🔯বঙাইগাঁৱত এশ এক বছৰীয়া জ্যেষ্ঠ নাগৰিক ৰবীন্দ্ৰ নাথ ভট্টাচাৰ্য্যৰ দেহাৱসান🔯

🔯বঙাইগাঁৱত এশ এক বছৰীয়া জ্যেষ্ঠ নাগৰিক ৰবীন্দ্ৰ নাথ ভট্টাচাৰ্য্যৰ দেহাৱসান🔯 

🔯ইলোৰা বিজ্ঞান মঞ্চৰ জৰিয়তে মৰণোত্তৰ দেহদান🔯

📝News4Bongaigaon: ২৪ ডিচেম্বৰঃ বঙাইগাঁৱৰ দক্ষিণ ঢালিগাঁও চুঙাপোতা নিবাসী জ্যেষ্ঠ নাগৰিক ৰবীন্দ্ৰ নাথ ভট্টাচাৰ্য্যৰ শনিবাৰে নিশা ১০১ বছৰ বয়সত দেহাৱসান ঘটে ৷ ১৯২৩ চনৰ ৩০ এপ্ৰিলত জন্মগ্ৰহণ কৰা ভট্টাচাৰ্য্য এন এফ ৰে'লৱে পেঞ্চনাৰ এচোচিয়েচনৰ নিউ বঙাইগাঁও ৱৰ্কশ্বপ শাখাৰ উপদেষ্টা আছিল ৷ ইপিনে ২০১০ চনত তেওঁৰ পত্নীৰ বিয়োগৰ পাছতে পুত্ৰ সন্তান তিনিগৰাকীক সাক্ষী ৰাখি তেওঁ ইলোৰা বিজ্ঞান মঞ্চৰ বঙাইগাঁও শাখাৰ সহযোগত নিজৰ দেহটো চিকিৎসা বিজ্ঞানৰ ছাত্ৰ -ছাত্ৰীৰ গৱেষণাৰ স্বাৰ্থত মৰণোত্তৰ দেহাদানৰ বাবে ইচ্ছা প্ৰকাশ কৰি শেষ ইচ্ছাপত্ৰ সম্পাদন কৰে আৰু ইলোৰা বিজ্ঞান মঞ্চৰ সদস্যভুক্তি হৈ বিজ্ঞান মনষ্কতাৰ প্ৰসাৰৰ স্বাৰ্থত নিয়োজিত হয় ৷ তেওঁ বঙাইগাঁও জিলা জ্যেষ্ঠ নাগৰিক সন্থাৰো এগৰাকী আজীৱন সদস্য আছিল ৷ নিউ বঙাইগাঁও অঞ্চলৰ শৈক্ষিক, সাংস্কৃতিক তথা ক'লাৰ বিকাশৰ বাবে তেওঁ যৎপৰোনাস্তি সহযোগিতা কৰিছিল ৷ প্ৰতিবছৰে হাইস্কুলীয়া শিক্ষান্ত পৰীক্ষাত উত্তীৰ্ণ ল'ৰা- ছোৱালীক তেওঁ নিজাববীয়াকৈ কলম- কিতাপ আদি  উপহাৰ  দি অঞ্চলটোৰ  ছাত্ৰ - ছাত্ৰীসকলক উৎসাহিত কৰিছিল ৷ সাংস্কৃতিক ক্ষেত্ৰতো অঞ্চলটোৰ ল'ৰা - ছোৱালীসকলক  প্ৰতিবছৰে নিজাববীয়াকৈপুৰস্কৃত কৰি থাকিছিল ৷ মৃত্যুৰ সময়ত তেওঁ তিনিগৰাকী পুত্ৰক এৰি থৈ যায় ৷ তেওঁৰ মৃত্যুত পৰিয়ালবৰ্গই জনোৱাৰ লগে লগে ইলোৰা বিজ্ঞান মঞ্চৰ সভাপতি ডাঃ ফিৰোজ আহমেদ, সম্পাদক হৰেশ্বৰ দাস, জ্যেষ্ঠ নাগৰিক সন্থাৰ সভাপতি প্ৰদীপ কুমাৰ ভাগৱতী, সম্পাদক আদিত্য কুমাৰ নাথকে ধৰি  ৰে'লৱে পেঞ্চনাৰ সন্থাৰ লোকে গৈ মৃতকৰ প্ৰতি শেষ শ্ৰদ্ধাঞ্জলি জ্ঞাপন কৰে ৷ এক চমু অনুষ্ঠানৰ শেষত ভট্টাচাৰ্য্যৰ নশ্বৰদেহ  এম্বুুলেঞ্চেৰে লৈ গৈ ডাঃ ফকৰুদ্দিন আলী আহমেদ মেডিকেল কলেজ হস্পিতাল কৰ্তৃপক্ষক গতাই দিয়া হয় ৷