🔯প্রাক্তন বিধায়ক ৰবিন বনিক্যৰ বিয়োগত মন্ত্ৰী ৰণজিৎ কুমাৰ দাসৰ শোক প্রকাশ🔯

🔯প্রাক্তন বিধায়ক ৰবিন বনিক্যৰ বিয়োগত মন্ত্ৰী ৰণজিৎ কুমাৰ দাসৰ শোক প্রকাশ🔯

📝বঙাইগাঁওঃ ১১ নৱেম্বৰঃ বঙাইগাঁও জিলাৰ দক্ষিণ অভয়াপুৰী বিধানসভা সমষ্টিৰ প্ৰাক্তন অগপ বিধায়ক ৰবিন বনিক্যৰ পৰলোকপ্ৰাপ্তিত পঞ্চায়ত আৰু গ্ৰামোন্নয়ন, আইন আৰু ন্যায়, খাদ্য, অসামৰিক যোগান আৰু গ্রাহক পৰিক্ৰমা তথা সাধাৰণ প্ৰশাসন বিভাগৰ মন্ত্ৰী ৰণজিৎ কুমাৰ দাসে গভীৰ শোক প্রকাশ কৰিছে। এক শোক বার্তাত মন্ত্ৰী দাসে কয় যে, জীৱনকালত একান্ত নিষ্ঠা, ঐকান্তিকতা আৰু দায়বদ্ধতাৰে প্ৰাক্তন বিধায়ক, বিশিষ্ট সমাজসেৱক, সংগঠক ৰবিন বনিক্যই আমাৰ সমাজ-জীৱনলৈ যি অনবদ্য অৱদান আগবঢ়াই গ'ল সেয়া সদায়ে স্মৰণীয় হৈ ৰ’ব। দুটা কাৰ্যকালৰ বাবে বিধায়ক হিচাপে কার্যনির্বাহ কৰা প্ৰয়াত বনিক্যই সমাজত গণতান্ত্ৰিক প্ৰমূল্য অক্ষুণ্ণ ৰক্ষাত গুৰুত্ব দিছিল আৰু সদায়ে জনসাধাৰণৰ হিতৰ হকে কাম কৰিছিল। তেখেত জনসাধাৰণৰ এগৰাকী প্রিয় নেতা আছিল ৷ এগৰাকী সুৰকাৰ, গীতিকাৰ, নাট্যকাৰ, নাট পৰিচালক তথা অভিনেতা হিচাপেও প্ৰয়াত বনিক্যৰ এক সুকীয়া সুনাম আছিল। মন্ত্ৰী দাসে প্ৰাক্তন বিধায়কগৰাকীৰ সৈতে থকা তেখেতৰ দীৰ্ঘদিনীয়া সু-সম্পৰ্কৰ কথা গভীৰ শ্রদ্ধা সহকাৰে স্মৰণ কৰে। ভাৰত চৰকাৰৰ তথ্য আৰু সম্প্ৰচাৰ বিভাগৰ বিষয়া হিচাপে কাৰ্যনির্বাহ কৰাৰ সময়ৰ পৰাই প্ৰাক্তন বিধায়ক গৰাকীৰ সৈতে ঘনিষ্ঠ সম্পর্ক গঢ়ি উঠিছিল আৰু তেখেতৰ পৰা বিভিন্ন সময়ত লাভ কৰা দিহা-পৰামৰ্শৰ দ্বাৰা মন্ত্ৰী দাসে উপকৃত হৈছিল বুলি কয়। তেখেতৰ মৃত্যু ৰাজ্যখনৰ বাবে এক অপূৰণীয় ক্ষতি বুলি মন্ত্ৰী দাসে মন্তব্য কৰে। মন্ত্রী দাসে প্রয়াত প্রাক্তন বিধায়ক গৰাকীৰ বিদেহ আত্মাৰ সদ্‌গতিৰ অৰ্থে ভগৱানৰ ওচৰত প্ৰাৰ্থনা জনোৱাৰ লগতে শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰিছে ৷🔯