🔯বঙাগাঁও জিলা উপায়ুক্তৰ পথ সুৰক্ষাৰ বাবে সজাগতা সৃষ্টিত গুৰুত্ব🔯

🔯বঙাগাঁও জিলা উপায়ুক্তৰ পথ সুৰক্ষাৰ বাবে সজাগতা সৃষ্টিত গুৰুত্ব🔯

📝বঙাইগাঁওঃ ৫ নবেম্বৰঃ বঙাইগাঁও জিলা পথ সুৰক্ষা সমিতিৰ এখন সভা শনিবাৰে জিলা উপায়ুক্ত তথা পথ সুৰক্ষা সমিতিৰ অধ্যক্ষ নবদ্বীপ পাঠকৰ সভাপতিত্বত উপায়ুক্ত কাৰ্যালয়ৰ সভাকক্ষত অনুষ্ঠিত হয়। সভাৰ আৰম্ভণিতে বঙাইগাঁৱৰ জিলা পৰিবহন বিষয়া দীপজ্যোতি নেওগে জিলাখনত ২০২১-২২ বিত্তীয় বৰ্ষত জিলাখনৰ বিভিন্ন পথত হোৱা দুৰ্ঘটনাৰ বিষয়ে এক আভাস দি কয় যে পূৰ্বৰ তুলনাত জিলাখনত  দুৰ্ঘটনাৰ হাৰ কমিছে যদিও এই হাৰ আৰু হ্ৰাস কৰাৰ ক্ষেত্ৰত বহু ব্যৱস্থা হাতত ল'বলগীয়া আছে। আৰক্ষী অধীক্ষক স্বপ্ননীল ডেকা, অতিৰিক্ত উপায়ুক্ত মগেন নৰহ,অতিৰিক্ত উপায়ুক্ত তথা জিলা দুৰ্যোগ ব্যৱস্থাপনা প্ৰাধিকৰণৰ মুখ্য কাৰ্যবাহী বিষয়া জেনিফাৰ ইয়াচমিন চৌধুৰী আৰু জিলা প্ৰকল্প বিষয়া অনন্ত সামন্ত, বঙাইগাঁও পৌৰসভাৰ পৌৰপতি সুবোধ চন্দ্ৰ দাস, লোক নিৰ্মাণ পথ বিভাগৰ অধীক্ষক অভিযন্তা ভাৰত দাস, ভাৰতৰ ৰাষ্ট্ৰীয় ঘাইপথ প্ৰাধিকৰণৰ অভিযন্তা, ৰাষ্ট্ৰীয় ঘাইপথ আন্তঃগাঁথনি উন্নয়ন নিগম লিমিটেডৰ বিষয়া, বঙাইগাঁও জিলা চক্ৰৰ বিদ্যালয়সমূহৰ পৰিদৰ্শকৰ উপস্থিতিত অনুষ্ঠিত এই সভাখনত উপায়ুক্ত উপায়ুক্ত পাঠকে কয় যে জিলাখনত পথ দুৰ্ঘটনা হ্ৰাস কৰাৰ বাবে দুৰ্ঘটনাপ্ৰবণ স্থানত চাইনবোৰ্ড লগোৱা আৰু গতিৰোধক দিয়া, কোনো অংশত ৰিফ্লেক্টৰ স্থাপন কৰা, বঙাইগাঁও চহৰৰ মাজৰ পথৰ মেডিয়ানত বিজ্ঞাপনৰ বাবে লগোৱা পোষ্টাৰবোৰ আঁতৰোৱা, কোনো স্থানত জেব্ৰা ক্ৰচিঙৰ ব্যৱস্থা কৰা, চহৰখনৰ মাজৰ উৰণীয়া সেতুৰ খলাবমাবিলাক মেৰামতি কৰা, ঘাইপথ সদায় নিৰীক্ষণ কৰি প্ৰয়োজন সাপেক্ষে মেৰামতি কৰি থকা আদি বিভিন্ন ব্যৱস্থা ল'ব লাগিব সংশ্লিষ্ট কৰ্তৃপক্ষই।

তদুপৰি হেলমেট নহ'লে তেল ডীপোত তেল নিদিয়া, সম্ভাৱ্য স্থানত চি চি টিভি কেমেৰাৰ ব্যৱস্থা কৰা, চহৰৰ মাজৰ অংশত গাড়ীৰ গতিবেগ ১৫/১৬ কিলোমিটাৰ নিৰ্ধাৰিত কৰা, বাটৰ নাট আদি ঠায়ে ঠায়ে অনুষ্ঠিত কৰি ৰাইজক পথ দুৰ্ঘটনা নহ'বলৈ সজাগ কৰা, বিদ্যালয়ত সজাগতা সভা অনুষ্ঠিত কৰি পথ সুৰক্ষাৰ নিয়মসমূহ ছাত্ৰ-ছাত্ৰীৰ লগতে অভিভাৱকক অৱগত কৰা আদি ব্যৱস্থা গ্ৰহণ কৰিলে পথ দুৰ্ঘটনা বহু পৰিমাণে হ্ৰাস হ'ব বুলি উপায়ুক্তগৰাকীয়ে মত পোষণ কৰে।ইয়াৰ উপৰিও হাপাচাৰাৰ পৰা টুলুঙীয়ালৈ ৰাষ্ট্ৰীয় ঘাইপথছোৱাত নিকটৱৰ্তী কাকৈজানা সংৰক্ষিত বনাঞ্চলত থকা সোণালী বান্দৰৰ সুৰক্ষাৰ বাবে নিয়মাৱলী সন্নিৱিষ্ট কৰি হৰ্ডিং লগাবলৈ উপায়ুক্ত নবদ্বীপ পাঠকে ৰাষ্ট্ৰীয় ঘাইপথ আন্তঃগাঁথনি উন্নয়ন নিগম লিমিটেডক আহ্বান জনায়৷ আনহাতে আৰক্ষী অধীক্ষক স্বপ্ননীল ডেকাই কয় যে পথ দুৰ্ঘটনা ৰোধৰ বাবে জিলা পৰিবহন বিষয়াৰ তৰফৰ পৰা গাড়ীচালকৰ সভা পাতিলে পথ দুৰ্ঘটনা হ্ৰাসৰ ক্ষেত্ৰত আশানুৰূপ ফল পোৱা যাব। তেওঁ আৰু কয় যে ঘাইপথ মানে সুগম ৰাস্তা হ'ব লাগে য'ত খলা-বমা একো নাথাকে। তেতিয়া নিশ্চয় পথ দুৰ্ঘটনা বহু পৰিমাণে হ্ৰাস হ'ব ৷ সভাত জিলা উপায়ুক্তই এমাহৰ বাবে কাৰ্যসূচী বনাই কাৰ্যকৰী কৰিবলৈ জিলা পথ সুৰক্ষা সমিতিৰ বিষয়ববীয়াক কয় আৰু সেয়া কৰিলে পথ দুৰ্ঘটনা হ্ৰাসৰ ক্ষেত্ৰত কিমান ফলপ্ৰসূ হ'ব তাক বুজিব পৰা যাব বুলি কোৱাৰ লগতে পৰৱৰ্তী সভাত সেই সম্পৰ্কে পৰ্যালোচনা কৰা হ'ব বুলিও তেওঁ কয়।🔯