🔯বঙাইগাঁও মহাবিদ্যালয়ক বিশ্ববিদ্যালয়লৈ উন্নীতকৰণ🔯

🔯বঙাইগাঁও মহাবিদ্যালয়ক বিশ্ববিদ্যালয়লৈ উন্নীতকৰণ🔯

🔯মুখ্যমন্ত্ৰীৰ বলিষ্ঠ পদক্ষেপক  প্ৰাক্তন ছাত্ৰ সন্মিলনীৰ আদৰণি🔯

📝News4Bongaigaon: ১৯ ছেপ্টেম্বৰঃ  বঙাইগাঁও মহাবিদ্যালয়ক শেহতীয়াভাৱে বিশ্ববিদ্যালয়লৈ উন্নীতকৰণ কৰাৰ বাবে মুখ্যমন্ত্ৰী তথা চৰকাৰখনক বঙাইগাঁও মহাবিদ্যালয় প্ৰাক্তন ছাত্ৰ সন্মিলনীয়ে আদৰণি তথা ধন্যবাদ জ্ঞাপন কৰিছে ৷ এই সন্দৰ্ভত মঙলবাৰে বৃহত্তৰ বঙাইগাঁও প্ৰেছ ক্লাবত বঙাইগাঁও মহাবিদ্যালয় প্ৰাক্তন ছাত্ৰ সন্মিলনীয়ে এখন সংবাদ মেল আয়োজন কৰি কয় যে বঙাইগাঁৱৰ ৰাইজৰ লগতে বিভিন্ন দল - সংগঠনে বঙাইগাঁও মহাবিদ্যালয়খনক বিশ্ববিদ্যালয়লৈ উন্নীতকৰণৰ বাবে দাবী জনাই আহিছিল ৷ এই দাবী জনোৱাসকলৰ ভিতৰত বঙাইগাঁও মহাবিদ্যালয় প্ৰাক্তন ছাত্ৰ সন্মিলনীও আছে ৷ অৱশেষত এই দীৰ্ঘদিনীয়া দাবীটো এইখন চৰকাৰে মানি ললে আৰু বঙাইগাঁও মহাবিদ্যালয়খনক বিশ্ববিদ্যালয়লৈ উন্নীতকৰণ কৰিলে ৷ বঙাইগাঁও মহাবিদ্যালয় প্ৰাক্তন ছাত্ৰ সন্মিলনীৰ কাৰ্যকৰী সভাপতি গোকুল কলিতা, উপ সভাপতিদ্বয় ক্ৰমে জ্যোতিৰ্ময় বৈশ্য , মুন্না তিৱাৰী আৰু সাধাৰণ সম্পাদক মৃন্ময় ভট্টাচাৰ্য উপস্থিত থকা সংবাদমেলত মুখ্যমন্ত্ৰী ডঃ হিমন্ত বিশ্ব শৰ্মাক ধন্যবাদ জনাই প্ৰক্তন ছাত্ৰ সন্মিলনীৰ তৰফৰ পৰা  কোৱা হয় যে মুখ্যমন্ত্ৰী গৰাকীৰ বলিষ্ঠ পদক্ষেপৰ বাবে বঙাইগাঁৱত বিশ্ববিদ্যালয় স্থাপনৰ কথা ঘোষণা কৰা সম্ভৱ হৈছে ৷ এইক্ষেত্ৰত বঙাইগাঁৱৰ অভিভাৱক মন্ত্ৰী ৰঞ্জিত কুমাৰ দাসৰ প্ৰতিও কৃতজ্ঞতা প্ৰকাশ কৰে প্ৰাক্তন ছাত্ৰ সন্মিলনীয়ে ।সংবাদমেলত উল্লেখ কৰা মতে বঙাইগাঁও মহাবিদ্যালয়ক প্ৰথমে বিশ্ববিদ্যালয়লৈ উন্নীতকৰণ কৰাৰ কথা ঘোষণা কৰা হৈছিল যদিও সেয়া পূৰ্ণাংগ পৰ্যায়ৰ বিশ্ববিদ্যালয় নাছিল ৷ সেয়ে বঙাইগাঁও মহাবিদ্যালয় প্ৰাক্তন ছাত্ৰ সন্মিলনীয়ে বিষয়টো মানি ল'ব পৰা নাছিল ৷ ইয়াৰ পিছত প্ৰাক্তন ছাত্ৰ সন্মিলনীৰ পক্ষৰ পৰা বঙাইগাঁও জিলাৰ অভিভাৱক মন্ত্ৰী ৰঞ্জিত কুমাৰ দাসক সাক্ষাৎ কৰা হৈছিল আৰু বিষয়টো অৱগত কৰা হৈছিল ৷ অভিভাৱক মন্ত্ৰী গৰাকীয়েও বিষয়টো গুৰুত্ব সহকাৰেলৈ মুখ্যমন্ত্ৰীৰ ওচৰত আলোচনাত মিলিত হৈছিল ৷ অৱশেষত  বঙাইগাঁৱত পূৰ্ণাংগ বিশ্ববিদ্যালয়  স্থাপনৰ কথা ঘোষণা কৰিছে মুখ্যমন্ত্ৰী গৰাকীয়ে ৷ যাৰ বাবে অভিভাৱক মন্ত্ৰী ৰঞ্জিত কুমাৰ দাসলৈকো ধন্যবাদ জনায় প্ৰাক্তন ছাত্ৰ সন্মিলনীৰ পক্ষৰ পৰা ৷ ইপিনে সংবাদ মেলত উল্লেখ কৰা মতে বঙাইগাঁও মহাবিদ্যালয়ৰ ভিতৰচ'ৰাত চলি থকা  কিছুমান অচলাৱস্থা আৰু সমস্যাৰ বিষয়ে অৱগত কৰি মুখ্যমন্ত্ৰীগৰাকী বঙাইগাঁওলৈ আহোতে প্ৰাক্তন ছাত্ৰ সন্মিলনীৰ পক্ষৰ পৰা স্মাৰকপত্ৰ প্ৰদান কৰিছিল ৷ স্মাৰক পত্ৰ গ্ৰহণ কৰি এই বিষয়ত মুখ্যমন্ত্ৰীয়ে ১৫ দিনৰ সময় বিচাৰিছিল ৷ কিন্তু ১৫ দিনৰ সময় কেতিয়াবাই উকলি গ'ল যদিও এই সমস্যা সমূহৰ সমাধান নহ'ল ৷ ইয়াৰ বাবে সংবাদমেলত প্ৰাক্তন ছাত্ৰ সন্মিলনীয়ে দুখ প্ৰকাশ কৰে ৷ লগতে অচিৰেই বঙাইগাঁও মহাবিদ্যালয়ৰ ভিতৰ চ'ৰাত চলি থকা সমস্যা সমূহ দূৰ কৰাৰ বাবে সংবাদ মেলযোগে দাবী জনায় ৷ আনহাতে বঙাইগাঁও বিশ্ববিদ্যালয়ৰ নাম সন্দৰ্ভত প্ৰাক্তন ছাত্ৰ সন্মিলনীয়ে কয় যে সেয়া চৰকাৰে সিদ্ধান্ত ল'ব ৷ আমাক এখন পূৰ্ণাংগ বিশ্ববিদ্যালয় লাগে ৷ নামটো কি হ'ব সেইলৈ আমাৰ কোনো ক'বলগীয়া নাই ৷