🔯কবি-সাহিত্যিক, বুৰঞ্জীবিদ শশীভূষণ ফৌজদাৰক সুঁৱৰি কাকেয়াৰ পাৰত কবিতাৰ গুঞ্জন🔯

🔯কবি-সাহিত্যিক, বুৰঞ্জীবিদ শশীভূষণ ফৌজদাৰক সুঁৱৰি কাকেয়াৰ পাৰত কবিতাৰ গুঞ্জন🔯

📝News4Bongaigaon: ২৩ ডিচেম্বৰঃ "আজিৰ যুগৰ চিন্তাৰ লগত সমানে ফেৰ মাৰি তাহানিতে কবি-সাহিত্যিক, বুৰঞ্জীবিদ শশীভূষণ ফৌজদাৰে সেই চিন্তা কৰি সমাজখনক বহু কিবাকিবি দি গৈছে ৷ তেখেতে অসমীয়া সাহিত্য জগতলৈ এক অনন্য অৱদান দি গৈছে ৷ " অসমীয়া প্ৰতিদিন কাকতৰ জ্যেষ্ঠ সাংবাদিক, বিশিষ্ট লেখক ৰঞ্জিত কুমাৰ শৰ্মাই আজি কাকৈজানা শতদল শাখা সাহিত্য সভাই উজান ৰাভাপাৰা গাঁও উন্নয়ন সমিতিৰ সহযোগত কাকৈজানা উজান ৰাভাপাৰা পৰ্যটন স্থলীত অনুষ্ঠিত  " কবি-সাহিত্যিক, বুৰঞ্জীবিদ শশীভূষণ ফৌজদাৰ শ্ৰদ্ধাৰ্ঘ অনুষ্ঠান আৰু কাকেয়াৰ পাৰত কবিতাৰ গুঞ্জন" অনুষ্ঠানত বিশিষ্ট অতিথি হিচাপে উপস্থিত থাকি এই মন্তব্য কৰে ৷ 

কাকৈজানা শতদল সাহিত্য সভাৰ সভাপতি হেমেন সিংহৰ সভাপতিত্বত অনুষ্ঠিত অনুষ্ঠানৰ আৰম্ভণিতে বঙাইগাঁও জিলা সাহিত্য সভাৰ প্ৰাক্তন উপ সভাপতি বিশিষ্ট সাহিত্যসেৱী অমৃত ভূষণ ফৌজদাৰে শশীভূষণ ফৌজদাৰৰ প্ৰতিচ্ছবিত মাল্যাৰ্পণ কৰি প্ৰয়াত কবি-সাহিত্যিক গৰাকীলৈ শ্ৰদ্ধাৰ্ঘ জনায় ৷ শ্ৰদ্ধাঞ্জলি জনাই বৰেশ্য সাহিত্যিক গৰাকীৰ ব্যক্তিত্ব আৰু ভাষা-সাহিত্যলৈ যোগোৱা  বহুমূলীয়া অৱদানৰ কথা আলোকপাত কৰে ৷ বঙাইগাঁও জিলা সাহিত্য সভাৰ উপ সভাপতি ভৱেশ্বৰ ৰাভাৰ সঞ্চালনাত অনুষ্ঠিত কবি সন্মিলনত ২১ গৰাকী স্থানীয় ন-পুৰণি কবিয়ে কবিতা পাঠ কৰে৷ পঠিত কবিতা সমূহৰ আলোচনা আগবঢ়ায় পণ্ডিত দীনদয়াল উপধ্যায় আদৰ্শ মহাবিদ্যালয়ৰ অসমীয়া বিভাগৰ সহযোগী অধ্যাপিকা ডঃ বনলতা দাসে ৷ অনুষ্ঠানত প্ৰবীণ লেখক কালীন্দ্ৰ দেৱ শৰ্মাৰ নৱতম গ্ৰন্থ "মানুহ আৰু জীৱকূল" উন্মোচন কৰে বিশিষ্ট অতিথি ৰঞ্জিত কুমাৰ শৰ্মাই ৷ 

অনুষ্ঠানত জ্যেষ্ঠ নাগৰিক ক্ৰমে মনেশ্বৰ ৰাভা, ভাওৰীয়া ৰাভা, সম্বাৰু ৰাভা, লিপচৰণ ৰাভা আৰু সমেশ্বৰ ৰাভাক শাখা সাহিত্য সভাই সম্বৰ্ধনা জনায় ৷ অনুষ্ঠানত বঙাইগাঁও জিলা সাহিত্য সভাৰ সভাপতি ৰোহিনী কুমাৰ চৌধুৰী ,  অসম সাহিত্য সভাৰ প্ৰাক্তন কাৰ্যনিৰ্বাহক সদস্য কামাখ্যা প্ৰসাদ ৰায়, কাকৈজানা হাইস্কুলৰ প্ৰাক্তন প্ৰধান শিক্ষক দ্বিজেশ নাৰায়ণ সিংহ,  কবি ভূপেন অৰণ্যম, জিলা সভাৰ সাংগঠনিক সম্পাদক ডালিম কুমাৰ সিংহ প্ৰমুখ্যে বিশিষ্ট ব্যক্তিসকল উপস্থিত থাকে ৷ অনুষ্ঠানৰ আঁত ধৰাৰ লগতে শলাগ জ্ঞাপন কৰে শতদল শাখা সভাৰ সম্পাদক পূৰণ চন্দ্ৰ বৰ্মনে ৷