🔯বঙাইগাঁও নামঘৰত দুদিনীয়া কাৰ্যসূচীৰে মহাপুৰুষ শ্ৰীমন্ত শংকৰদেৱৰ ৫৭৫ সংখ্যক জন্মোৎসৱ উদযাপনৰ প্ৰস্তুতি🔯

🔯বঙাইগাঁও নামঘৰত দুদিনীয়া কাৰ্যসূচীৰে মহাপুৰুষ শ্ৰীমন্ত  শংকৰদেৱৰ ৫৭৫ সংখ্যক জন্মোৎসৱ উদযাপনৰ প্ৰস্তুতি🔯 

📝News4Bongaigaon: ২১ ছেপ্টেম্বৰঃ বিগত বছৰসমূহৰ দৰে এইবেলিও ২৩ আৰু ২৪ ছেপ্টেম্বৰত বঙাইগাঁও নামঘৰ প্ৰাংগণত দুদিনীয়া কাৰ্যসূচীৰে জগতগুৰু শ্ৰীমন্ত শংকৰদেৱৰ ৫৭৫ সংখ্যক জন্মোৎসৱ উদযাপিত হ'ব ৷ বঙাইগাঁও নামঘৰ সমিতিৰ সভাপতি মৃণাল অধিকাৰী আৰু সাধাৰণ সম্পাদক প্ৰদীপ মহন্তই জানিবলৈ দিয়া মতে ইতিমধ্যে এই জন্মোৎসৰ কাৰ্যসূচী সফলভাৱে পৰিচালনাৰ বাবে প্ৰমোদ কুমাৰ বৰুৱাক সভাপতি আৰু প্ৰণৱ দাসক সাধাৰণ সম্পাদক হিচাপেলৈ এখন উদযাপন সমিতি গঠন কৰা হৈছে ৷ সেইদৰে প্ৰস্তুত কৰি উলিওৱা হৈছে কাৰ্যসূচীও ৷ কাৰ্যসূচী অনুসৰি ২৩ ছেপ্টেম্বৰৰ পুৱা ৮ বজাত পুৱাৰ প্ৰসংগ আৰু ভাগৱত পাঠ, আবেলি ৩ বজাত বঙাইগাঁও নামঘৰৰ আইসকলৰ নাম , সন্ধিয়া ৬ বজাত নাম -প্ৰসংগ আৰু ভাগৱত পাঠ কাৰ্যসূচী অনুষ্ঠিত হ'ব ৷ আনহাতে ২৪ ছেপ্টেম্বৰৰ পুৱাৰ ভাগত ঊষা কীৰ্তন, পুৱাৰ প্ৰসংগ, ভাগৱত পাঠ আৰু ভাগৱত লৈ শোভাযাত্ৰা উলিওৱা হ'ব ৷ পুৱা ৮ঃ ৩০ বজাত বৈকুণ্ঠ মহন্তই উদ্বোধন কৰিবলগীয়া ভাগৱত শোভাযাত্ৰাৰ আগ ধৰিব নীৰেন চন্দ্ৰ ৰায়ে ৷ পুৱা ১১ বজাত গছপুলি ৰোপণ কাৰ্য্যসূচীৰ শুভাৰম্ভ কৰিব ভবানী দাসে আৰু দিনৰ ১২ বজাত অনুষ্ঠিত হ'ব ধৰ্মালোচনী সভা ৷ সভাত  বঙাইগাঁও জিলাৰ বইটামাৰীৰ ইন্দিৰা গান্ধী মহাবিদ্যালয়ৰ সহকাৰী অধ্যাপিকা ডঃব্যঞ্জনা চক্ৰৱৰ্তীয়ে নিৰ্দ্দিষ্ট বক্তা হিচাপে উপস্থিত থাকিব ৷ আবেলি ১ঃ৩০ বজাত থিয়নাম আৰু সন্ধিয়া ৫৭৫ গচি বন্তি প্ৰজ্বলন কৰা হ'ব ৷ বন্তি প্ৰজ্বলন কাৰ্য্যসূচীত কৌশল্যা ৰায়ে মুখ্য প্ৰজ্বলক হিচাপে উপস্থিত থাকি বন্তি প্ৰজ্বলন কাৰ্যসূচীৰ শুভাৰম্ভ কৰিব ৷