🔯বিজেপি চৰকাৰৰ প্ৰতাৰণাত ক্ষুদ্ধ আক্ৰাছুৰ পুনৰ আন্দোলনৰ কাৰ্যসূচী গ্ৰহণ🔯

🔯বিজেপি চৰকাৰৰ প্ৰতাৰণাত ক্ষুদ্ধ আক্ৰাছুৰ পুনৰ আন্দোলনৰ কাৰ্যসূচী গ্ৰহণ🔯

🔯হয় কোচ ৰাজবংশীসকলক জনজাতিকৰণৰ মৰ্যদা দিয়ক নহলে আমাক এটা এটাকৈ গুলিয়াই মাৰক🔯

🔯বৰ্তমানৰ চৰকাৰখনে এটা হিটলাৰী প্ৰশাসন চলাই আহিছে🔯

🔯কোচ ৰাজবংশী অধ্যূষিত অঞ্চলত বিজেপি দলৰ নেতা- পালিনেতাক প্ৰৱেশ কৰিবলৈ নিদিয়াৰ হুংকাৰ🔯

📝বঙাইগাঁও, ২২ নৱেম্বৰঃ অসমৰ বৃহৎ জনগোষ্ঠী কোচ ৰাজবংশী জনগোষ্ঠীটোক লৈ বিজেপি নেতৃত্বাধীন চৰকাৰখনে হেতালি খেলিব এৰা নাই। জনগোষ্ঠীটোৰ মৰ্ম বেদনা নুবুজি জনগোষ্ঠীটোক প্ৰাপ্য অধিকাৰৰ পৰা বঞ্চিত কৰি আহিছে ৷ এই মন্তব্য আক্ৰাছুৰ নেতৃত্বৰ ৷ মঙলবাৰে বঙাইগাঁও চহৰৰ বৰপাৰাস্থিত সংগঠনটোৰ মুখ্য কাৰ্যালয়ত আয়োজিত এখন সংবাদ মেলত আক্ৰাছুৰ সভাপতি ক্ষীতিশ বর্মন আৰু যুটীয়া সম্পাদক কপিল দেৱ সিংহ আৰু  পার্থজ্যোতি বৰাই এই মন্তব্য কৰে ৷ সংবাদ মেলত নেতাত্ৰয়ে কয় যে বিজেপি চৰকাৰে জনজাতিকৰণৰ প্ৰতিশ্ৰুতি প্ৰদান কৰিও আজিলৈকে সেই প্ৰতিশ্ৰুতি পূৰণ নকৰিলে ৷ গতিকে চৰকাৰৰ এনে প্ৰতাৰণাৰ বাবে সংগঠনটোৱে পুনৰ এলানি আন্দোলনৰ কাৰ্যসূচী গ্ৰহণ কৰিবলৈ বাধ্য হৈছে ৷ কাৰণ ২০১৪ চনত বঙাইগাঁওলৈ আহি দেশৰ প্ৰধান মন্ত্ৰী নৰেন্দ্ৰ মোদীয়ে নির্বাচনী জনসভাত কেন্দ্ৰত বিজেপি চৰকাৰ হলে মাত্র ছয় মাহৰ ভিতৰত কোচ ৰাজবংশীকসকলক জনজাতি দিব বুলি কোৱা প্ৰতিশ্ৰুতি আজি ফুটুকাৰ ফেনত পৰিণত হ'ল। আজি আঠ বছৰে বিজেপি নেতৃত্বাধীন কেন্দ্ৰীয় চৰকাৰে জনজাতিকৰণৰ কোনো বাস্তৱ সন্মত পদক্ষেপ নোলোৱাটো চৰম প্ৰতাৰণা। আনফালে জনজাতিকৰণৰ বাবে মন্ত্ৰীগোটৰ প্ৰতিবেদন বিচাৰি বিষয়টো ওলোমাই ৰাখিলে। তদানিন্তন ৰাজ্যৰ বিত্ত মন্ত্ৰী তথা বৰ্তমানৰ মুখ্যমন্ত্ৰী ডঃ হিমন্ত বিশ্ব শৰ্মাৰ নেতৃত্বত গঠন হোৱা মন্ত্ৰী গোটৰ প্ৰতিবেদন আজি পর্যন্ত দাখিল নহ'ল। কেৱল সেয়াই নহয়, দ্বিতীয় কার্যকালৰ বাবে শাসনৰ গাদীত বহা বিজেপি নেতৃত্বাধীন ৰাজ্য চৰকাৰেও হোহকা পিচলা নীতি গ্রহণেৰে জনজাতিকৰণৰ বিষয়টো সদায় জীয়াই ৰাখিব বিচৰাটো আমাৰ দৃষ্টিগোচৰ হৈছে। আমাৰ সমস্যা সমাধানৰ প্ৰতি কোনো গুৰুত্ব ৰাজ্য চৰকাৰখনেও দিয়া পৰিলক্ষিত হোৱা নাই । যোৱা অক্টোবৰ মাহত আক্ৰাছুৱে ঘোষণা কৰা আন্দোলন কাৰ্যসূচীৰ পৰিপ্ৰেক্ষিতত ৰাজ্য চৰকাৰখনৰ মুৰব্বী মুখ্যমন্ত্ৰী ডঃ হিমন্ত বিশ্ব শৰ্মাই নৱেম্বৰ মাহৰ ভিতৰত কেন্দ্ৰৰে ত্ৰিপাক্ষীক বৈঠক অনুষ্ঠিত কৰাৰ প্ৰতিশ্ৰুতি প্ৰদান কৰিছিল যদিও নৱেম্বৰ মাহ উকলি যাবৰ হ'ল, কিন্তু বৈঠক সন্দৰ্ভত নিমাত হৈ আছে ৰাজ্য চৰকাৰ। কোচ ৰাজবংশী সকলক সদায় হেয় প্রতিপন্ন কৰি অহা বিজেপি চৰকাৰখনে কেইটিমান টকাৰ বাবে কমতাপুৰ স্বায়ত্বশাসিত পৰিষদ দি কোচ ৰাজবংশী জনগোষ্ঠীটোক চৰম বঞ্চনা কৰি আহিছে। সেয়ে যোৱা ২০ নৱেম্বৰত গুৱাহাটীৰ জ্যোতি চিত্রবনত অনুষ্ঠিত আক্ৰাছু, চিলাৰায় সেনা আৰু মহিলা সমিতিৰ যৌথ উদ্যোগত অনুষ্ঠিত কাৰ্যনিৰ্বাইক সভাৰ সিদ্ধান্ত অনুসৰি জনজাতিকৰণ আৰু পৃথক কমতাপুৰ ৰাজ্যৰ দাবীত পুনৰ আন্দোলন কাৰ্যসূচী লোৱা হৈছে।

আন্দোলনৰ কাৰ্যসূচী অনুসৰি অহা ৬ ডিচেম্বৰত জিলাই জিলাই জোঁৰ লৈ সমদল, বিধানসভাৰ শীতকালীন অধিৱেশনত দিছপুৰ ঘেৰাও, ১১ জানুৱাৰীত ধুবুৰীৰ ছাগলীয়াত ১২ ঘন্টীয়া ৰাষ্ট্ৰীয় ঘাইপথ অৱৰোধ, ৩১ জানুৱাৰীত চিৰাঙৰ বাসুগাঁওত ১২ ঘন্টীয়া ৰে'লপথ অৱৰোধ, ফেব্ৰুৱাৰী মাহত বঙাইগাঁওত বিশাল গণসমাৱেশ অনুষ্ঠিত কৰা হ'ব বুলিও কয় ৷লগতে কোচ ৰাজবংশী জনগোষ্ঠীক লৈ হেতালি খেলা ৰাজনৈতিক দলৰ প্ৰতি নেতাত্ৰয়ৰ সকিয়নী ৰাজনীতি বহুত হ'ল, হয় সমস্যা সমাধান কৰক নহ'লে যিকোনো আন্দোলনৰ বাবে সাজু থাকক। কোচ ৰাজবংশী ছাত্ৰ সন্থাই বাৰম্বাৰ চৰকাৰৰ অনুৰোধ ৰক্ষা কৰি আলোচনাত বহি আহিছে , কিন্তু চৰকাৰে সেয়া আমাৰ দুৰ্বলতা বুলি ধৰি কোচ ৰাজবংশীক ঠগি আছে। এই আন্দোলনত সকলো ৰাইজক ওলাই আহি কোচ ৰাজবংশী জনগোষ্ঠীৰ প্ৰাপ্য অধিকাৰ আজুৰি অনাত অংশীদাৰ হবলৈকো আক্ৰাছুৰ নেতাত্ৰয়ে আহ্বান জনায় ৷ সংবাদ মেলত আক্ৰাছুৰ যুটীয়া সাধাৰণ সম্পাদক পাৰ্থজ্যোতি বৰাই ক্ষোভেৰে কয় যে বৰ্তমানৰ চৰকাৰখনে এটা হিটলাৰী প্ৰশাসন চলাই আহিছে ৷ বিগত সময়ত আমি যিসমূহ কাৰ্যসূচী হাতত লৈছো তাত তেওঁলোকে প্ৰশাসনতন্ত্ৰক ব্যৱহাৰ কৰি আমাৰ আন্দোলনক মষিমূৰ কৰাৰ বাবে চেষ্টা কৰিছে ৷ সেয়ে আমিও চৰকাৰক কঠোৰভাৱে ক'ব বিচাৰিছো যে আমাৰ যিসকল কেডাৰ আছে কেডাৰসকলেও জানে যে এই সংগ্ৰামৰ পথ কোনো কাৰণতে মসৃণ নহয় বৰং আমি এক কাঁইটিয়া পথ অতিক্ৰম কৰিব লাগিব ৷ গতিকে চৰকাৰে প্ৰশাসনতন্ত্ৰক ব্যৱহাৰ কৰি আমাৰ আন্দোলনক মষিমূৰ কৰিব বিচাৰিলেও কোনো কাৰণতে নোৱাৰে ৷ শদিয়াৰ পৰা ধুবুৰীলৈকে আমাৰ এক শক্তিশালী সংগঠন আছে আৰু এই শক্তি ব্যৱহাৰ কৰি এইবাৰ আমি চৰকাৰক মষিমূৰ কৰিম আৰু প্ৰতিহিত কৰিম ৷ লগতে চৰকাৰে যদি অতিশীঘ্ৰে জনজাতিকৰণৰ সন্দৰ্ভত ত্ৰিপাক্ষিক আলোচনা নকৰে বা কোনো বৈঠকৰ আহ্বান নজনায়, তেতিয়াহলে আমি জিলা পৰ্যায়ৰ পৰা ৰাজ্যিক পৰ্যায়লৈকে বিজেপি দলত যিসকল কোচ ৰাজবংশী নেতা জড়িত হৈ আছে সেই প্ৰতিজন ব্যক্তিৰে আমি ঘৰ ঘেৰাও কৰিবলৈ বাধ্য হ'ম ৷ সেইদৰে কোচ ৰাজবংশী অধ্যূষিত অঞ্চলতো বিজেপি দলৰ কোনো নেতা- পালিনেতাক প্ৰৱেশ কৰিবলৈ দিয়া নহ'ব বুলিও হুংকাৰ দিয়ে ৷ কাৰণ বিভিন্ন সময়ত যিহেতু আমাক তেওঁলোকে নানা কথাৰে আভুৱাভাৰি আহিছে, সেয়ে আমি আৰু তেনে কথা মানি নলওঁ বুলিও যুটীয়া সম্পাদগৰাকীয়ে স্পষ্ট কৰি দিয়ে ৷ আনহাতে আনগৰাকী যুটীয়া সম্পাদক কপিলদেৱ সিংহই কয় যে এই চৰকাৰে কেৱল প্ৰতিশ্ৰুতি প্ৰদান কৰে ৷ কিন্তু প্ৰতিশ্ৰুতি ৰক্ষা নকৰে ৷ সেয়ে আমি আক্ৰাছুৱে সিদ্ধান্ত গ্ৰহণ কৰিছো যে আমি আন্দোলন কৰিব লাগিব আৰু আন্দোলন কৰি এই চৰকাৰক হিলাই দিব লাগিব ৷ এই চৰকাৰে প্ৰতিশ্ৰুতিৰ বন্যা বোৱাই দিয়ে, পূৰণ নকৰে ৷ বৰং আশা দি দি পিচত আশাত চেঁচাপানী ঢালে ৷ আমি কেন্দ্ৰীয় কাৰ্যনিৰ্বাহক সভাত যি আন্দোলনৰ ক সিদ্ধান্ত লৈছো যে অসমৰ যিসকল কোচ ৰাজবংশী লোক আছে সকলোৱে ঐক্যবদ্ধ হ'ব লাগিব আৰু ঐক্যবদ্ধ হৈ কেন্দ্ৰীয় চৰকাৰেই হওক বা ৰাজ্য চৰকাৰেই হওক আমাক যি জনজাতিকৰণ প্ৰতিশ্ৰুতি দিছিল সেই প্ৰতিশ্ৰুতি যদি ২০২৪ চনৰ নিৰ্বাচনৰ পূৰ্বে পূৰণ নকৰে তেতিয়াহলে বিজেপি চৰকাৰক অসমৰ পৰা কেনেকৈ খেদি পঠিয়াব লাগে আমি দেখুৱাই দিম ৷ আক্ৰাছুৰ স্পষ্ট কথা হয় কোচ ৰাজবংশীসকলক জনজাতিকৰণৰ মৰ্যদা দিয়ক নহলে আমাক এটা এটাকৈ গুলিয়াই হত্যা কৰক ৷ আমি আৰু এনেকৈ আঠুকাঢ়ি জীয়াই থাকিব নোৱাৰো ৷ আমাক জীয়াই থকাৰ অধিকাৰ লাগে, আমাক জনজাতিকৰণ দিয়ক, কমতাপুৰ দিয়ক ৷ নহলে গুলিয়াই হত্যা কৰক বুলিও কয় ৷ সংবাদ মেলত সংগঠনটোৰ কেন্দ্ৰীয় সমিতিৰ কেইবাগৰাকীও বিষয়ববীয়া উপস্থিত আছিল🔯