🔯বঙাইগাঁৱত অসম বিধানসভাৰ স্থানীয় পুঁজি হিচাপ নিৰীক্ষণ কমিটী🔯

🔯বঙাইগাঁৱত অসম বিধানসভাৰ স্থানীয় পুঁজি হিচাপ নিৰীক্ষণ কমিটী🔯

📝বঙাইগাঁও,২৯ অক্টোবৰ : বঙাইগাঁও জিলাত শনিবাৰে অসম বিধানসভাৰ স্থানীয় পূঁজি হিচাপ নিৰীক্ষণ (Local Fund Accounts Committee) কমিটী উপস্থিত হয় ৷ মৰাণ বিধানসভা সমষ্টিৰ বিধায়ক চক্ৰধৰ গগৈৰ অধ্যক্ষতাত অহা এই তিনিজনীয়া কমিটীৰ আন দুজন সদস্য হ'ল গোৱালপাৰা পূৱ বিধানসভা সমষ্টিৰ বিধায়ক আব্দুল কালাম ৰচিদ আলম আৰু জলেশ্বৰ বিধানসভা সমষ্টিৰ বিধায়ক আফতাব উদ্দিন মোল্লা। এই তিনিজনীয়া কমিটীখনে শনিবাৰে মাণিকপুৰ খণ্ড উন্নয়ন বিষয়াৰ কাৰ্যালয়ত উপস্থিত হৈ চতুৰ্দশ বিত্তীয় আয়োগ আৰু পঞ্চদশ বিত্তীয় আয়োগৰ অধীনত কৰা উন্নয়নমূলক কাম-কাজ পৰিদৰ্শন কৰে। তেওঁলোকে উন্নয়ন খণ্ডটোৰ অধীনত প্ৰধানমন্ত্ৰী আৱাস যোজনা(গ্ৰামীণ)ৰ জৰিয়তে নিৰ্মাণ কৰা কেবাটাও গৃহ পৰিদৰ্শন কৰাৰ উপৰি কাৰ্যালয়ৰ কাম-কাজ আৰু নথি-পত্ৰ চায়। ইয়াৰ পিছতেই তেওঁলোকে বঙাইগাঁও আৱৰ্ত ভৱনত উপায়ুক্ত নবদ্বীপ পাঠকৰ উপস্থিতিত জিলা উন্নয়ন আয়ুক্ত ভাস্কৰ দাস, জিলা পৰিষদৰ মুখ্য কাৰ্যবাহী বিষয়া নাদীৰা জেচমিন,পঞ্চায়ত আৰু গ্ৰামোন্নয়ন বিভাগৰ আন আন বিষয়ববীয়া, বঙাইগাঁও পৌৰসভা আৰু অভয়াপুৰী পৌৰসভাৰ কাৰ্যবাহী বিষয়া ক্ৰমে ভাৰ্গৱ কলিতা আৰু তন্ময় ঘোষৰ সৈতে এক পৰ্যালোচনা সভাত মিলিত হয়।

সভাত কমিটীখনৰ অধ্যক্ষ চক্ৰধৰ গগৈয়ে কয় যে প্ৰধানমন্ত্ৰী আৱাস যোজনাৰ গৃহসমূহ একে আৰ্হিৰ হ'ব লাগে ৷ অৰ্থাৎ ঘৰবোৰত ল'গ' থাকিব লাগে, হিতাধিকাৰীজনৰ নাম লিখা থাকিব লাগে, ৰং একে হ'ব লাগে, যাতে ঘৰবোৰ প্ৰধানমন্ত্ৰী আৱাস যোজনাৰ অধীনত প্ৰদত্ত বুলি দেখিলেই গম পোৱা যায়। তেওঁ আৰু কয় যে চতুৰ্দশ বিত্তীয় আয়োগ আৰু পঞ্চদশ বিত্তীয় আয়োগৰ অধীনত যিবিলাক কাম কৰি থকা হৈছে সেইবোৰ সময়মতে সম্পূৰ্ণ কৰিব লাগে আৰু নিয়ম অনুসৰি কামবোৰ কৰিব লাগে। আনহাতে কমিটীখনে বঙাইগাঁও পৌৰসভা আৰু অভয়াপুৰী পৌৰসভাৰ কাৰ্যবাহী বিষয়াৰ পৰা পৌৰসভা দুখনৰ আয়-ব্যয় আৰু কিমান সংখ্যক কৰ্মচাৰীয়ে কাম কৰি আছে তাৰ বুজ লয়। কমিটীখনৰ অধ্যক্ষ চক্ৰধৰ গগৈয়ে কয় যে পৌৰসভা দুখনে যাতে আয়-ব্যয়ৰ ভাৰসাম্য ৰক্ষা কৰি চলে, অৰ্থাৎ ঘাটি হিচাপ যেন নহয়। জিলা একোখনৰ কাম-কাজৰ জৰিয়তে ৰাজ্য চৰকাৰে উন্নয়নমূলক কামবিলাক কৰি থাকে,গতিকে জিলাখনৰ কাম-কাজ যাতে সময়মতে কৰি ৰাজ্যখনৰ উন্নয়নত সহযোগিতা আগবঢ়ায় ৷  উপায়ুক্ত নবদ্বীপ পাঠকে বিধায়কৰ এই কমিটীখনক কয় যে জিলাখনত পঞ্চায়ত আৰু গ্ৰামোন্নয়ন বিভাগ আৰু নগৰ আৰু গাঁও পৰিকল্পনা বিভাগৰ বাকী থকা কামখিনি নিৰ্দিষ্ট সময়সীমাৰ ভিতৰতে সম্পন্ন কৰাৰ ব্যৱস্থা কৰা হ'ব ৷ ইয়াৰ উপৰি বঙাইগাঁও আৰু অভয়াপুৰী পৌৰসভাৰ পেলনীয়া জাৱৰ-জথৰখিনি নিস্কাশন কৰি সাৰ হিচাপে বৰ্তমানে বীৰঝৰা চাহ বাগিছাত ব্যৱহাৰ কৰি থকাৰ বাহিৰে কৃষি কৰ্মত ব্যৱহাৰ কৰিবলৈ অধ্যক্ষ চক্ৰধৰ গগৈয়ে কাৰ্যবাহী বিষয়া দুজনক পৰামৰ্শ দিয়ে৷ সভাত পঞ্চায়ত আৰু গ্ৰামোন্নয়ন বিভাগৰ যুটীয়া সচিব, উপ-সচিব আৰু সহকাৰী আয়ুক্ত উপস্থিত থাকে।🔯