🔯কোচ ৰাজবংশী সাহিত্য সভাৰ একপক্ষীয়ভাৱে গৌৰীপুৰৰ ভাষাটোক কোচৰাজবংশী সকলৰ মান্যভাষা নিৰ্দ্ধাৰণ প্ৰসংগ🔯

🔯কোচ ৰাজবংশী সাহিত্য সভাৰ একপক্ষীয়ভাৱে গৌৰীপুৰৰ ভাষাটোক কোচৰাজবংশী সকলৰ মান্যভাষা নিৰ্দ্ধাৰণ প্ৰসংগ🔯

🔯অবিভক্ত গোৱলাপাৰা জিলা অঞ্চলত প্ৰচলিত ভাষাৰ আধাৰত কোচৰাজবংশী সকলৰ মান্যভাষা নিৰ্দ্ধাৰণৰ প্ৰচেষ্টা কোচ ৰাজবংশী ভাষা অধ্যয়ন, গৱেষণা আৰু উন্নয়ণ সমিতিৰ🔯

🔯বঙাইগাঁৱত জানুৱাৰী মাহৰ শেষৰ সপ্তাহত কোচ ৰাজবংশী ভাষা বন্দনা সমাৰোহৰ আয়োজন🔯

📝বঙাইগাঁওঃ ৪ নৱেম্বৰ : কোচ ৰাজবংশী জনগোষ্ঠীয় ‘মান্যভাষা’ নিৰূপনৰ বাবে কোচ ৰাজবংশী ভাষা অধ্যয়ন, গৱেষণা আৰু উন্নয়ন সমিতিয়ে প্রচেষ্টা অব্যাহত ৰাখিছে ৷ কোচ ৰাজবংশী সাহিত্য সভাই একপক্ষীয় ভাৱে কেৱল গৌৰীপুৰৰ ভাষাটোকেই সমগ্ৰ কোচ ৰাজবংশী জনগোষ্ঠীৰ মান্যভাষা কৰিবলৈ চলোৱা প্ৰচেষ্টাৰ বিপৰীতে কোচ ৰাজবংশী ভাষা অধ্যয়ন, গৱেষণা আৰু উন্নয়ণ সমিতিয়ে অবিভক্ত গোৱলাপাৰা জিলা (অর্থাৎ বৰ্তমানৰ বঙাইগাওঁ, চিৰাং, কোকৰাঝাৰ, ধুবুৰী, দক্ষিণ শালমাৰা আৰু গোৱালপাৰা) অঞ্চলত প্ৰচলিত ভাষাৰ আধাৰত লিখিত ৰূপৰ মান্যভাষা নিৰ্দ্ধাৰণৰ বাবে জোৰদাৰ প্ৰচেষ্টা অব্যাহত ৰাখিছে। সংগঠনটোৱে ইতিমধ্যে লোৱা ব্যাকৰণ আৰু শব্দকোষ প্রনয়ণৰ বাবে কাৰ্য্যব্যৱস্থা চূড়ান্ত কৰিবলৈ ৩০ অক্টোবৰত ধুবুৰী জিলাৰ চাপৰস্থিত ৰত্নপীঠ কলেজত এখন সাধাৰণ সভা অনুষ্ঠিত কৰে। ধুবুৰী, কোকৰাঝাৰ, চিৰাং আৰু বঙাইগাওঁ জিলাৰ প্রতিনিধি সকলৰ উপস্থিতিত হোৱা উক্ত সভাত ব্যাকৰণ আৰু শব্দকোষৰ পাণ্ডুলিপি (খচৰা) ৰ বিষয়ে ৰাইজক অৱগত কৰোৱা হয়। কম সময়ৰ ভিতৰত অতি উদ্যমেৰে কৰা এই কঠোৰ শ্ৰমদানৰ বাবে সভাই লেখক সকলক ভূয়সী প্রশংসা কৰে। উক্ত সভাই গ্ৰহণ কৰা আন এক গুৰুত্বপূৰ্ণ প্ৰস্তাৱৰ বিষয়ে সদৰি কৰি সংগঠনটোৰ অধ্যক্ষ হৰমোহন মেধী আৰু সচিব প্রধান উৎপল সিংহই কয় যে অহা জানুৱাৰী মাহৰ শেষৰ সপ্তাহত বঙাইগাঁৱত “কোচ ৰাজবংশী ভাষা বন্দনা সমাৰোহ” শীৰ্ষক ভাষা ভিত্তিক এক কেন্দ্ৰীয় অনুষ্ঠানৰ আয়োজন কৰা হ’ব। এই সমাৰোহৰ তাৎপৰ্য্য বাখ্যা কৰি নেতাদ্বয়ে কয় যে এই সমাৰোহে কোচ ৰাজবংশী ৰাইজক মাতৃভাষাৰ প্ৰতি অধিক শ্রদ্ধাশীল সচেতন আৰু দায়িত্বশীল কৰি তুলিব। সর্বসাধাৰণ কোচ  ৰাজবংশী ৰাইজৰ মনত মাতৃভাষাৰ প্ৰতি থকা শ্রদ্ধা অকৃত্ৰিম আৰু তেওঁলোকৰ ভাষা সচেতনতাই আজি কোচ ৰাজবংশী ভাষাক জীয়াই ৰাখিছে। গ্ৰাম্যঞ্চলত এই “কোচ ৰাজবংশী ভাষাপ্ৰেম আৰু ভাষা সচেতনতাৰ দীক্ষা” অনানুষ্ঠানিক ভাৱে নীৰৱে চলি থাকে আৰু সেই বাবেই অন্য কোনো ভাষাই সহজতে সেই দীক্ষাৰ প্ৰাচীৰ ভাঙি গ্ৰাম্যঞ্চলত কোচ ৰাজবংশী ভাষাক বিদিৰ্ণ কৰিব পৰা নাই। ভাষা সাধকসকলে অপৰিসীম পৰিশ্ৰম আৰু সাধনাৰ জড়িয়তে নিজৰ সমস্ত চেতনাক প্ৰয়োগ কৰি ভাষাতত্ত্ব ৰচনা কৰে। এই ভাষাতত্ত্বক সাৰোগত কৰি কোচ ৰাজবংশী ৰাইজে কোচ ৰাজবংশী ভাষাক সবল কৰাৰ বাবে প্রয়োজন হৈছে এক ভাষাকেন্দ্রিক জাতীয় জাগৰণৰ। “কোচ ৰাজবংশী ভাষা বন্দনা সমাৰোহ” ৰ আয়োজনে

কোচ ৰাজবংশী ৰাইজৰ মাজত এই পৰিৱেশ ৰচনা কৰিব,য'ত গ্ৰাম্যঞ্চলত শ্ৰদ্ধাসহকাৰে অথচ নীৰৱে

চলি থকা ভাষা প্ৰেম আৰু ভাষা সচেতনতাৰ অনানুষ্ঠানিক দীক্ষাৰ দৰেই কোচ ৰাজবংশী ৰাইজক ভাষাৰ প্ৰতি অকৃত্ৰিমভাৱে শ্ৰদ্ধাশীল, সচেতন আৰু দায়িত্বশীল কৰি তুলিব। লগতে নেতাদ্বয়ে কয় যে ৰত্নপীঠ কলেজৰ উক্ত সভাতেই যোৱা ২৭ আৰু ২৮ আগষ্টত বঙাইগাওঁ জিলা পুথিভঁৰালত কোচ ৰাজবংশী ভাষাৰ ওপৰত অনুষ্ঠিত হোৱা আলোচনা চক্ৰত গৱেষণা পত্র পাঠ কৰা বিশিষ্ট ব্যক্তি সকলক সম্বৰ্ধণা আৰু মানপত্ৰ প্ৰদানো কৰে৷🔯