🔯কোচ ৰাজবংশী মান্য ভাষাৰ ওপৰত ব্যাকৰণ প্ৰস্তুত কৰিব জাতীয় পৰিষদে🔯

🔯কোচ ৰাজবংশী মান্য ভাষাৰ ওপৰত ব্যাকৰণ প্ৰস্তুত কৰিব জাতীয় পৰিষদে🔯 

🔯১৮ ছেপ্টেম্বত কোচ ৰাজবংশী সাহিত্য পৰিষদ গঠনৰ সিদ্ধান্ত🔯

📝বঙাইগাঁওঃ৪ ছেপ্টেম্বৰঃ  কোচ ৰাজবংশী জনগোষ্ঠীৰ ভাষা, সাহিত্য, সংস্কৃতি আদি বিভিন্ন বিষয় আলোচনা কৰাৰ বাবে দেওবাৰে চিৰাং জিলাৰ বিজনী চহৰৰ বুঢ়ীঠাকুৰাণী মন্দিৰৰ সভাকক্ষত কোচ ৰাজবংশী জাতীয় পৰিষদৰ সভাপতি বিমল কুমাৰ বৰ্মনৰ সভাপতিত্বত কোচ ৰাজবংশী জনগোষ্ঠীৰ শিক্ষাবিদ, সাহিত্যিক আৰু সমাজ সচেতন ব্যক্তিৰ উপস্থিতিত এখন বৌদ্ধিক সভা অনুষ্ঠিত হয়। বৌদ্ধিক সভাত কেইবাটাও প্ৰস্তাৱ গ্ৰহণ কৰা হয় ৷ সেই অনুসৰি সভাই গৃহীত কৰা প্ৰস্তাৱ সমূহ ভিতৰত অন্যতম প্ৰস্তাৱ হিচাপে "কোচ ৰাজবংশী" মান্য ভাষাৰ ওপৰত কোচ ৰাজবংশী সাহিত্য সভাৰ প্ৰতিষ্ঠাপক সভাপতি প্ৰয়াত অৰুণ কুমাৰ ৰায়, বিশিষ্ট শিক্ষাবিদ তথা গৱেষক প্ৰয়াত ৰাজেন্দ্ৰ নাৰায়ণ দেৱ আৰু বিশিষ্ট লেখক শৈলেন্দ্ৰ নাৰায়ণ চৌধুৰীয়ে কোচ ৰাজবংশী ভাষাত প্ৰণয়ন কৰি যোৱা অভিধান (শব্দকোষ) তিনিখনক স্বীকৃতি তথা মান্যতা প্ৰদান কৰাৰ লগতে কোচ ৰাজবংশী মান্য ভাষাৰ ওপৰত ব্যাকৰণ প্ৰস্তুত কৰিবলৈ অৱসৰপ্ৰাপ্ত কৃতী শিক্ষক ৰমলা ৰায় সৰকাৰক অধ্যক্ষ হিচাবে আৰু জ্যোৎস্না প্ৰিয়া পাঠক, শকুন্তলা চৌধুৰী, মনুচাঁদ সিংহ, ড° ৰানু ৰায়, যমুনা ৰায়ক সদস্য হিচাবে লৈ এখন ছয়জনীয়া ব্যাকৰণ প্ৰণয়ন কমিটি গঠন কৰে । সেইদৰে প্ৰাথমিক বিদ্যালয়ত শিক্ষাৰ উপযোগী হোৱাকৈ কোচ ৰাজবংশী মান্যভাষাৰ ওপৰত পাঠ্যপুথি প্ৰণয়ণ কৰাৰ বাবে উপেন বৰুৱা, চিত্তৰঞ্জন ৰায়ক অধ্যক্ষ হিচাবে আৰু মিনতি ৰায়, যুধিষ্ঠিৰ পাঠক, মণি সাগৰিকা শইকীয়া, বিকাশ ৰায়ক সদস্য হিচাবে লৈ এখন ছয় জনীয়া আহ্বায়ক কমিটি গঠন কৰে। এই কমিটিখনে কোচ ৰাজবংশী জনগোষ্ঠীৰ বিভিন্ন উৎসৱ-পাৰ্বণ, বিশিষ্ট লোকৰ জীৱনী, সাধুকথা, ফোঁকৰা যোজনা, কবিতা, গল্প, প্ৰৱন্ধ আদি সংগ্ৰহ কৰি ছেপ্টেম্বৰ মাহৰ ভিতৰতে ছপা কৰিব। বৌদ্ধিক সভাই কোচ ৰাজবংশী জনগোষ্ঠীৰ ভাষা, কৃষ্টি, সংস্কৃতিৰ উন্নয়ন, বিকাশ, অধ্যয়ন আৰু গৱেষণা কৰাৰ স্বাৰ্থত অহা ১৮ ছেপ্টেম্বত বঙাইগাঁও নতুবা অভয়াপুৰী চহৰত কোচ ৰাজবংশী সাহিত্য পৰিষদ গঠন কৰাৰ সিদ্ধান্ত গ্ৰহণ কৰে ৷ কোচ ৰাজবংশী সাহিত্য পৰিষদ গঠন কৰাৰ বাবে নৃপেন ৰাযক মুখ্য আহ্বায়ক, উপেন বৰুৱা, চিত্তৰঞ্জন ৰায়, যুধিষ্ঠিৰ পাঠক, মণি সাগৰিকা শইকীয়া আৰু উমেশ সৰকাৰক লৈ এখন ছয়জনীয়া আহ্বায়ক কমিটি গঠন কৰি দিয়ে ৷ সেই দৰে প্ৰাথমিক বিদ্যালয়ৰ "ক" শ্ৰেণীৰ পৰা "পঞ্চম" শ্ৰেণীলৈ  অসম চৰকাৰে ৰাষ্ট্ৰীয় শিক্ষানীতিৰ আধাৰত অসমৰ সকলো জাতি-জনগোষ্ঠীৰ মাতৃ ভাষাৰ ওপৰত শিক্ষাদানৰ সিদ্ধান্তক বৌদ্ধিক সমাজে আদৰণি জনাই প্ৰাথমিক বিদ্যালয়ত কোচ ৰাজবংশী ভাষাত শিক্ষকতা কৰিব পৰাকৈ উপযুক্ত শিক্ষক- শিক্ষয়িত্ৰী গঢ়ি তুলিবলৈ চলিত শিক্ষাবৰ্ষৰ পৰাই বিজনী চহৰস্থ নৱৰত্ন একাদেমী, মাণিকপুৰ, অভয়াপুৰী, বইটামাৰী, চাপৰ, বঙাইগাঁও, বাসুগাওঁ, কোকৰাঝাৰ, শক্তিআশ্ৰম আৰু বিলাসীপাৰা আদি ঠাইত কোচ ৰাজবংশী ভাষাৰ ওপৰত চাৰ্টিফিকেট পাঠ্যক্ৰম আৰাম্ভ কৰাৰ বাবে কোচ ৰাজবংশী জাতীয় পৰিষদে যি সিদ্ধান্ত লৈছে তাক সমৰ্থন কৰাৰ লগতে পূৰ্ণ সহায় সহযোগিতা আগবঢ়াব বুলি দৃঢ়তাৰে মতপোষণ কৰে বুলি কোচ ৰাজবংশী জাতীয় পৰিষদৰ যুতীয়া সম্পাদক ভূপেন ৰায় আৰু জগন্নাথ ৰায়ে এক প্ৰেছ বিবৃতিত উল্লেখ কৰিছে ৷🔯