🔯মই লোকসভা নিৰ্বাচনত প্ৰতিদ্বন্দ্বিতা নকৰো- ফণীভূষণ চৌধুৰী🔯

🔯মই লোকসভা নিৰ্বাচনত প্ৰতিদ্বন্দ্বিতা নকৰো- ফণীভূষণ চৌধুৰী🔯

🔯বৰপেটা লোকসভা সমষ্টিৰ পৰা অগপই নিৰ্বাচন খেলাটো ৯৯ শতাংশ নিশ্চিত🔯 

📝News4Bongaigaon: ২৬ ডিচেম্বৰঃ মই লোকসভা নিৰ্বাচনত প্ৰতিদ্বন্দ্বিতা নকৰো ৷ এই মন্তব্য অগপ দলৰ জ্যেষ্ঠ নেতা তথা বঙাইগাঁও বিধানসভা সমষ্টিৰ বিধায়ক ফণীভূষণ চৌধুৰীৰ ৷ মঙলবাৰে বঙাইগাঁৱত খেল মহাৰণৰ জিলা পৰ্য্যায়ৰ শুভাৰম্ভণি অনুষ্ঠানত উপস্থিত থকা বিধায়কগৰাকীক সাংবাদিকে শেহতীয়াভাৱে ৰাজনৈতিক মহলত আগন্তুক লোকসভা নিৰ্বাচনত বৰপেটা লোকসভা সমষ্টিৰ পৰা বিধায়কগৰাকীক প্ৰাৰ্থিত্ব প্ৰদান কৰা হ'ব বুলি চলি থকা চৰ্চা সন্দৰ্ভত তেওঁ এই মন্তব্য কৰে ৷ বিধায়ক ফণীভূষণ চৌধুৰীয়ে কয় যে মই বিধায়ক হৈয়ে আছো ৷ কোনোবাই হয়তো কৈছে বা তেনে ধৰণৰ চিন্তা- চৰ্চা কৰিছে ৷ কিন্তু মই তেনে ধৰণৰ চিন্তা - চৰ্চা কৰা নাই আৰু মই লোকসভা নিৰ্বাচনত প্ৰতিদ্বন্দ্বিতা নকৰো ৷ আমাৰ ভালে কেইগৰাকী প্ৰাৰ্থিত্ব প্ৰত্যাশী আছে বুলিও কয় ৷ তেওঁ লগতে  কয় যে বৰপেটা লোকসভা সমষ্টিটো আমি অসম গণ পৰিষদ দলে পাম বুলি আশা কৰিছো আৰু আমি অসম গণ পৰিষদ দলে পাম বুলি দৃঢ় বিশ্বাস ৷ অসম গণ পৰিষদ দলে পালে আমাৰ মাজত ভালেকেইজন প্ৰাৰ্থী আছে আৰু তাৰ মাজৰ পৰা ফণীভূষণ চৌধুৰীক বাদ দি এজনক বাছনি কৰিব ৷ মিত্ৰ দলৰ পক্ষৰ পৰা মোৰ নাম প্ৰক্ষেপ কৰাৰ প্ৰশ্নই নুঠে ৷ কাৰণ আসনখন পাম অগপই ৷ গতিকে অসম গণ পৰিষদ দলৰ পৰাই প্ৰাৰ্থী প্ৰক্ষেপ কৰিব ৷ সেয়ে তেওঁৰ নামটোৱে উচ্চাৰিত হ'ব নেলাগিছিল বুলি কয় ৷ কোনে নিৰ্বাচন খেলিব বা নেখেলিব বৰ্তমান সময়ত কোনো কথা প্ৰকাশ নকৰে বুলি মন্তব্য কৰি বিধায়কগৰাকীয়ে লগতে কয় যে দলৰ পৰা পাঁচ - ছয়জনমান প্ৰাৰ্থিত্ব প্ৰত্যাশী আছে ৷ যেনে পাঠশালৰ ফালৰ পৰা আছে, সৰুক্ষেত্ৰীত আছে, বৰপেটাত আছে বুলি উল্লেখ কৰি প্ৰাৰ্থিত্ব প্ৰত্যাশীৰ সংখ্যা পাঁচ- ছয়জনমান হ'ব বুলি কয় ৷ দলে যিহেতু আবেদন বিচৰা নাই,সেয়ে আজিৰ সময়ত কোনে প্ৰাৰ্থী হ'ব ক'ব পৰা নাযায় বুলি মন্তব্য কৰি ফণীভূষণ চৌধুৰীয়ে অসম গণ পৰিষদ দলৰ প্ৰাৰ্থী হিচাপে লোকসভা নিৰ্বাচনত প্ৰতিদ্বন্দ্বিতাত নানামে বুলিও স্পষ্ট কৰি দিয়ে ৷ এই সন্দৰ্ভত বিধায়কগৰাকীয়ে কয় যে ইতিমধ্যে দলত এক সিদ্ধান্ত হৈছে যে বৰ্তমান যিসকল বিধায়ক হৈ আছে, তেওঁলোকে লোকসভা নিৰ্বাচনত প্ৰতিদ্বন্দ্বিতা নকৰিব ৷ তেওঁ বৰপেটা লোকসভা সমষ্টিৰ পৰা অসম গণ পৰিষদ দলে নিৰ্বাচন খেলাটো ৯৯ শতাংশ নিশ্চিত বুলিও কয় ৷