🔯বঙাইগাঁৱত কাব্যগ্ৰন্থ ‘অনুভৱী মন’ উন্মোচন🔯

🔯বঙাইগাঁৱত কাব্যগ্ৰন্থ ‘অনুভৱী মন’ উন্মোচন🔯

📝বঙাইগাঁও: ২৭ নৱেম্বৰঃ বঙাইগাঁও শতদল শাখা সাহিত্য সভা ভৱনত দেওবাৰে মালা বৰুৱাৰ কবিতা সংকলন ‘অনুভৱী মন’ উন্মোচন কৰা হয়৷ এই উপলক্ষে অনুষ্ঠিত হোৱা গ্ৰন্থ উন্মোচনী সভা আৰু কবি সন্মিলনৰ পূৰ্বে কবি মালা বৰুৱাৰ পিতৃ হেম বৰুৱা আৰু মাতৃ কুসুম কুমাৰী বৰুৱাৰ প্ৰতিচ্ছবিৰ সন্মুখত বন্তি প্ৰজ্বলন কৰে সাংবাদিক ৰঞ্জিত কুমাৰ শৰ্মা আৰু বঙাইগাঁও শতদল শাখা সাহিত্য সভাৰ প্ৰাক্তন সভাপতি বিচিত্ৰ শৰ্মাই৷ প্ৰতিচ্ছবিত মাল্যদান কৰে বঙাইগাঁও শতদল শাখা সাহিত্য সভাৰ ভাৰপ্ৰাপ্ত সভাপতি জ্যোৎস্নাপ্ৰিয়া দেৱীয়ে৷ পুষ্প অৰ্পণেৰে শ্ৰদ্ধাঞ্জলি অনুষ্ঠান মুকলি কৰে বীৰঝৰা উচ্চতৰ মাধ্যমিক বিদ্যালয়ৰ অৱসৰী শিক্ষক তথা লেখক-কবি ক্ৰমে মাণিক চন্দ্ৰ শৰ্মা আৰু গণেশ্বৰ দেৱ শৰ্মাই৷ ইয়াৰ পিচতে বীৰঝৰা উচ্চতৰ মাধ্যমিক বিদ্যালয়ৰ অৱসৰী অধ্যক্ষ গণেশ্বৰ দেৱ শৰ্মাৰ সভাপতিত্বত গ্ৰন্থ উন্মোচনী সভা অনুষ্ঠিত হয়৷ সভাত মালা বৰুৱাৰ কাব্যগ্ৰন্থ ‘অনুভৱী মন’ উন্মোচন কৰে বঙাইগাঁও ৰে’লৱে উচ্চতৰ মাধ্যমিক বিদ্যালয়ৰ অৱসৰী অধ্যক্ষ গীতা দেৱীয়ে৷ গ্ৰন্থ উন্মোচনৰ পিচতে এখন কবি সন্মিলন অনুষ্ঠিত হয়৷ 

অনুষ্ঠানত বিশিষ্ট অতিথিৰূপে উপস্থিত থাকি কবি আৰু কবিতা বিষয়ক বক্তব্য দাঙি ধৰে অভয়াপুৰী মহাবিদ্যালয়ৰ অৱসৰী মুৰব্বী অধ্যাপিকা ড॰ মৰমী বৰঠাকুৰ তালুকদাৰে৷ ধৃতাস্মৃতা শৰ্মাই আঁত ধৰা অনুষ্ঠানত মালা বৰুৱাই সাংবাদিককে ধৰি কেইবাগৰাকী জ্যেষ্ঠ আৰু বিশিষ্ট ব্যক্তিক ফুলাম গামোচাৰে সম্বৰ্ধনা জনায়৷ জ্যোতিষ শৰ্মাই বাঁহীবাদনেৰে অনুষ্ঠানৰ সৌষ্ঠৱ বঢ়ায়৷ কবি সন্মিলনত প্ৰায় দুকুৰি কবিয়ে কবিতা পাঠ কৰে৷ তদুপৰি অৱসৰী অধ্যাপক ড॰ মুনীন ঠাকুৰীয়া, মালা বৰুৱাৰ স্বামী ৰাতুল চন্দ্ৰ বৰুৱাকে ধৰি কেইবাগৰাকী ব্যক্তিয়ে বক্তব্য দাঙি ধৰে৷ অভিনেত্ৰী নৰ্মদা দাসে কথাছবিৰ সংলাপেৰে উপস্থিতসকলক আপ্লুত কৰে৷ সভাপতিৰ আসনৰ পৰা গণেশ্বৰ দেৱ শৰ্মাই কবিতা বিষয়ক ৰসাল আৰু বিশ্লেষণাত্মক বক্তব্য দাঙি ধৰে৷ মালা বৰুৱাই শলাগৰ শৰাই আগবঢ়ায়৷ উল্লেখযোগ্য যে গ্ৰন্থখন প্ৰকাশ কৰিছে মালা বৰুৱাৰ কন্যা ডাঃ ৰিম্‌লি কৌশিক বৰুৱাই৷ গ্ৰন্থখনৰ বেটুপাত ঋতুৰাজ কৌশিক বৰুৱাৰ৷🔯