🔯কমতাপুৰৰ বিকাশ অবিহনে অসমৰ উন্নয়ন নহয়-কেএচিৰ প্ৰতিষ্ঠা দিৱসত মন্ত্ৰী ৰঞ্জিত দাস🔯

🔯কমতাপুৰৰ বিকাশ অবিহনে অসমৰ উন্নয়ন নহয়-কেএচিৰ প্ৰতিষ্ঠা দিৱসত মন্ত্ৰী ৰঞ্জিত দাস🔯

📝বঙাইগাঁওঃ  ৩ ছেপ্তেম্বৰঃ গোৱালপাৰা, বঙাইগাঁও, ধুবুৰী জিলাৰ অধিকাংশ এলেকা সামৰি গঠন হোৱা কমতাপুৰ স্বায়ত্ত্বশাসিত পৰিষদৰ বিকাশ নহলে অসমৰ বিকাশ নহয়- এই মন্তব্য পঞ্চায়ত আৰু গ্ৰামোন্নয়ন তথা বঙাইগাঁও জিলাৰ অভিভাৱক মন্ত্ৰী ৰঞ্জিত কুমাৰ দাসৰ ৷ আজি কমতাপুৰ স্বায়ত্ত্বশাসিত পৰিষদৰ দ্বিতীয় সংখ্যক প্ৰতিষ্ঠা দিৱসত উপস্থিত থকাৰ পাচত সাংবাদিকৰ আগত মন্ত্ৰী দাসে স্বায়ত্ত্বশাসিত পৰিষদ এলেকাৰ উন্নয়নৰ ক্ষেত্ৰত নিজৰ সদ্দিচ্ছাৰ কথা উল্লেখ কৰাৰ লগতে এইক্ষেত্ৰত মুখ্যমন্ত্ৰীও স্বায়ত্ত্বশাসিত পৰিষদৰ উন্নয়নত মনোনিৱেশ কৰাৰ কথা উল্লেখ কৰে ৷ তদুপৰি নৰেন্দ্ৰ মোডীৰ সবকা সাথ  সবকা প্ৰয়াস নীতিৰে সকলোকে আহ্বান জনোৱাৰ লগতে স্বায়ত্ত্বশাসিত পৰিষদ গঠন হোৱাৰ ক্ষেত্ৰত প্ৰাক্তন মুখ্যমন্ত্ৰী সৰ্বানন্দ সোণোৱাল, তেতিয়াৰ বিত্তমন্ত্ৰী ড° হিমন্তবিশ্ব শৰ্মাৰ অৰিহণাৰ কথা উল্লেখকৰি প্ৰতিষ্ঠা দিৱসৰ শুভেচ্ছা জনায় ৷

আনপিনে যোগীঘোপাৰ মাদ্ৰাছা উচ্ছেদক লৈ সৃষ্টি হোৱা প্ৰতিক্ৰিয়া সন্দৰ্ভত সাংবাদিকে জানিব বিচৰাত বিষয়টোৰ পৰা ফালৰি কাটে মন্ত্ৰী দাসে ৷ উল্লেখ্য যে, স্বায়ত্ত্বশাসিত পৰিষদখনৰ দ্বিতীয় সংখ্যক প্ৰতিষ্ঠা দিৱস উদ্‌যাপনৰ দিনটোত অভয়াপুৰীৰ নিকটবৰ্ত্তী উত্তৰ শালমাৰাস্থিত সচিবালয় প্ৰাংগনত কোচ ৰাজবংশী জনগোষ্ঠীৰ বিভিন্ন অঞ্চলৰ পৰা অহা লোকসকল সমবেত হয় ৷ জাতীয় সাজপাৰ পৰিধানেৰে এক উৎসৱমুখৰ পৰিবেশৰ মাজত পুৱা বৃক্ষৰোপণ কাৰ্যসূচীৰ শুভাৰম্ভ কৰে মন্ত্ৰী ৰঞ্জিত কুমাৰ দাস, পৰিষদৰ মুখ্য কাৰ্যবাহী পাৰিষদ গোকুল বৰ্মনে ৷ তাৰ পাচতে ভাগৱত পাঠ, সাংস্কৃতিক অনুষ্ঠান পৰিবেশন কৰা হয় ৷ ইপিনে কালি সন্ধিয়া বিত্তমন্ত্ৰী অজন্তা নেওগে পৰিষদৰ সচিবালয়ত উপস্থিত হৈ খা-খবৰ লয় ৷🔯