🔯বঙাইগাঁৱত লাচিত বৰফুকনক শ্ৰদ্ধাঞ্জলি আৰু বিভিন্ন অনুষ্ঠান🔯

🔯বঙাইগাঁৱত লাচিত বৰফুকনক শ্ৰদ্ধাঞ্জলি আৰু বিভিন্ন অনুষ্ঠান🔯

📝বঙাইগাঁওঃ ২৪ নবেম্বৰঃ বঙাইগাঁও জিলা প্ৰশাসনৰ উদ্যোগত সপ্তাহজোৰা কাৰ্যসূচীৰে চলি থকা বীৰ সেনানায়ক লাচিত বৰফুকনৰ ৪০০ সংখ্যক জয়ন্তী উপলক্ষ্যে বৃহস্পতিবাৰে পুৱা বঙাইগাঁও পৌৰসভা কাৰ্যালয়ৰ সন্মুখত বীৰ লাচিত বৰফুকনৰ প্ৰতিচ্ছৱিত শ্ৰদ্ধাঞ্জলি জনোৱা হয়। অনুষ্ঠানৰ আৰম্ভণিতে বঙাইগাঁও পৌৰসভাৰ সভাপতি সুবোধ চন্দ্ৰ দাসে পতাকা উত্তোলনেৰে কাৰ্যসূচীৰ শুভাৰম্ভ কৰে ৷ ইয়াৰ পিচতে বীৰ লাচিতৰ প্ৰতিচ্ছবিত বন্তি প্ৰজ্বলন কৰি শ্ৰদ্ধাঞ্জলি জনোৱা হয় ৷ পৌৰপতি আৰু কাৰ্যবাহী বিষয়া ভাৰ্গৱ কলিতাই শ্ৰদ্ধাঞ্জলি অনুষ্ঠান মুকলি কৰে ৷ ইয়াৰ পিচতে পৌৰসভাৰ কাৰ্যালয় ভৱনটো বীৰ লাচিতৰ নামেৰে নামাংকিত কৰা ফলক উন্মোচন কৰে পৌৰপতিগৰাকীয়ে ৷ দিনজোৰা কাৰ্যসূচীৰে উদযাপন কৰা উদযাপন কৰা বীৰ লাচিত বৰফুকনৰ চাৰিশ বছৰীয়া জয়ন্তীৰ লগত সংগতি ৰাখি পৌৰসভাৰ নিৰ্বাচিত প্ৰতিনিধিসকলৰ মাজত মহাবীৰগৰাকীৰ জীৱন পৰিক্ৰমাৰ ওপৰত বক্তৃতা প্ৰতিযোগিতা, চিলাৰায় দৈনিক বজাৰৰ ওপৰ মহলাত বীৰ লাচিত বুলনি বাগিছা উদ্বোধন আৰু বিয়লি মহাবীৰ লাচিত বৰফুকনৰ জীৱন পৰিক্ৰমাৰ ওপৰত আলোচনা চক্ৰ অনুষ্ঠিত হয় ৷ পৌৰপতি সুবোধ চন্দ্ৰ দাসে আতধৰা আলোচনা চক্ৰত অভয়াপুৰী মহাবিদ্যালয়ৰ প্ৰাক্তন অধ্যক্ষ ডঃ শশধৰ অধিকাৰী আৰু বঙাইগাঁও মহাবিদ্যালয়ৰ অধ্যাপিকা ডঃ ৰূপাঞ্জলি দেৱীয়ে বক্তব্য ৰাখে ৷

ইয়াৰ পিচতে মাটিৰ চাকিৰ আলোকসজ্জা আৰু আতচবাজী প্ৰদৰ্শন কৰা হয় ৷ ইয়াৰ উপৰিও পুৱাৰ ভাগত জিলা প্ৰশাসনৰ উদ্যোগত বাৰ্কিত জ'নত কেনভাছ পেইণ্টিং অনুষ্ঠিত হয় আৰু বঙাইগাঁও আৰ্টিষ্ট গীল্ডৰ শিল্পীয়ে ইয়াত অংশগ্ৰহণ কৰে। উপায়ুক্ত নবদ্বীপ পাঠকে এই অনুষ্ঠানত উপস্থিত থাকে।বিয়লিৰ ভাগত বঙাইগাঁও জিলা পুথিভঁৰাল প্ৰেক্ষাগৃহত লাচিত দিৱস উপলক্ষ্যে আয়োজিত বিভিন্ন প্ৰতিযোগিতাৰ বঁটা বিতৰণ আৰু আমন্ত্ৰিত বিশিষ্ট ব্যক্তিৰ ভাষণ আদি কাৰ্যসূচী ৰূপায়ণ কৰা হয়।স্থানীয় বিধায়ক ফণীভূষণ চৌধুৰী আৰু মুখ্য অতিথি হিচাপে আমন্ত্ৰণ কৰি অনা প্ৰাক্তন ভাৰতীয় প্ৰশাসনিক বিষয়া সঞ্জীৱ গোঁহাই বৰুৱাই লাচিত বৰফুকনৰ জীৱন সম্পৰ্কত ভাষণ দিয়ে। বিধায়ক ফণীভূষণ চৌধুৰীয়ে ভাষণ প্ৰসংগত কয় যে পলমকৈ হ'লেও বীৰ লাচিত বৰফুকনৰ জীৱন পৰিক্ৰমাৰ দেশজুৰি চৰ্চা হৈছে সেয়া অসমবাসীৰ বাবে গৌৰৱৰ বিষয়। লাচিত বৰফুকন ইমান দিনে অসমৰ মাজতে চৰ্চিত আছিল।আজি চৰকাৰে নতুন দিল্লীত বিজ্ঞান ভৱনত ৪০০সংখ্যক লাচিত জয়ন্তীৰ কেন্দ্ৰীয়  অনুষ্ঠান পাতি দেশজুৰি বীৰ যোদ্ধাজনৰ বহুল চৰ্চা কৰিছে। আজি সৰুৰ পৰা বুঢ়ালৈকে,ছাত্ৰ-ছাত্ৰীৰ পৰা শিক্ষকলৈ লাচিত বৰফুকনৰ জীৱন সম্পৰ্কে লিখিবলৈ অধ্যয়ন কৰিবলৈ উদ্বুদ্ধ হৈছে। বহুজনে লাচিত বৰফুকনৰ জীৱন সম্পৰ্কীয় গীত গাইছে,গীত বজাইছে৷ লাচিত বৰফুকনৰ ৪০০ সংখ্যক জয়ন্তী হিচাপে অনুষ্ঠিত কৰা ভলীবল, ফুটবল, ধনুৰ্বিদ্যা খেল, ৰচী টনা খেল, টেকেলি ভঙা প্ৰতিযোগিতা, কুইজ প্ৰতিযোগিতা, দেশপ্ৰেমমূলক সংগীত প্ৰতিযোগিতা আদিৰ বঁটাসমূহ জিলা পুথিভঁৰাল প্ৰেক্ষাগৃহত অনুষ্ঠিত অনুষ্ঠানত বিতৰণ কৰা হয় ৷ 

বঁটা বিতৰণ অনুষ্ঠানৰ পূৰ্বে স্থানীয় বিধায়ক ফণীভূষণ চৌধুৰীয়ে উপায়ুক্ত নবদ্বীপ পাঠকৰ উপস্থিতিত জিলা পুথি ভঁৰাল প্ৰাংগণত মহাবীৰ লাচিত বৰফুনৰ এটি প্ৰতিমূৰ্তি স্থাপনৰ শিলান্যাস কৰে ৷  সন্ধিয়া বাৰ্কিং জ'নত বিধায়ক ফণীভূষণে বীৰ লাচিতৰ প্ৰতিচ্ছবিৰ সন্মুখত বন্তি প্ৰজ্বলন কৰি শ্ৰদ্ধাঞ্জলি জ্ঞাপন কৰাৰ লগতে চাৰিশ মাটিৰ চাকিৰ আলোকসজ্জাৰ এটি চাকি প্ৰজ্বলন কৰি শুভাৰম্ভ কৰে ৷ একেদৰে সন্ধিয়া পৌৰসভা কাৰ্যালয়ৰ সন্মুখত পৌৰসভাৰ উদ্যোগত অনুষ্ঠিত হয় সাংস্কৃতিক অনুষ্ঠান ৷ সাংস্কৃতিক অনুষ্ঠানত মহিলাৰ নাগাৰা নাম, পুৰুষৰ বীৰ  নাম ( থিয় নাম) ,ওজাপালি ,ঝুমুৰ নৃত্য, দেশপ্ৰেম মূলক গীত আদি পৰিৱেশিত হয় ৷ আনহাতে বিয়লি বীৰঝৰা উচ্চতৰ মাধ্যমিক বিদ্যালয় খেল পথাৰত ফুটবল খেল অনুষ্ঠিত কৰা হয় ৷উ ল্লেখ্য যে বুধবাৰে  জিলা পুথিভঁৰাল প্ৰেক্ষাগৃহত সাত ভনী নৃত্য, মুকাভিনয়, বাণ থিয়েটাৰৰ নাটক আদি অনুষ্ঠিত হৈছিল।কাইলৈ দিল্লীৰ বিজ্ঞান ভৱনত অনুষ্ঠিত পোনপটীয়া সম্প্ৰচাৰ প্ৰদৰ্শন কৰা হ'ব🔯