🔯বঙাইগাঁও শিশু বিজ্ঞান সমাৰোহত উদ্ভাৱনীমূলক প্ৰকল্প প্ৰতিযোগিতা🔯

🔯বঙাইগাঁও শিশু বিজ্ঞান সমাৰোহত উদ্ভাৱনীমূলক প্ৰকল্প প্ৰতিযোগিতা🔯

🔯বঙাইগাঁওঃ ৬ নবেম্বৰঃ ৩০ সংখ্যক ৰাষ্ট্ৰীয় শিশু বিজ্ঞান সমাৰোহৰ অংশ হিচাপে আজি জিলা পৰ্যায়ত বঙাইগাঁওস্থিত বীৰঝৰা মহাবিদ্যালয়ত অনুষ্ঠিত শিশু বিজ্ঞান সমাৰোহত উদ্ভাৱনীমূলক প্ৰকল্প প্ৰতিযোগিতা এখনিৰ আয়োজন কৰা হয়।এই প্ৰকল্প প্ৰতিযোগিতাৰ উদ্বোধনী অনুষ্ঠানত সভাপতিত্ব কৰে অসম বিজ্ঞান সমিতিৰ বঙাইগাঁও শাখাৰ সভাপতি শৈলেন্দ্ৰ প্ৰসাদ শৰ্মাই। প্ৰকল্প প্ৰতিযোগিতাখনিৰ আনুষ্ঠানিকভাৱে শুভ উদ্বোধন কৰে বীৰঝৰা মহাবিদ্যালয়ৰ অধ্যক্ষা ড: হৈময়ন্তী বালা ৰায় বৰ্মনে। শৈক্ষিক সমন্বয়ক মৃণাল ভাগৱতীয়ে আঁত ধৰা উদ্বোধনী অনুষ্ঠানত বঙাইগাঁও জিলা সমগ্ৰ শিক্ষাৰ প্ৰকল্প বিষয়া(টি টি) কীৰ্তি গোস্বামীয়ে অতিথি হিচাপে উপস্থিত থাকি বক্তব্য ৰাখে। আনহাতে সমাৰোহৰ শৈক্ষিক দিশৰ তথ্য সামৰি বক্তব্য ৰাখে বঙাইগাঁও জিলা শিশু বিজ্ঞান সমাৰোহ উদযাপন সমিতিৰ শৈক্ষিক কমিটীৰ সভাপতি বীৰব্ৰত দাস চৌধুৰীয়ে ৷ উল্লেখ্য যে ৩০  সংখ্যক শিশু বিজ্ঞান সমাৰোহৰ মূল বিষয়বস্তু হৈছে "সুস্বাস্থ্য আৰু সৰ্বাংগীন কুশলতাৰ বাবে পৰিস্থিতিতন্ত্ৰক বুজো আহা"৷  

বঙাইগাঁও জিলা শাখাত শিশু বিজ্ঞান সমাৰোহত ৪৩ খন বিদ্যালয়ৰ ১১৫ গৰাকী ছাত্ৰ-ছাত্ৰীয়ে মুঠ ৫৮ টা প্ৰকল্প উপস্থাপন কৰে। ইয়াৰে ভিতৰত বয়স হিচাপে দুটা পৰ্যায়ত ছাত্ৰ-ছাত্ৰীসকলৰ প্ৰকল্পসমূহ মূল্যায়ণ কৰা হয় ৷ প্ৰথমটো হ'ল ১০ বছৰ বয়সৰ পৰা ১৪ বছৰ বয়সৰ (৩১গৰাকী ছাত্ৰ-ছাত্ৰী) এটা পৰ্যায় আৰু ১৪ বছৰ বয়সৰ পৰা ১৭বছৰ বয়সৰ (২৭গৰাকী ছাত্ৰ-ছাত্ৰী) আনটো পৰ্যায়ত প্ৰকল্পসমূহ বিশ্লেষণ কৰা হয়। ইয়াৰ ভিতৰত ৬৫ গৰাকী ছাত্ৰ আৰু ৫০ গৰাকী ছাত্ৰী আছিল আৰু নগৰ এলেকাৰ অধীনৰ ১৯ টা প্ৰকল্প আৰু গ্ৰাম্য এলেকাৰ ৩৯ টা প্ৰকল্প উপস্থাপন কৰা ৪৩ গৰাকী গাইড শিক্ষকেও আজি শিশু বিজ্ঞান সমাৰোহত অংশগ্ৰহণ কৰে। বীৰঝৰা মহাবিদ্যালয়ৰ ৯ গৰাকী সহযোগী অধ্যাপক ড:দিলীপ কুমাৰ ৰয়, অনুপমা সৰকাৰ, ড: ৰেশ্মী ভট্টাচাৰ্য্য, বিচিত্ৰা নাৰ্জাৰী,  ড: ভৱেশ কুমাৰ নাথ, তৃষ্ণা বৰুৱা, সঞ্জীৱ কুমাৰ বাগলাৰী, ড: কৌশিক দাস আৰু প্ৰাঞ্জনা নিয়োগীয়ে প্ৰকল্পসমূহ মূল্যায়ণ কৰে ৷ উক্ত প্ৰকল্পসমূহ মূল্যায়ণ কৰাৰ পিছত তাৰে ভিতৰত শ্ৰেষ্ঠ ৬ টা প্ৰকল্প ৰাজ্যিক পৰ্যায়লৈ পঠোৱা হ'ব।🔯