🔯বঙাইগাঁৱত অমৃত কলহ যাত্ৰাৰ জিলা পৰ্যায়ৰ সভা অনুষ্ঠিত🔯

🔯বঙাইগাঁৱত অমৃত কলহ যাত্ৰাৰ জিলা পৰ্যায়ৰ সভা অনুষ্ঠিত🔯

📝 News4Bongaigaon: ২০ ছেপ্টেম্বৰ: 'মোৰ মাটি, মোৰ দেশ ' শীৰ্ষক কাৰ্যসূচীৰ অমৃত কলহ যাত্ৰা সন্দৰ্ভত মঙলবাৰে বঙাইগাঁও জিলা প্ৰশাসনৰ উদ্যোগত বীৰঝৰা পাব্লিক লাইব্ৰেৰী প্ৰেক্ষাগৃহত জিলা পৰ্যায়ৰ সভা এখন অনুষ্ঠিত হয়। সভাত জিলা আয়ুক্ত নৱদ্বীপ পাঠকে 'মোৰ মাটি, মোৰ দেশ' কাৰ্যসূচীৰ অমৃত কলহ যাত্ৰা সন্দৰ্ভত সবিশেষ ব্যাখ্যা দাঙি ধৰে। এই অমৃত কলহ যাত্ৰাৰ ক্ষেত্ৰত সমূহ ৰাইজৰ উল্লেখযোগ্য ভূমিকা আছে বুলি উল্লেখ কৰি তেওঁ কয় যে এয়া হৈছে জনভাগীদাৰী কাৰ্যসূচী। গতিকে সাধাৰণ নাগৰিক, গাঁও-পঞ্চায়তৰ প্ৰতিনিধি, আঞ্চলিক পঞ্চায়তৰ প্ৰতিনিধি, আত্ম-সহায়ক গোটৰ সদস্যা, সাংবাদিক, অন্যান্য সংস্থা, সাংস্কৃতিক কৰ্মী, খেলুৱৈ, জ্যেষ্ঠ নাগৰিক, পৌৰসভাৰ বিষয়ববীয়া, উন্নয়ন খণ্ডৰ বিষয়ববীয়া, সমাজকৰ্মীকে ধৰি সমাজৰ সকলো ব্যক্তিকে জড়িত কৰি এই অমৃত কলহ যাত্ৰাৰ অধীনত প্ৰতি ঘৰৰ পৰা এমুঠি মাটি বা চহৰত থকা যিসকল লোকৰ মাটি নাই তেওঁলোকৰ পৰা এমুঠি চাউল সংগ্ৰহ কৰি অমৃত কলহত লৈ আহিব লাগিব।সেই মাটিখিনি দুটা পিতলৰ কলহত জদমা কৰি গুৱাহাটীলৈ প্ৰেৰণ কৰা হ'ব। এই কলহ দুটাৰ এটা গুৱাহাটীত ৰখা হ'ব আৰু এটা কলহ দিল্লীলৈ লৈ যোৱা হ'ব। গুৱাহাটীলৈ নিয়া কলহৰ মাটি গহপুৰত নিৰ্মাণ কৰিবলগীয়া কনকলতা বিশ্ববিদ্যালয়ত ব্যৱহাৰ কৰা হ'ব। 

যিখিনি মাটি ৰৈ যাব সেইখিনি মাটি ৰাজ্যখনত আগলৈ নিৰ্মাণ কৰিবলগীয়া মহৎ অনুষ্ঠানত ব্যৱহাৰ কৰা হ'ব। আনহাতে দিল্লীলৈ লৈ যাবলগীয়া মাটিখিনি অমৃত উদ্যান নিৰ্মাণত ব্যৱহাৰ কৰা হ'ব। গতিকে এই কাৰ্যসূচীত সকলোৰে সহায়-সহযোগিতা কামনা কৰে জিলা আয়ুক্ত পাঠকে। জিলা পৰ্যায়ৰ এই সভাত বঙাইগাঁও বিধানসভা সমষ্টিৰ বিধায়ক ফণীভূষণ চৌধুৰীয়ে ভাষণ প্ৰসংগত স্বতঃস্ফুৰ্তভাৱে সকলোকে ওলাই আহি অমৃত কলহ যাত্ৰাত অংশগ্ৰহণ কৰিবলৈ আহ্বান জনায়। আনহাতে সমাজকৰ্মী হিমানী অধিকাৰীয়েও অমৃত কলহ যাত্ৰাত ৰাইজক 'মোৰ মাটি, মোৰ দেশ ' আৱেগেৰে ওলাই আহি এই কাৰ্যসূচী সফল কৰিবলৈ ভাষণ প্ৰসংগত আহ্বান জনায়। সভাত জিলা উন্নয়ন আয়ুক্ত ধ্ৰুৱজ্যোতি দাসেও বক্তব্য আগবঢ়ায়। অনুষ্ঠানৰ আঁত ধৰে অতিৰিক্ত জিলা আয়ুক্ত নিৰ্মালি বৰুৱাই।অনুষ্ঠানৰ অংশ হিচাপে প্ৰধানমন্ত্ৰী আৰু অসমৰ মুখ্যমন্ত্ৰীৰ ভাষণ আৰু মোৰ মাটি, মোৰ দেশ শীৰ্ষক গীত দৃশ্য-শ্ৰব্য মাধ্যমৰে বজোৱা হয়।🔯