🔯বঙাইগাঁও নিৰ্বাচনী জিলাৰ খচৰা ভোটাৰ তালিকা সম্পৰ্কত জিলা নিৰ্বাচনী বিষয়াৰ সংবাদ মেল🔯

🔯বঙাইগাঁও নিৰ্বাচনী জিলাৰ খচৰা ভোটাৰ তালিকা সম্পৰ্কত জিলা নিৰ্বাচনী বিষয়াৰ সংবাদ মেল🔯 

📝বঙাইগাঁওঃ ৯ নবেম্বৰঃ বঙাইগাঁও জিলাৰ উপায়ুক্ত তথা বঙাইগাঁও নিৰ্বাচনী জিলাৰ জিলা নিৰ্বাচনী বিষয়া নবদ্বীপ পাঠকে বুধবাৰে বিশেষ সংক্ষিপ্ত ফটোযুক্ত ভোটাৰ তালিকা সংশোধনী -২০২৩ ৰ খচৰা ভোটাৰ তালিকা প্ৰকাশৰ লগতে আন সূচী সম্পৰ্কত এখনি সংবাদ মেল সম্বোধন কৰে। বঙাইগাঁও জিলা উপায়ুক্ত কাৰ্যালয়ৰ সভাকক্ষত অনুষ্ঠিত এই সংবাদ মেলযোগে তেওঁ জানিবলৈ দিয়ে যে ভাৰতৰ নিৰ্বাচন আয়োগৰ নিৰ্দেশনামৰ্মে ২০২৩ চনৰ ১ জানুৱাৰীক ভিত্তি তাৰিখ হিচাপে লৈ এই সংশোধনী সূচী প্ৰকাশ কৰা হৈছে। সেইমৰ্মে বুধবাৰে ( ৯ নবেম্বৰ) খচৰা ভোটাৰ তালিকা প্ৰকাশ কৰা হৈছে। বুধবাৰৰ  পৰা চলিত বৰ্ষৰ ৮ ডিচেম্বৰৰ ভিতৰত খচৰা ভোটাৰ তালিকা সন্দৰ্ভত দাবী আৰু আপত্তি দাখিল কৰিব পাৰিব আৰু ২৬ ডিচেম্বৰৰ আগত দাবী আৰু আপত্তিসমূহ নিষ্পত্তি কৰা হ'ব।আনহাতে আগন্তু ৫ জানুৱাৰীত চূড়ান্ত ফটোযুক্ত ভোটাৰ তালিকা প্ৰকাশ কৰা হ'ব। যিসকল নাগৰিকৰ ২০২৩ বৰ্ষৰ ১ জানুৱাৰী, ১ এপ্ৰিল, ১ জুলাই বা ১ অক্টোবৰত ১৮ বছৰ সম্পূৰ্ণ হ'ব তেওঁলোকেও এই সংশোধনী সূচীৰ অধীনত ফটোযুক্ত ভোটাৰ তালিকাত নাম অন্তৰ্ভুক্ত কৰিবলৈ আবেদন কৰিব পাৰিব।

জিলা নিৰ্বাচনী বিষয়াগৰাকীয়ে খচৰা ফটোযুক্ত ভোটাৰ তালিকা সন্দৰ্ভত বঙাইগাঁও নিৰ্বাচনী জিলা সম্পৰ্কত দিয়া তথ্য অনুসৰি এই নিৰ্বাচনী জিলাৰ অন্তৰ্গত ৩২ নং বঙাইগাঁও বিধানসভা সমষ্টিত মুঠ ১ লাখ ৮০ হেজাৰ ২ শ ৭৭ গৰাকী ভোটাৰ আছে। তাৰে ভিতৰত ৮৯ হেজাৰ ৩৬ গৰাকী পুৰুষ ভোটাৰ আৰু ৯১ হেজাৰ ২ শ ৩৯ গৰাকী মহিলা ভোটাৰ আৰু ২ গৰাকী তৃতীয় লিংগৰ ভোটাৰ আছে। আনহাতে ২৩৩ গৰাকী ডি-ভোটাৰ আছে বঙাইগাঁও বিধানসভা সমষ্টিত। সেইদৰে জিলাখনৰ ২৪২ টা ভোটগ্ৰহণ কেন্দ্ৰৰ বাবে ২৪২ গৰাকী বুথ পৰ্যায়ৰ বিষয়া আছে । এই সংবাদ মেলত উপায়ুক্ত তথা জিলা নিৰ্বাচনী বিষয়া নবদ্বীপ পাঠকক অতিৰিক্ত উপায়ুক্ত মগেন নৰহ আৰু নিৰ্বাচনী বিষয়া নৱনীতা হাজৰিকাই সহযোগিতা আগবঢ়ায় ৷ উল্লেখ্য যে আজিৰ সংবাদ মেলত বিজেপি, অগপ আৰু আই এন চি ৰাজনৈতিক দলৰ  বিষয়ববীয়াও উপস্থিত থাকে।🔯