🔯বঙাইগাঁও জিলাৰ উন্নয়নৰ বাবে সময়মতে কাম কৰিবলৈ সকলো বিভাগকে আহ্বান উপায়ুক্তৰ🔯

🔯বঙাইগাঁও জিলাৰ উন্নয়নৰ বাবে সময়মতে কাম কৰিবলৈ সকলো বিভাগকে আহ্বান উপায়ুক্তৰ🔯 

📝বঙাইগাঁওঃ ৭ নবেম্বৰঃ বঙাইগাঁও জিলাৰ উপায়ুক্ত  নবদ্বীপ পাঠকৰ সভাপতিত্বত সোমবাৰে উপায়ুক্ত  কাৰ্যালয়ৰ সভাকক্ষত অনুষ্ঠিত জিলা উন্নয়ন সমিতিৰ সভাত সভাপতিৰ আসনৰ পৰা তেওঁ বিভাগীয় বিষয়াস৷কলক কয় যে পঞ্চায়ত আৰু গ্ৰামোন্নয়ন বিভাগেই হওক বা কৃষি বিভাগেই হওক বা জনস্বাস্থ্য কাৰিকৰী বিভাগেই হওক সকলোৱে সময়মতে কামবিলাক সমাপন কৰিলেহে জিলাখনৰ উন্নয়ন হ'ব ৷ তদুপৰি যিবিলাক কাম কেবাটাও বিভাগৰ সহযোগিতাৰেহে সম্ভৱ সেইবিলাক কামৰ ক্ষেত্ৰত আটাইকেইজন বিষয়াই সহযোগিতাৰে কাম কৰিব লাগিব।যেনেদৰে ধান ক্ৰয় অভিযানত কৃষি বিভাগে কাম কৰিবলৈ পঞ্চায়ত আৰু গ্ৰামোন্নয়ন বিভাগে গাঁওসভা পাতি কামটো সম্পৰ্কত কৃষক ৰাইজক সজাগ কৰিব লাগিব। ইয়াত খাদ্য, অসামৰিক যোগান, ভাৰতীয় খাদ্য নিগম আদিয়েও সক্ৰিয়ভাৱে সহায় আগবঢ়াব লাগিব। সেইদৰে জনস্বাস্থ্য কাৰিকৰী বিভাগৰ অধীনত খোৱাপানী যোগানৰ ক্ষেত্ৰত পঞ্চায়ত আৰু গ্ৰামোন্নয়ন বিভাগ,  বিদ্যালয়সমূহৰ পৰিদৰ্শকৰ কাৰ্যালয়,সমাজ কল্যাণ আদি বিভাগে সহযোগিতা আগবঢ়াব লাগিব। তেনেদৰে ৰেচম বিভাগকো পঞ্চায়ত আৰু গ্ৰামোন্নয়ন বিভাগে সহায় আগবঢ়াব লাগিব বুলি কয় ৷ সভাত সমাজ কল্যাণ বিভাগৰ নিৰ্মীয়মাণ আদৰ্শ অংগনৱাডী কেন্দ্ৰৰ কাম আৰু অংগনৱাডী কেন্দ্ৰৰ ৰেচনেলাইজেশ্যনৰ কাম চাবলৈ কেবাগৰাকীও প্ৰশাসনিক বিষয়াক  উপায়ুক্তগৰাকীয়ে কয় ৷

আনহাতে লোকনিৰ্মাণ পথ বিভাগৰ কামৰ বুজ লয় উপায়ুক্তগৰাকীয়ে।আৰু লোকনিৰ্মাণ গৃহ বিভাগৰ অধীনত নিৰ্মীয়মান বঙাইগাঁও অভিযান্ত্ৰিক কলেজৰ কাম-কাজৰো বুজ লয় উপায়ুক্তগৰাকীয়ে।পশুপালন বিভাগৰ পশু টীকাকৰণৰ কাম কিমানখিনি আগবাঢ়িছে সেয়া চাবলৈও প্ৰশাসনিক বিষয়া এগৰাকীক দায়িত্ব দিয়া হয়। সভাত জিলা উদ্যোগ আৰু বাণিজ্য কেন্দ্ৰ, বঙাইগাঁৱৰ অধীনত প্ৰধানমন্ত্ৰী নিয়োগ সৃষ্টি আঁচনিৰ জৰিয়তে অধিক সংখ্যক নিবনুৱা বা উদ্যোগীয়ে যাতে সংস্থাপন পাব পাৰে তাৰ বাবে অগ্ৰণী বেংক মেনেজাৰৰ উপস্থিতিত আন আন বেংকসমূহৰ বিষয়ববীয়াৰ সৈতে সভাত মিলিত হ'বলৈ উদ্যোগ আৰু বাণিজ্য কেন্দ্ৰ, বঙাইগাঁৱৰ মহাপ্ৰৱন্ধকক উপায়ুক্ত পাঠকে  পৰামৰ্শ দিয়। আনহাতে অসম আদৰ্শ গাঁও যোজনাৰ অধীনত বঙাইগাঁৱত আদৰ্শ গাঁও হিচাপে নিৰ্মাণ কৰিবলৈ লোৱা চৌৰাগুৰি, আমগুৰি, ঢাকনাবাৰী, বিদ্যাপুৰ, মূলাগাঁও আৰু গেৰুকাবাৰী-এই ৬ খন গাঁৱত যদি কোনো বিভাগৰ অধীনত কিবা উন্নয়নমূলক কাম কৰিবলৈ বাকী আছে, তেনেহ'লে সেই বিভাগৰ বিষয়াক কাম কৰিবলৈ আহ্বান জনায় জিলা উন্নয়ন আয়ুক্ত ভাস্কৰ দাসে।ইয়াৰ উপৰিও জলসম্পদ বিভাগৰ অধীনত ডুবাচুৰী, বাশবাৰী আদি ঠাইত যি মথাউৰিৰ কাম আৰম্ভ কৰিছে সেয়া সময়মতে সম্পন্ন কৰিবলৈ উপায়ুক্ত নবদ্বীপ পাঠকে কাৰ্যবাহী অভিযন্তাক পৰামৰ্শ দিয়ে। সভাত জিলা পৰিষদৰ মুখ্য কাৰ্যবাহী বিষয়া নাদীৰা জেচমিন, অতিৰিক্ত উপায়ুক্ত জেনিফাৰ ইয়াচমিন চৌধুৰী, মাণিকপুৰ ৰাজহ চক্ৰৰ চক্ৰ বিষয়া ৰীতিমনি দাস আৰু বিভাগীয় বিষয়াসকল উপস্থিত থাকে।🔯