🔯অসমৰ জাতীয় মহাবীৰ লাচিত বৰফুকনৰ ইতিহাসক ৰাষ্ট্ৰীয় পৰ্যায়ত প্ৰতিষ্ঠাৰ বাবে চৰকাৰে গ্ৰহণ কৰা পদক্ষেপক কোচ ৰাজবংশী জাতীয় পৰিষদৰ প্ৰশংসা🔯

🔯অসমৰ জাতীয় মহাবীৰ লাচিত বৰফুকনৰ ইতিহাসক ৰাষ্ট্ৰীয় পৰ্যায়ত প্ৰতিষ্ঠাৰ বাবে চৰকাৰে গ্ৰহণ কৰা পদক্ষেপক কোচ ৰাজবংশী জাতীয় পৰিষদৰ প্ৰশংসা🔯

🔯বিশ্ব মহাবীৰ চিলাৰায়কো ৰাষ্ট্ৰীয় পৰ্যায়ত তুলি ধৰিবলৈ আহ্বান🔯 

📝বঙাইগাঁওঃ ২৩ নৱেম্বৰঃ মহাবীৰ লাচিত বৰফুকনৰ ঐতিহাসিক কীৰ্তিগাঠা ৰাষ্ট্ৰীয় পৰ্যায়ত প্ৰতিষ্ঠাৰ বাবে অসমৰ মুখ্য মন্ত্ৰী ডঃ হিমন্ত বিশ্ব শৰ্মাই অসম চৰকাৰৰ পৃষ্ঠপোষকতাত যি ঐতিহাসিক পদক্ষেপ গ্ৰহণ কৰি জাতীয় মহাবীৰ গৰাকীৰ  প্ৰতি কৃতজ্ঞতা জ্ঞাপন কৰাৰ দিহা কৰিছে তাক কোচ ৰাজবংশী জাতীয় পৰিষদে ভূয়সী প্ৰশংসা কৰাৰ লগতে ধন্যবাদ জনাইছে ৷ অসমৰ মুখ্য মন্ত্ৰী ড' হিমন্ত বিশ্ব শৰ্মাই অসমৰ জাতীয় মহাবীৰ লাচিত বৰফুকনৰ ইতিহাসক ৰাষ্ট্ৰীয় পৰ্যায়ত প্ৰতিষ্ঠাৰ বাবে সমগ্ৰ অসম তথা নতুন দিল্লীত চৰকাৰী পৃষ্ঠপোষকতাত যি অভূতপূৰ্ব কাৰ্য্যসূচী ৰূপায়ণ কৰি জাতীয় মহাবীৰ গৰাকীৰ প্ৰতি শ্ৰদ্ধা জ্ঞাপন কৰা কাৰ্য্যত কোচ ৰাজবংশী জাতীয় পৰিষদৰ সভাপতি বিমল কুমাৰ বৰ্মন, সাধাৰণ সম্পাদক বিশ্বজিত ৰায় আৰু উপদেষ্টা সতীশ পাটগিৰীয়ে এক প্ৰেছ বিবৃতিত আনন্দ  প্ৰকাশ কৰি কয় যে এনেধৰণৰ বৰ্ণাঢ্য কাৰ্য্যসূচী ৰূপায়ণেৰে অসমৰ অৱহেলিত  জাতি জনগোষ্ঠীক ৰাষ্ট্ৰীয় পৰ্যায়ত উজলাই তোলাৰ ক্ষেত্ৰত মাইলৰ খুঁটা হ'ব। মহাবীৰ লাচিত বৰফুকন আৰু বিশ্ব মহাবীৰ চিলাৰায় ওৰফে সংগ্ৰাম সিংহ ক্ৰমে আহোম আৰু কোচ ৰাজ্যৰ  দুগৰাকী প্ৰধান সেনাপতি হোৱা সূত্ৰেই জাতীয় বীৰৰ মৰ্যাদা পাইছে। মহাবীৰ লাচিতৰ তুলনাত বিশ্ব মহাবীৰ চিলাৰায়ৰ বীৰত্ব আৰু ঐতিহাসিক সুষমা কোনো গুণেই কম নাছিল বুলি ইতিহাসে কয় বুলিও পৰিষদৰ সভাপতি আৰু সাধাৰণ সম্পাদকদ্বয় কয়। বৃহত্তৰ অসমীয়া জাতি গঠনৰ ক্ষেত্ৰত বিশ্ব মহাবীৰ চিলাৰায়ৰ অৱদান অনস্বীকাৰ্য বুলি বিমল কুমাৰ বৰ্মন আৰু বিশ্বজিৎ ৰায়ে উল্লেখ কৰি কয় যে এই গৰাকী মহান বীৰৰ প্ৰচেষ্টাতেই এসময়ত বৃহত্তৰ অসম শাক্ত বৈষ্ণৱৰ মহামিলনৰ তীৰ্থ ভূমিত পৰিণত হৈছিল। আজিও কালাপাহাৰে ধ্বংস কৰা কামাখ্যা মন্দিৰৰ পুন নিৰ্মাণৰ কীৰ্তি আৰু অসমীয়া জাতিৰ মহাদেউল নিৰ্মাতা মহাপুৰুষ শংকৰদেৱক কোচ ৰাজ্যত আশ্ৰয় দিয়াকে ধৰি বৈষ্ণৱৰ সৰগ মধুপুৰ সত্ৰত তাৰেই স্বাক্ষৰ বহন কৰিছে বুলি নেতাদ্বয়ে প্ৰেছ বিবৃতিটোত উল্লেখ কৰে। বিবৃতিটোত উল্লেখ কৰে যে অসমৰ তদানীন্তন মুখ্য মন্ত্ৰী প্ৰয়াত হিতেশ্বৰ শইকীয়াই তেওঁৰে মন্ত্ৰী সভাৰ  মন্ত্ৰী তথা সদৌ অসম কোচ ৰাজবংশী ক্ষত্ৰিয় সন্মিলনীৰ  সভাপতি প্ৰয়াত কবীৰ ৰায় প্ৰধানীৰ সহযোগত অসম চৰকাৰৰ পৃষ্ঠপোষকতাত বিশ্ব মহাবীৰ চিলাৰায়ৰ প্ৰতিমূৰ্তি ১৯৮৪ চনত অতি ধুম ধামেৰে স্থাপন কৰিছিল। সেই একেদৰেই অসমৰ তদানীন্তন মুখ্য মন্ত্ৰী তৰুন গগৈয়েই ২০০৫ চনত অসম চৰকাৰৰ পৃষ্ঠপোষকতাত চিলাৰায় বঁটা প্ৰবৰ্তন কৰি মহানুভৱতা প্ৰকাশ কৰি শ্ৰদ্ধা জ্ঞাপন কৰিছিল। জাতীয় পৰিষদৰ নেতাদ্বয়ে কয় যে শুক্লধ্বজ ওৰফে সংগ্ৰাম সিংহ ওৰফে চিলাৰায়  অকল এগৰাকী বীৰ যোদ্ধাৰ নাছিল, তেওঁ এগৰাকী সংস্কৃতত বিদগ্ধ পণ্ডিত আছিল। চিলাৰায়ে সংস্কৃতৰ সাৰৱতী সাৰ গ্ৰন্থৰ টীকা ভাষ্য ৰচনা কৰাৰ বাবে স্বয়ং গুৰুজনাই তেওঁক পৰম ৰসিক গুৰু শুক্লধ্বজ ৰায় বুলি অভিহিত কৰিছিল। অসী (তৰোৱাল) আৰু মসী (কলম) অদ্বিতীয় বুৎপত্তি তথা অসাধাৰণ বিৰল বীৰত্বৰ প্ৰতি লক্ষ্য ৰাখিয়েই বিশ্ব বৰেণ্য ইতিহাসবিদ আৰ্নল্ড টোয়েনবীয়ে বিশ্বৰ তিনিজনা ক্ষণজন্মা বিশ্ব মহাবীৰৰ ভিতৰত কোচ সেনাপতি চিলাৰায়ক প্ৰথম স্থানত নাম উল্লেখ কৰাটোৰ অন্যতম দিশ বুলি নেতাদ্বয়ে উল্লেখ কৰে। বিশ্ব মহাবীৰ তালিকাভুক্ত হোৱা বাকী দুগৰাকী বীৰ ক্ৰমে মহাৰাষ্ট্ৰৰ মহাৰাজ ছত্ৰপতি শিৱাজী আৰু ফ্ৰান্সৰ নেপোলিয়ন বৰ্নাপাত। নেতাদ্বয়ে কোচ ৰাজবংশী জনগোষ্ঠীৰ ব্যাপক দাবীৰ পৰিপ্ৰেক্ষিতত  তদানীন্তন অসমৰ মুখ্যমন্ত্ৰী তৰুণ গগৈয়ে অসম চৰকাৰৰ তৰফৰ পৰা চিলাৰায় বঁটা ঘোষণাৰে বিশ্ব মহাবীৰ চিলাৰায়ৰ প্ৰতি বিশেষ সন্মান আগবঢ়ায় বুলি উল্লেখ কৰি কয় যে পৰৱৰ্তীকালত অসম চৰকাৰে কেৱল নাম মাত্ৰ চিলাৰায় দিৱস পাতি নিজৰ দায়িত্ব সামৰি আহিছে বুলিও বিবৃতিটোত দুখ প্ৰকাশ কৰে ৷ নেতাদ্বয়ে কয় যে বিশ্ব মহাবীৰ চিলাৰায়ৰ ঐতিহাসিক বীৰত্বক উপযুক্ত মূল্যায়ন, গৱেষণা তথা বিশ্ব মহাবীৰ গৰাকীৰ ঐতিহাসিক বীৰত্বৰ গাঁঠা অসম চৰকাৰে ৰাষ্ট্ৰীয় পৰ্যায়ত  প্ৰতিষ্ঠা কৰাৰ ক্ষেত্ৰত কোনোধৰণৰ পদক্ষেপ নললে বুলিও খেদ প্ৰকাশ কৰে।সভাপতি বিমল কুমাৰ বৰ্মন আৰু সাধাৰণ সম্পাদক বিশ্বজিৎ ৰায়ে আগন্তুক বিশ্ব মহাবীৰ চিলাৰায় দিৱসৰ কাৰ্য্যসূচীত বৰ্তমানে অসম চৰকাৰে আগবঢ়োৱা পৃষ্ঠপোষকতাৰ  ক্ষেত্ৰত কোনোধৰণৰ হীনদেৰি যাতে নকৰে তাৰ বাবে অসমৰ মুখ্য মন্ত্ৰী ডঃ হিমন্ত বিশ্ব শৰ্মাৰ বিশেষ দৃষ্টি আকৰ্ষণ কৰি বিশ্ব মহাবীৰ চিলাৰায়ক ৰাষ্ট্ৰীয় পৰ্যায়ত তুলি ধৰিবলৈ প্ৰেছ বিবৃতি যোগে আহ্বান জনায়৷🔯