🔯বঙাইগাঁৱত জিলা পৰ্য্যায়ৰ খেল মহাৰণৰ শুভাৰম্ভণি🔯

🔯বঙাইগাঁৱত জিলা পৰ্য্যায়ৰ খেল মহাৰণৰ শুভাৰম্ভণি🔯 

📝News4Bongaigaon: ২৬ ডিচেম্বৰঃ বঙাইগাঁও জিলাত অসম চৰকাৰৰ ক্ৰীড়া আৰু যুৱ কল্যাণ বিভাগৰ অধীনত আৰু বঙাইগাঁও জিলা প্ৰশাসনৰ সহযোগত চলি থকা অসম খেল মহাৰণৰ মঙলবাৰে বঙাইগাঁও জিলা পৰ্যায়ৰ খেলৰ শুভাৰম্ভণি অনুষ্ঠান বীৰঝৰা উচ্চতৰ মাধ্যমিক বিদ্যালয়ৰ খেলপথাৰত আড়ম্বৰপূৰ্ণভাৱে অনুষ্ঠিত হয়। এই উপলক্ষ্যে পুৱা অভয়াপুৰী উত্তৰ বিধানসভা সমষ্টি, অভয়াপুৰী দক্ষিণ বিধানসভা আৰু বঙাইগাঁও বিধানসভা সমষ্টিৰ পৰা বীৰঝৰা উচ্চতৰ মাধ্যমিক বিদ্যালয়ৰ খেলপথাৰলৈ অৰবিন্দ দাস, অনিল চন্দ্ৰ বায়ন আৰু মনোৰঞ্জন চৌধুৰীৰ নেতৃত্বত স্থানীয় খেলুৱৈসকলে অলিম্পিক শিখা কঢ়িয়াই  আনে ৷ 

শুভাৰম্ভণি অনুষ্ঠানত স্থানীয় শিল্পীসকলে বিহু নৃত্য, গোৱালিনী নৃত্য, বড়ো নৃত্য আৰু ৰাভা নৃত্য পৰিৱেশন কৰে। অভয়াপুৰীস্থিত অসম পুলিচ বেটেলিয়নৰ সোমেশ্বৰ ৰয়ৰ নেতৃত্বত বেণ্ড, ক্ৰীড়া বিভাগৰ মহকুমা ক্ৰীড়া বিষয়াৰ নেতৃত্বত ক্ৰীড়া বিভাগৰ শাৰীৰিক প্ৰশিক্ষকসকল, তিনিওটা বিধানসভা সমষ্টিৰ পৰা অহা ক্ৰীড়াপ্ৰেমী যুৱক-যুৱতী আৰু অন্যান্য লোকৰ অংশগ্ৰহণেৰে কুচকাৱাজ প্ৰদৰ্শন কৰা হয়। বীৰঝৰা কন্যা মহাবিদ্যালয়ৰ ছাত্ৰীসকলে মানৱ শৃংখলেৰে "খেল মহাৰণ"প্ৰতিফলিত কৰে ৷ খেল মহাৰণৰ শুভাৰম্ভণি অনুষ্ঠানত ভাষণ প্ৰসংগত জিলা আয়ুক্ত নৱদ্বীপ পাঠকে খেল মহাৰণ চলাই নিয়াত যিসকল লোকে সহায়-সহযোগিতা কৰিছে তেওঁলোকক ধন্যবাদ জ্ঞাপন কৰে। আনহাতে খেল মহাৰণৰ অনুষ্ঠানত ভাষণ প্ৰসংগত বঙাইগাঁও বিধানসভা সমষ্টিৰ বিধায়ক ফণীভূষণ চৌধুৰীয়ে আশা প্ৰকাশ কৰে যে বঙাইগাঁও জিলাই যাতে ৰাজ্যিক পৰ্য্যায়ত খেলি জিলাখনলৈ সুনাম কঢ়িয়াই আনিব পাৰে। 

খেল মহাৰণৰ শুভাৰম্ভণি বঙাইগাঁও বিধানসভা সমষ্টি আৰু অভয়াপুৰী উত্তৰ বিধানসভা সমষ্টিৰ মাজত ফুটবল খেলেৰে কৰা হয়। শুভাৰম্ভণিৰ সময়ত শংখ, ভোৰতাল আদি মাংগলিক বাদ্য বজোৱা হয় আৰু ফটকাও ফুটোৱা হয় ৷ শুভাৰম্ভণি অনুষ্ঠানত প্ৰাক্তন বিধায়ক ভূপেন ৰায়,কমতাপুৰ স্বায়ত্ব শাসিত পৰিষদৰ মুখ্য কাৰ্যবাহী পাৰিষদ গোকুল বৰ্মন, জিলা উন্নয়ন আয়ুক্ত ধ্ৰুৱজ্যোতি দাস, অতিৰিক্ত জিলা আয়ুক্ত মগেন নৰহ, অপূৰ্ব কুমাৰ নাথ আৰু নিৰ্মালি বৰুৱা, বঙাইগাঁও সদৰ মহকুমাধিপতি মোস্তাফা চেলিম আহমেদ, উত্তৰ শালমাৰা মহকুমাৰ মহকুমাধিপতি মানস শইকীয়া, সহকাৰী আয়ুক্ত গোলাম সাৰোৱাৰ হুছেইন ,বঙাইগাঁও পৌৰসভাৰ সভাপতি সুবোধ চন্দ্ৰ দাস আদিকৰি জিলাখনৰ ক্ৰীড়াপ্ৰেমী ৰাইজ উপস্থিত থাকে।