🔯কে এ চিত দুৰ্নীতিঃ বিজনীত কোচ ৰাজবংশী জাতীয় পৰিষদৰ সাধাৰণ সম্পাদক বিশ্বজিৎ ৰায়ৰ সংবাদ মেল🔯

📝News4Bongaigaon: ২০ ছেপ্টেম্বৰঃ: কমতাপুৰ স্বায়ত্ত্বশাসিত পৰিষদৰ অবাধ দুৰ্নীতি আৰু প্ৰধান সচিবৰ চহী জাল কৰি বহিঃৰাজ্যৰ কোম্পানীৰে প্ৰায় এশ কোটি টকাৰ শাড়ী আৰু ব্লাউজ যোগানৰ আৰক্ষীৰ তদন্তক লৈ বিজনীত কোচ ৰাজবংশী জাতীয় পৰিষদে বুধবাৰে এক সংবাদমেল অনুষ্ঠিত কৰে ৷ বিজনীত আয়োজিত সংবাদমেল যোগে কোচ ৰাজবংশী জাতীয় পৰিষদৰ সাধাৰণ সম্পাদক বিশ্বজিৎ ৰায়ে কমতাপুৰ স্বায়ত্তশাসিত পৰিষদৰ দুৰ্নীতি আৰু প্ৰধান সচিবৰ চহী জাল সম্পৰ্কত আৰক্ষীৰ তদন্তত সন্তুষ্ট নহয় বুলি দোহাৰি কোনো ৰাজনৈতিক শক্তিৰ হেঁচাত যাতে তদন্ত স্তব্ধ নহয় তাৰ বাবে চিবিআই ৰ তদন্ত দিবলৈ অসমৰ মুখ্যমন্ত্ৰী ড° হিমন্ত বিশ্ব শৰ্মাক দাবী জনায় ৷ বিশ্বজিৎ ৰায়ে কেএচিৰ প্ৰধান সচিবৰ চহী জাল কৰি আটক হোৱা বিজনীৰ পংজ দাস আৰু চিন্ময় সৰকাৰক সংবাদ মাধ্যমৰ পৰা আৰক্ষীয়ে আতৰাই ৰখাতো দুৰ্ভাগ্যজনক বুলি আখ্যা দিয়াৰ লগতে আটকাধীন চিন্ময় সৰকাৰক অধিক তথ্যৰ বাবে আৰক্ষীৰ জিম্মাত নাৰাখি আটক কৰাৰ পিছদিনাই জেল হাজতলৈ প্ৰেৰণ কৰাতো এক অবুজ সাথৰ বুলি কয় । ৰাজনৈতিক হেচাত পৰি আৰক্ষীয়ে চিন্ময় সৰকাৰক অধিক জেৰাৰ পৰা আঁতৰাই ৰাখিলে নেকি বুলিও সন্দেহ প্ৰকাশ কৰে ৷ লগতে অসম চৰকাৰৰ এগৰাকী উচ্চপদস্থ আমোলাৰ চহী জাল কৰি আৰক্ষীৰ হাতত আটক হোৱা চিন্ময় সৰকাৰৰ শাসকীয় বিজেপি দলৰ বিজনীৰ বিধায়ক অজয় ৰায়ৰ সৈতে অতি ঘনিষ্ঠ সম্পৰ্ক থকা বুলিও জাতীয় পৰিষদৰ সাধাৰণ সম্পাদকগৰাকীয়ে অভিযোগ উত্থাপন কৰে । সংবাদ মেলত বিজেপি বিধায়কজনৰ সৈতে চিন্ময় সৰকাৰৰ একেলগে উঠা ফটোও প্ৰদৰ্শন কৰে ৷ সেয়ে চিন্ময় সৰকাৰৰ স'তে বিধায়ক গৰাকীৰ কি সম্পৰ্ক তাক ৰাজহুৱাকৈ স্পষ্টিকৰণ দিবলৈকো বিধায়ক গৰাকীক সংবাদমেল যোগে বিশ্বজিৎ ৰায়ে আহ্বান জনায় ৷ বিশ্বজিৎ ৰায়ে শাড়ী, ব্লাউজৰ উপৰি ছাতি আৰু আন আন সামগ্ৰী যোগানৰ নামতো দুৰ্নীতি তথা অনিয়ম সংঘটিত হোৱা বুলিও সন্দেহ প্ৰকাশ কৰে । এই সম্পৰ্কে বিশ্বজিৎ ৰায়ে কেএচিত আৰু ক'ত ক'ত দুৰ্নীতি তথা অনিয়ম সংঘটিত হৈছে তাৰ তথ্য সংগ্ৰহ কৰি অচিৰেই ৰাজহুৱা কৰিব বুলিও সংবাদ মেলত উল্লেখ কৰে ৷ সেইদৰে কেএচিৰ দুৰ্নীতি আৰু প্ৰধান সচিবৰ চহী জাল কৰি ভুৱা ৱাৰ্ক অৰ্ডাৰ উলিওৱা বিষয়টোত কোচ ৰাজবংশী দল- সংগঠন আৰু বিৰোধী ৰাজনৈতিক দল সমূহৰ নিৰ্লিপ্ততাক দুৰ্ভাগ্যজনক বুলি আখ্যা দিয়ে বিশ্বজিৎ ৰায়ে।🔯