🔯বঙাইগাঁৱত পৰিৱেশ সংৰক্ষণৰ বার্তালৈ চাইকেলেৰে ভাৰত ভ্রমণলৈ ওলোৱা পশ্চিমবংগৰ তাৰক চন্দ্র পাল🔯

🔯বঙাইগাঁৱত পৰিৱেশ সংৰক্ষণৰ বার্তালৈ চাইকেলেৰে ভাৰত ভ্রমণলৈ ওলোৱা পশ্চিমবংগৰ তাৰক চন্দ্র পাল🔯

🔯এটা সেউজীয়া স্মৃতি জীয়াই ৰাখিবলৈ পিতৃ- মাতৃ, বন্ধু - বান্ধী, আত্মীয়ৰ নামত গছপুলি ৰোপণ কৰৰ🔯

📝News4Bongaigaon:২৬ ডিচেম্বৰ : পৰিৱেশ সংৰক্ষণৰ বাৰ্তালৈ চাইকেলেৰে সমগ্র ভাৰত ভ্রমণৰ সংকল্প গ্রহণ কৰি নিজৰ উদ্দেশ্যত আগবাঢ়িছে পশ্চিমবংগৰ উত্তৰ ২৪ পৰগনাৰ কাঁচৰাপাৰাৰ ৫২ বছৰ বয়সীয়া পৰিৱেশকৰ্মী তাৰক চন্দ্র পালে ৷ ইতিমধ্যে দ্বিতীয়বাৰৰ বাবে ভাৰত ভ্ৰমণলৈ ওলোৱা পৰিৱেশকৰ্মীগৰাকী কলকাতাৰ পৰা যাত্ৰা আৰম্ভ কৰি ১৬ দিনৰ অন্তত চাইকেলেৰে আহি মঙলবাৰে বঙাইগাঁও চহৰত উপস্থিত হয় ৷ বঙাইগাঁৱত উপস্থিত হোৱাৰ পিচত তেওঁ উত্তৰ পূৱ সীমান্ত ৰে’লৱে মজদুৰ ইউনিয়ন আৰু ৰাখাল দাসগুপ্তা ফাউণ্ডেচনৰ যৌথ উদ্যোগত ট্রেড ইউনিয়নৰ অন্যতম নেতা ৰাখাল দাসগুপ্তৰ ৯১ সংখ্যক জন্মদিন উপলক্ষে বঙাইগাঁৱত চলি থকা অনুষ্ঠানৰ গছপুলি ৰোপণ কাৰ্য্যসূচীত উপস্থিত থাকি গছপুলি ৰোপণ কৰে ৷ এই  কার্য্যসূচীত আমন্ত্রণ জনোৱাৰ বাবে তথা এনে কাৰ্য্যসূচী গ্ৰহণ কৰাৰ বাবে তেঁও উত্তৰ পূৱ সীমান্ত ৰে’লৱে মজদুৰ ইউনিয়ন আৰু ৰাখাল দাসগুপ্ত ফাউণ্ডেচনক ধন্যবাদ জ্ঞাপন কৰে ৷ পৰিৱেশকৰ্মী তাৰক চন্দ্র পালে সংবাদ মাধ্যমৰ আগত প্রকাশ কৰা মতে এইটো তেওঁৰ দ্বিতীয় বাৰৰ বাবে সৰ্বভাৰতীয় পৰ্য্যায়ত চাইকেল যাত্ৰা ৷ 

প্ৰথমবাৰ ১১ মাহৰ ভিতৰতে সমগ্র ভাৰত ভ্রমণ কৰিছিল ৷ এইবাৰো তেনেদৰেই পৰিকল্পনা কৰি যাত্ৰা আৰম্ভ কৰিছে ৷ এই চাইকেল যাত্ৰাৰ মূল উদ্দেশ্য হৈছে পৰিৱেশ ৰক্ষাৰ বাবে জনসাধাৰণক বাৰ্তা তথা সজাগ কৰা ৷ যাত্ৰাকালত তেওঁ ৰাইজক তেওঁলোকৰ পিতৃ- মাতৃ, বন্ধু - বান্ধী, আত্মীয়ৰ নামত গছপুলি ৰোপণ কৰাৰ বাবে অনুৰোধ জনায়, যাতে সেই সম্পৰ্কবোৰৰ বাবে তেওঁলোকৰ সৈতে এটা সেউজীয়া স্মৃতি জীয়াই থাকে ৷ লগতে প্লাষ্টিকৰ সৰ্বাধিক ব্যৱহাৰৰ পৰা বিৰত থাকিবলৈকো তেওঁ জনসাধাৰণক আহ্বান জনায় ৷ একেদৰে হাবি জ্বলোৱা বন্ধ কৰিবলৈও আহ্বান জনাই পৰিৱেশকৰ্মীগৰাকীয়ে কয় যে আমি যদি অৰণ্যক সন্মান নকৰো, তেতিয়াহলে অৰণ্যই আমাক সন্মান নকৰে ৷ তেওঁ পানী সংৰক্ষণৰ ওপৰতো গুৰুত্বাৰোপ কৰি কয় যে খাল, বিল, পুখুৰীসমূহ বন্ধ নকৰিব ৷ নদীৰ গতি পথো বন্ধ নকৰি বৈ যাবলৈ দিয়ক ৷ মুঠতে পৰিৱেশ সংৰক্ষণ কৰক যাতে মানৱ জাতিৰ মংগল হয় ৷ উল্লেখ্য যে তাৰক চন্দ্র পালৰ এই প্ৰচেষ্টাক ৰাখাল দাসগুপ্ত ফাউণ্ডেচনৰ হৈ ডঃ প্ৰণৱ কুমাৰ ধৰ আৰু আশীষ বিশ্বাসে তেওঁক ধন্যবাদ জ্ঞাপন কৰি ভাৰত যাত্ৰাৰ কাৰ্য্যসূচীৰ সফলতা কামনা কৰে ৷