🔯স্বাধীনতাৰ সুদীৰ্ঘ পয়সত্তৰটা বছৰে পশ্চিম অসমৰ ভূমিপুত্ৰ কোচ ৰাজবংশী আৰু অন্যান্য খিলঞ্জীয়া জাতি- জনগোষ্ঠীসমূহক নিঃশেষ কৰাৰ ব্লুপ্ৰিণ্টৰ অভিযোগ🔯

🔯স্বাধীনতাৰ সুদীৰ্ঘ পয়সত্তৰটা বছৰে পশ্চিম অসমৰ ভূমিপুত্ৰ কোচ ৰাজবংশী আৰু অন্যান্য খিলঞ্জীয়া জাতি- জনগোষ্ঠীসমূহক নিঃশেষ কৰাৰ ব্লুপ্ৰিণ্টৰ অভিযোগ🔯

🔯সাত জানুৱাৰীত বঙাইগাঁৱত কোচ ৰাজবংশী জাতীয় পৰিষদৰ উদ্যোগত ৰাজনৈতিক অভিৱৰ্তনৰ জৰিয়তে নতুন আঞ্চলিক ৰাজনৈতিক দল খোলাৰ পূৰ্ণ প্ৰস্তুতি🔯

📝:News4Bongaigaon: ২৩ ডিচেম্বৰ: স্বাধীনতাৰ সুদীৰ্ঘ পয়সত্তৰটা বছৰে পশ্চিম অসমৰ বিশেষকৈ একালৰ বৰনগৰ ওৰফে সৰভোগ আৰু অবিভক্ত গোৱালপাৰা জিলাৰ ভূমিপুত্ৰ কোচ ৰাজবংশী আৰু অন্যান্য খিলঞ্জীয়া জাতি জনগোষ্ঠীৰ  আৰ্থ- সামাজিক, শৈক্ষিক, সাংস্কৃতিক তথা জনগোষ্ঠীসমূহে সন্মুখীন হোৱা অস্তিত্বৰ সংকটৰ পৰা ৰক্ষা কৰিবলৈ যি সাংবিধানিক ৰক্ষা কৱচ প্ৰদানৰ ক্ষেত্ৰত প্ৰত্যেকটো  ৰাজনৈতিক দলে পিঠি দি খিলঞ্জীয়া জাতি জনগোষ্ঠী সমূহক নিঃশেষ কৰাৰ ব্লুপ্ৰিণ্ট প্ৰস্তুত কৰাৰ অভিযোগ কৰি এই জাতি জনগোষ্ঠীসমূহৰ সাংবিধানিক ৰক্ষা কৱচ, আত্মনিয়ন্ত্ৰৰ অধিকাৰৰ সন্দৰ্ভত ৰাজনৈতিক ভাৱে মাত মাতিবলৈ এই অৱহেলিত অঞ্চলটোৰ জনসাধাৰণৰ হকে এক আঞ্চলিক ৰাজনৈতিক দল গঠনৰ বাহিৰে অন্য বিকল্প পথ নাই বুলি মন্তব্য কৰিছে কোচ ৰাজবংশী জাতীয় পৰিষদে ৷ শনিবাৰে বৃহত্তৰ বঙাইগাঁও প্ৰেছ ক্লাৱত অনুষ্ঠিত এখন সংবাদ মেলযোগে এক প্ৰেছ বিজ্ঞপ্তিত কোচ ৰাজবংশী জাতীয় পৰিষদৰ সাধাৰণ সম্পাদক বিশ্বজিৎ ৰায়ে আগন্তুক ইংৰাজী নতুন বৰ্ষৰ সাত জানুৱাৰীত বঙাইগাঁও চহৰৰ হোটেল জাহ্নৱী ৰিজেঞ্চিৰ কনফাৰেন্স কক্ষত কোচ ৰাজবংশী জাতীয় পৰিষদৰ উদ্যোগত আন আন জনগোষ্ঠীৰ প্ৰতিনিধিৰ উপস্থিতিত এক ৰাজনৈতিক অভিৱৰ্তনৰ জৰিয়তে এটি নতুন আঞ্চলিক ৰাজনৈতিক দল খোলাৰ পূৰ্ণ প্ৰস্তুতি চলা বুলি উল্লেখ কৰে । জাতীয় পৰিষদৰ সহকাৰী সাধাৰণ সম্পাদকদ্বয় জগন্নাথ ৰায় আৰু ভূপেন ৰায় উপস্থিত থকা সংবাদ মেলত বিশ্বজিৎ ৰায়ে কোচ ৰাজবংশী জাতীয় পৰিষদৰ উদ্যোগত অনুষ্ঠিত হ'বলগীয়া এই ৰাজনৈতিক অভিবৰ্তনখনত কোচ ৰাজবংশী জনগোষ্ঠীৰ সকলো সচেতন জাতীয় সংগঠন আৰু অন্যান্য নিপীড়িত খিলঞ্জীয়া জাতি জনগোষ্ঠীৰ সচেতন ৰাইজক সহায় সহযোগিতা কৰিবলৈকো আহ্বান জনায় ৷ সংবাদ মেলত ৰায়ে কোচ ৰাজবংশী জনগোষ্ঠীক জনজাতিকৰণৰ নামত আভুৱাভাৰি অবিভক্ত গোৱালপাৰা জিলাৰ অংশ বিশেষক লৈ শাসনাধিষ্ঠ বিজেপি চৰকাৰে কোচ ৰাজবংশীক আত্মনিয়ন্ত্ৰৰ অধিকাৰ প্ৰদানৰ নামত তথাকথিত কমতাপুৰ স্বায়ত্ব শাসিত পৰিষদ নামৰ পুতলা স্বায়ত্ব শাসন প্ৰতিষ্ঠাৰে এচাম দুৰ্নীতিগ্ৰস্ত লোকৰ হাতত ক্ষমতাৰ বাঘজৰীডাল তুলি দি কিদৰে পৰ্বতসম দুৰ্নীতিত লিপ্ত হৈ পৰিছে সেয়া সৰ্বজন জ্ঞাত বুলি কয়। কেএচিৰ দুৰ্নীতি আৰু ভুৱা চহী কৰি লক্ষ লক্ষ টকা আত্মসাৎ কৰাৰ বাবে ইতিমধ্যে দুজনকৈ কাৰ্যবাহী পাৰিষদক আৰক্ষীয়ে গ্ৰপ্তাৰ কৰি জেল হাজতলৈ প্ৰেৰণ কৰিবলগীয়া হোৱাতো চৰম লজ্বাজনক বুলি উল্লেখ কৰে। ইয়াৰ উপৰিও পৰিষদৰ বেছিভাগ বিভাগতে বিভিন্ন ভুৱা আঁচনিৰ জৰিয়তে পৰিষদৰ উন্নয়নৰ টকা আত্মসাৎ কৰিছে বুলি অভিযোগ কৰি এই সম্পৰ্কে তথ্য জনাৰ অধিকাৰ আইনৰ জৰিয়তে ২০-২১, ২২-২৩ বৰ্ষত কেএচিত কিমান টকা অসম চৰকাৰে প্ৰদান কৰিছিল, কি কি আঁচনিৰ ৰূপায়ণ কৰিলে আদি তথ্য বিচৰা হৈছিল যদিও পাৰিষদখনে দিব নোৱাৰিলে বুলিও কয়। লগতে এই সমস্ত বিষয়ৰ তদন্ত কৰি দুৰ্নীতিত লিপ্ত হোৱা সকলোৰ বিৰুদ্ধে আইনগত ব্যৱস্থা লোৱাৰ উপৰিও অন্তৰ্ৱৰ্তীকালিন কমতাপুৰ স্বায়ত্বশাসিত পাৰিষদখন ভংগ কৰি নতুনকৈ গঠন কৰিবলৈ মুখ্যমন্ত্ৰী ড৹ হিমন্ত বিশ্ব শৰ্মাক স্মাৰকপত্ৰ যোগে আবেদন কৰা হৈছিল যদিও মুখ্যমন্ত্ৰীয়ে কোনো গুৰুত্ব প্ৰদান নকৰি ৰং চাই থাকিল ৷ আনহাতে অন্যান্য আঞ্চলিক ৰাজনৈতিক দল সমূহে 'কা' আন্দোলনৰ সময়চোৱাত ৰাজ্য সভাত ছয় জনগোষ্ঠীৰ জনজাতিকৰণৰ বিলখন উত্থাপন হোৱাৰ পিছতেই জনজাতিকৰণৰ বিৰোধীতাত প্ৰধান মন্ত্ৰী আৰু গৃহ মন্ত্ৰীক সাক্ষাৎ কৰি ছয় জনগোষ্ঠীৰ জনজাতিকৰণৰ বিষয়টোক বাঞ্চাল কৰিবলৈ তদানীন্তন অসমৰ স্বাস্থ্য মন্ত্ৰীক অধ্যক্ষ হিচাপে লৈ মন্ত্ৰী গোট গঠন কৰি কিদৰে ষড়যন্ত্ৰত লিপ্ত হৈছিল তাক উল্লেখ কৰি ক্ষোভ প্ৰকাশ কৰে । বিশ্বজিৎ ৰায়ে পৰবৰ্তীকালত ড৹ হিমন্ত বিশ্ব শৰ্মাৰ অধ্যক্ষতাত জনজাতিকৰণৰ বিষয়টোক কিদৰে ওলোমাই ৰাখি বিশ্বাসঘাতকতা কৰিছে সেয়া ৰাইজক নতুন কৈ কোৱাৰ প্ৰয়োজন নাই বুলিও দেহাৰে । ৰায়ে পশ্চিম অসমৰ বৃহত্তৰ অঞ্চলৰ অৱহেলিত নিপীড়িত জাতি জনগোষ্ঠী তথা সৰ্বসাধাৰণ জনসাধাৰণৰ ৰাজনৈতিক সংৰক্ষণ, অধিকাৰ সুপ্ৰতিষ্ঠিত কৰিবলৈ অঞ্চলটোত এক আঞ্চলিক ৰাজনৈতিক দলৰ অতীব প্ৰয়োজনীয়তাৰ  প্ৰতি লক্ষ্য ৰাখিয়েই অহা সাত জানুৱাৰীত আহ্বায়িত ৰাজনৈতিক অভিবৰ্তনখনতেই কমতাপুৰ ডেম'ক্ৰেটিক ফ্ৰন্ট (কেডিএফ) নতুবা কমতাপুৰ পিপুলছ ফ্ৰন্ট (কেপিএফ) নামৰে এটা নতুন আঞ্চলিক ৰাজনৈতিক দল গঠনৰ কথাও সদৰি কৰে ৷