🔯সমষ্টি পুনৰ নিৰ্ধাৰণৰ পিছত বঙাইগাঁও জিলাৰ তিনিওটা বিধানসভা সমষ্টিৰ ফটোযুক্ত খচৰা ভোটাৰ তালিকা প্ৰকাশ🔯

🔯সমষ্টি পুনৰ নিৰ্ধাৰণৰ পিছত বঙাইগাঁও জিলাৰ তিনিওটা বিধানসভা সমষ্টিৰ ফটোযুক্ত খচৰা ভোটাৰ তালিকা প্ৰকাশ🔯 

🔯জিলাখনৰ মুঠ ভোটাৰৰ সংখ্যা ৫,৬৩,১৫৭ গৰাকী🔯

🔯তাৰে ভিতৰত পুৰুষ ভোটাৰ ২,৮৬,৩১৩ গৰাকী আৰু মহিলা ভোটাৰ ২৭৬৮৩৬গৰাকী🔯

🔯তৃতীয় লিংগৰ ভোটাৰ আছে ৮ গৰাকী🔯

📝News4Bongaigaon: ৮ ডিচেম্বৰ: সমষ্টি পুুুনৰ নিৰ্ধাৰণৰ পিছত শুকুৰবাৰে ভাৰতৰ নিৰ্বাচন আয়োগৰ নিৰ্দেশনামৰ্মে ৰাজ্যখনৰ আন আন জিলাৰ লগতে বঙাইগাঁও জিলাৰ অন্তৰ্গত তিনিটা সমষ্টি ক্ৰমে ১৬ নং অভয়াপুৰী বিধানসভা সমষ্টি, ১৭ নং সৃজনগ্ৰাম বিধানসভা সমষ্টি আৰু ১৮ নং বঙাইগাঁও বিধানসভা সমষ্টিৰ ফটোযুক্ত খচৰা ভোটাৰ তালিকা প্ৰকাশ কৰা হয় ৷ এই ফটোযুক্ত খচৰা ভোটাৰ তালিকা ২০২৪ বৰ্ষৰ ১ জানুৱাৰীক ভিত্তি তাৰিখ হিচাপে লৈ প্ৰকাশ কৰা হৈছে। জিলা উন্নয়ন আয়ুক্ত তথা ভাৰপ্ৰাপ্ত জিলা আয়ুক্ত ধ্ৰুৱজ্যোতি দাসে এক সংবাদ মেলযোগে ভোটাৰ তালিকাৰ বিশেষ সংক্ষিপ্ত সংশোধনী প্ৰক্ৰিয়াৰ অংশ হিচাপে বিধানসভা সমষ্টি তিনিটাৰ সকলো ভোটগ্ৰহণ কেন্দ্ৰতে শুকুৰবাৰ অৰ্থাৎ ৮ ডিচেম্বৰত খচৰা ভোটাৰ তালিকা প্ৰকাশ কৰা বুলি সদৰী কৰে। এই বিশেষ সংক্ষিপ্ত সংশোধনী প্ৰক্ৰিয়া অনুসৰি ৯ ডিচেম্বৰৰ পৰা ৮ জানুৱাৰীলৈ নাগৰিকে খচৰা ভোটাৰ তালিকা সন্দৰ্ভত কিবা আপত্তি-অভিযোগ থাকিলে দাখিল কৰিব পাৰিব। সেইদৰে ১৬ ডিচেম্বৰ, ১৭ডিচেম্বৰ, ২৩ ডিচেম্বৰ আৰু ২৪ ডিচেম্বৰত বিধানসভা সমষ্টি তিনিটাত বিশেষ শিবিৰ অনুষ্ঠিত কৰা হ'ব। ১৬ ডিচেম্বৰৰ পৰা ২২ জানুৱাৰীলৈ আপত্তি-অভিযোগ আদি নিষ্পত্তি কৰা হ'ব আৰু ৮ ফেব্ৰুৱাৰীত চূড়ান্ত ভোটাৰ তালিকা প্ৰকাশ কৰা হ'ব বুলি জিলা প্ৰশাসনৰ তৰফৰ পৰা জনোৱা হৈছে। ইপিনে প্ৰকাশ কৰা জিলাখনৰ তিনিওটা বিধানসভা সমষ্টিৰ ফটোযুক্ত খচৰা ভোটাৰ তালিকা অনুসৰি শুকুৰবাৰলৈকে অভয়াপুৰী বিধানসভা সমষ্টিত মুঠ ভোটাৰৰ সংখ্যা হ'ল ১,৮১,৯৬৫ গৰাকী ৷ তাৰে ভিতৰত ৯১,৫৫৪ গৰাকী পুৰুষ আৰু ৯০,৪১১ গৰাকী মহিলা ভোটাৰ ৷ সেইদৰে সৃজনগ্ৰাম বিধানসভা সমষ্টিত মুঠ ভোটাৰৰ সংখ্যা হ'ল ২,১২,৩৯৫ গৰাকী ৷ তাৰে ভিতৰত ১,১০,৮৩৪ গৰাকী পুৰুষ আৰু ১,০১,৫৫৫ গৰাকী মহিলা ভোটাৰ ৷ সমষ্টিটোত তৃতীয় লিংগৰ ভোটাৰ আছে ৬ গৰাকী। আনহাতে বঙাইগাঁও বিধানসভা সমষ্টিৰ মুঠ ভোটাৰৰ সংখ্যা হ'ল ১,৬৮,৭৯৭ গৰাকী ৷ ইয়াৰে ভিতৰত ৮৩,৯২৫ গৰাকী পুৰুষ আৰু ৮৪,৮৭০ গৰাকী মহিলা ভোটাৰ ৷ সমষ্টিটোত তৃতীয় লিংগৰ ভোটাৰ আছে ২ গৰাকী। উল্লেখ্য যে জিলাখনৰ তিনিওটা বিধান সভা সমষ্টি মিলি মুঠ ভোটাৰৰ সংখ্যা হ'ল ৫,৬৩,১৫৭ গৰাকী আৰু তাৰে ভিতৰত পুৰুষ ২,৮৬,৩১৩ গৰাকী পুৰুষ ভোটাৰ আৰু ২,৭৬,৮৩৬ গৰাকী মহিলা ভোটাৰ ৷ তৃতীয় লিংগৰ ভোটাৰৰ সংখ্যা হ'ল ৮ গৰাকী। সেইদৰে তিনিওটা বিধানসভা সমষ্টিত ভোটগ্ৰহণ কেন্দ্ৰৰ সংখ্যা হ'ল ৬৮৮ টা।