🔯সদৌ অসম জিলা প্ৰশাসন কৰ্মচাৰী সন্থাৰ কেন্দ্ৰীয় দ্বাদশ দ্বি -বাৰ্ষিক বঙাইগাঁও অধিৱেশন🔯

🔯সদৌ অসম জিলা প্ৰশাসন কৰ্মচাৰী সন্থাৰ কেন্দ্ৰীয় দ্বাদশ দ্বি -বাৰ্ষিক বঙাইগাঁও অধিৱেশন🔯

🔯'সকলো কৰ্মচাৰীয়েই ৰাইজৰ সেৱক'- মন্ত্ৰী ৰঞ্জিত কুমাৰ দাস🔯 

🔯স্মৃতিগ্ৰন্থ 'বীৰঝৰা' উন্মোচন🔯 

🔯পৰবৰ্তী কাৰ্যকাল বাবে বিক্ৰমজিত চক্ৰৱৰ্তী সভাপতি আৰু জয়ন্ত ভাণ্ডাৰ কায়স্থ সাধাৰণ সম্পাদক নিৰ্বাচিত🔯 

📝বঙাইগাঁওঃ ২৭ নবেম্বৰঃ 'সকলো কৰ্মচাৰীয়েই ৰাইজৰ সেৱক' ৷ এই একান্ত অনুভৱ ব্যক্ত কৰে খাদ্য,অসামৰিক যোগান আৰু গ্ৰাহক পৰিক্ৰমা,পঞ্চায়ত আৰু গ্ৰামোন্নয়ন আৰু সাধাৰণ প্ৰশাসন বিভাগৰ মন্ত্ৰী ৰণজিৎ কুমাৰ দাসে। মন্ত্ৰী ৰণজিৎ কুমাৰ দাসে বঙাইগাঁৱৰ বীৰঝৰা পাব্লিক লাইব্ৰেৰীত দুদিনীয়াকৈ অনুষ্ঠিত সদৌ অসম জিলা প্ৰশাসন কৰ্মচাৰী সন্থাৰ দ্বাদশ দ্বি-বাৰ্ষিক অধিৱেশনৰ অন্তিম দিনা বিয়লি সন্থাৰ বিদায়ী সভাপতি গোপীনাথ দত্তৰ সভাপতিত্বত অনুষ্ঠিত  মুকলি সভা আৰু স্মৃতিগ্ৰন্থ উন্মোচন অনুষ্ঠানত উপস্থিত থাকি এই মন্তব্য কৰে। তেওঁ কয় যে জিলা প্ৰশাসনৰ কৰ্মচাৰীসকলে চৰকাৰৰ কাম-কাজসমূহ তৃণমূল পৰ্যায়ত ৰূপায়ণ কৰে।এগৰাকী উপায়ুক্তই কৰিবলগীয়া সকলো কামৰ সফলতা নিৰ্ভৰ কৰে তেওঁৰ অধীনত কাম কৰা কৰ্মচাৰীসকলৰ কামৰ ওপৰত। ৰাইজক জিলা প্ৰশাসনৰ কৰ্মচাৰীসকলে এখন নিকটাত্মীয়ৰ প্ৰমাণ পত্ৰ দিয়ে, মাটিৰ কাম কৰি দিয়ে।দুৰ্যোগৰ সময়ত যেনে বানপানী,মহামাৰী আদি হ'লে সাহায্য দিয়া,পুনৰ সংস্থাপন দিয়া সকলো প্ৰয়োজনীয় সা-সুবিধা দিয়া আদি সকলো কাম জিলা প্ৰশাসনৰ কৰ্মচাৰীসকলেই কৰে। নিৰ্বাচনৰ সময়ত আগভাগ লয় জিলা প্ৰশাসনৰ কৰ্মচাৰীসকলেই। মুলতঃ অসমখন এই সকল কৰ্মচাৰীয়ে চলাইছে বুলিও তেওঁ মন্তব্য কৰে ৷ 

ভাষণত তেওঁ দেশৰ প্ৰধানমন্ত্ৰী নৰেন্দ্ৰ মোডীয়ে  বিশ্বৰ ভিতৰতে ভাৰতবৰ্ষক উৎকৃষ্ট মানৰ দেশ গঢ়িবলৈ যি সৱ কা সাথ, সৱ কা বিকাশ তথা সৱ কা বিশ্বাসৰ জৰিয়তে কাম কৰি আগুৱাই নিব বিচাৰিছে সেই কাৰ্যত সকলোৱে কাম কৰা উচিত বুলিও কয় ৷ তেওঁ লগতে কয় যে জিলা প্ৰশাসনৰ কাম-কাজসমূহ স্বচ্ছ, দ্ৰুত, নিৰ্ভৰযোগ্য আৰু সহজ কৰিবলৈ চৰকাৰে ই - গভৰ্নেন্স  (E-governance)  ব্যৱস্থা লৈছে। এতিয়া বহু কামৰ ক্ষেত্ৰত ৰাইজে জিলা প্ৰশাসনৰ কাৰ্যালয়লৈ তাতঁ-বাতি কাঢ়িব নালাগে। কম্পিউটাৰ, মোবাইল আদি মাধ্যমেৰে ইন্টাৰনেটৰ সহায়ত ৰাইজে ঘৰত বহিয়েই অনলাইন আপডেট পাব পাৰে। E-governance ৰ বাবে কাগজ-কলমৰ খৰছ,ৰাইজৰ যাতায়তৰ ধন,সময় আদি ৰাহি হৈছে আৰু ইয়াৰ জৰিয়তে নতুন তথ্য-প্ৰযুক্তি আৰু যোগাযোগ ব্যৱস্থাৰ সদব্যৱহাৰ কৰা হৈছে। যিকি নহওক জিলা প্ৰশাসনৰ কৰ্মচাৰীসকল চৰকাৰৰ অবিচ্ছেদ্য অংগ। অসমৰ মুখ্যমন্ত্ৰীয়ে অসমক দেশৰ আগশাৰীৰ ৫ খন ৰাজ্যৰ ভিতৰত এখন হিচাপে গঢ়িবলৈ কাম কৰি আছে আৰু সেইক্ষেত্ৰত জিলা প্ৰশাসনৰ কৰ্মচাৰীসকলৰ দায়িত্ব বহুত। গতিকে সাধাৰণ প্ৰশাসন বিভাগৰ মন্ত্ৰী হিচাপে তেওঁ জিলা প্ৰশাসনৰ কৰ্মচাৰীসকলৰ আপত্তি-অভিযোগৰ প্ৰতি গুৰুত্ব দিব আৰু যথাসম্ভৱ সহায় কৰিব। সভাত তেওঁ কয় যে প্ৰশাসন যন্ত্ৰৰ সকলো কৰ্মচাৰীয়েই ৰাইজৰ একো একোজন সেৱক। গতিকে ৰাইজক যথাসম্ভৱ সেৱা আগবঢ়োৱাটো তেওঁলোকৰ কৰ্তব্য। লগতে কৰ্মচাৰী সংস্থাৰ অভাৱ - অভিযোগ সন্দৰ্ভত মন্ত্ৰীগৰাকীক পোনপতিয়াকৈ সাক্ষাৎ কৰিবলৈকো কয় ৷ মন্ত্ৰীগৰাকীয়ে শান্তি আৰু প্ৰগতি শব্দৰ প্ৰভেদৰ আলোচনা দাঙি ধৰি শান্তিত কৈ প্ৰশান্তি হে জীৱনৰ বাবে স্থায়ী হয় বুলি উল্লেখ কৰে ৷ তেওঁ জিলা প্ৰশাসন কৰ্মচাৰী সন্থাৰ নামটো পৰিৱৰ্তন কৰি জিলা প্ৰশাসন সেৱক সন্থা কৰিবলৈ সন্থাৰ নেতৃত্বক আহ্বান জনায় ৷ 

সন্থাৰ যুটীয়া সাধাৰণ সম্পাদক নয়নমণি দাসে আঁত ধৰা মুকলি সভাত অধিৱেশন উপলক্ষে প্ৰকাশ কৰা তথা বঙাইগাঁৱ ৰাজহ চক্ৰ কাৰ্যালয়ৰ জ্যেষ্ঠ সহায়ক -লেখক উপেন বৰুৱা সম্পাদিত 'বীৰঝৰা' শীৰ্ষক স্মৃতিগ্ৰন্থ খনি উন্মোচন কৰে বিশিষ্ট অতিথিৰূপে উপস্থিত থকা বঙাইগাঁও জিলাৰ উপায়ুক্ত নৱদ্বীপ পাঠকে ৷ স্মৃতিগ্ৰন্থ উন্মোচন কৰি উপায়ুক্ত নৱদীপ পাঠকে জিলা এখনৰ চৰকাৰী সকলো জৰুৰী কাম জিলা প্ৰশাসনৰ কৰ্মচাৰী সকলে খৰটকীয়াকৈ কাম কৰিলেহে ৰাইজে প্ৰশাসনৰ কাম কাজ আৰু চৰকাৰৰ প্ৰতি সদয় হয় বুলি উল্লেখ কৰি সকলো চৰকাৰী কৰ্মচাৰীকো সময় অনুসৰি নিয়মানুৱৰ্তী কাম কৰিলেহে প্ৰশাসন মজবুত হয় বুলি ভাষণত উল্লেখ কৰে ৷ একেদৰে বিগত দহ বছৰ মানৰ পৰা প্ৰতিখন জিলাত স্নাতক, স্নাতকোত্তৰ, অভিযন্তা, আৰু আৰু অন্যান্য কাৰিকৰী বিভাগৰ লোকে জিলা প্ৰশাসনৰ কামত নিয়োজিত হোৱা কাৰ্য শুভ হৈছে বুলি উল্লেখ কৰি পৰৱৰ্তী দিনত নতুন দিনৰ বাবে কাৰিকৰী দিশ আহিবৰ বাবে এনে কৰ্মচাৰীৰ প্ৰয়োজন ৰাজ্যৰ উন্নতিত সহায় কৰিব বুলি তেওঁ উল্লেখ কৰে ৷ সভাত কমতাপুৰ স্বায়ত্ত শাসিত পৰিষদৰ মুখ্য কাৰ্যবাহী সদস্য গোকুল বৰ্মন সন্মানীয় অতিথিৰূপে উপস্থিত থাকে ৷ মুকলি সভাৰ অন্তত পুনৰ অনুষ্ঠিত হয় প্ৰতিনিধি আৰু বিষয় বাচনি সভা ৷ প্ৰতিনিধি সভাই সদৌ অসম জিলা প্ৰশাসন কৰ্মচাৰী সন্থাৰ দ্বাদশ  দ্বি-বাৰ্ষিক বঙাইগাঁও অধিবেশনত সন্থাৰ আগন্তুক ২০২২-২০২৪ দুবছৰীয়া কাৰ্যকালৰ বাবে সন্থাৰ প্ৰাক্তন কেন্দ্ৰীয় সাধাৰণ সম্পাদক তথা কাছাৰ জিলাৰ বিক্রমজিত চক্ৰৱৰ্তীক সভাপতি হিচাপে আৰু সাধাৰণ সম্পাদক হিচাপে সন্থাৰ প্ৰাক্তন কেন্দ্ৰীয়  যুটীয়া সম্পাদক তথা কামৰূপ মহানগৰ জিলাৰ জয়ন্ত ভাণ্ডাৰ কায়স্থক বিনা প্ৰতিদ্বন্দ্বিতাৰে নিৰ্বাচিত কৰে  ৷ ইপিনে পুৱা  আঠ বজাত বিশিষ্ট অতিথিৰ দ্বাৰা গছ পুলি ৰোপণ কাৰ্যসুচী ৰূপায়ণৰ পাছত পুৱাৰ ভাগত বঙাইগাঁও চহৰত এক বাৰেৰহনীয়া সাংস্কৃতিক শোভাযাত্ৰা উলিয়ায় হয় ৷  সন্ধিয়া সাংস্কৃতিক অনুষ্ঠান মুকলি কৰে শিল্পী পেঞ্চনাৰ ধৰণী বণিক্যই ৷🔯