🔯বঙাইগাঁও জিলাত ১৪৪ ধাৰা জাৰি🔯

🔯বঙাইগাঁও জিলাত ১৪৪ ধাৰা জাৰি🔯 

🔯সুৰাপান কৰি বাহন চলোৱা, বাইকত দুজন আৰোহী উঠাত নিষেধাজ্ঞা🔯

📝News4Bongaigaon: ২৩ ডিচেম্বৰ: নৱবৰ্ষ  উদযাপনৰ বাবে বহু যুৱকে সুৰাপান কৰি বাইক চলায় বা নিজৰ লগতে দ্বিতীয় এজন আৰোহীও বাইকত লৈ যায়। তদুপৰি উৎসৱ বা বনভোজ বুলি উচ্চ স্বৰত মাইক বা ডি জে আদি বজাই বনভোজ থলী বা অহা-যোৱা বাটত কোলাহলৰ সৃষ্টি কৰে যাৰ ফলত পঢ়া-শুনাৰ পৰিৱেশ আৰু হাস্পতালত থকা ৰোগীৰ বাবে অশান্তিকৰ পৰিৱেশ সৃষ্টি কৰে। গতিকে এনেধৰণৰ কোলাহল বাৰন কৰিবলৈ আৰু সুৰাপান কৰি গাড়ী চলাই দুৰ্ঘটনাগ্ৰস্ত হোৱাৰ  পৰা যথাসম্ভৱ বচাবলৈ লগতে জনসাধাৰণৰ মাজত শান্তি-শৃংখলা বজাই ৰাখিবলৈ বঙাইগাঁও জিলাৰ জিলা দণ্ডাধীশ নৱদ্বীপ পাঠকে ফৌজদাৰী আইনৰ ১৪৪ ধাৰাৰ অধীনত সমগ্ৰ জিলাখনত প্ৰযোজ্য হোৱাকৈ কেবাটাও নিষেধাজ্ঞা জাৰি কৰিছে।এই নিষেধাজ্ঞাৰ অধীনত সুৰাপান কৰি বাইক চলোৱা বা বাইকত দুজন আৰোহী উঠা আৰু অন্য গাড়ীও মদ্যপান কৰি চলোৱাত নিষেধ কৰিছে। আনহাতে বাইক নিজৰ মতে বনাই লৈ বাইক ষ্টান্ট কৰাটোও নিষেধ কৰিছে জিলা দণ্ডাধীশৰ এই নিষেধাজ্ঞাৰ অধীনত। তদুপৰি উচ্চ স্বৰত মাইক, ডি জে আদি বজাই আৰু ৰাজহুৱা পথ আৰু বনভোজ থলী আদি ৰাজহুৱা স্থানত ফটকা আদি ফুটাই শব্দ প্ৰদুষণ কৰাটোও শব্দ প্ৰদুষণ আইন(ৰেগুলেশ্যন এণ্ড কন্ট্ৰল),২০০০ ৰ অধীনত নিষেধ কৰিছে জিলাখনত। এই নিষেধাজ্ঞা তৎকালীনভাৱে বলবৎ হ'ব আৰু পৰৱৰ্তী নিৰ্দেশনা নিদিয়া পৰ্যন্ত বাহাল থাকিব। এই নিষেধাজ্ঞা উলংঘা কৰিলে ভাৰতীয় দণ্ডবিধিৰ ১৮৮ ধাৰাৰ অধীনত শাস্তিমূলক ব্যৱস্থা গ্ৰহণ কৰা হ'ব বুলি নিৰ্দেশনাটোত কোৱা হৈছে। অৱশ্যে এই নিষেধাজ্ঞা সম্পৰ্কত কাৰোবাৰ কিবা আপত্তি বা আবেদন থাকিলে সংশ্লিষ্ট কৰ্তৃপক্ষৰ ওচৰত জনাব পাৰিব।