ্চাৰ কায্যনিৰ্বাহক সভাৰ প্ৰস্তুতি সন্দৰ্ভত বুজ লয় ৷ 🔯