🔯বঙাইগাঁও জিলাৰ দলনি বিলৰ সংৰক্ষণৰ বাবে চৰকাৰী বিভাগৰ সহযোগ আহ্বান 'আৰণ্যক 'ৰ

🔯বঙাইগাঁও জিলাৰ দলনি বিলৰ সংৰক্ষণৰ বাবে চৰকাৰী বিভাগৰ সহযোগ আহ্বান 'আৰণ্যক 'ৰ

📝News4Bongaigaon:বঙাইগাঁওঃ ৭ এপ্ৰিলঃ  বঙাইগাঁও জিলাৰ চলন্তাপাৰাৰ নিকটৱৰ্তী দলনি বিলৰ জৈৱ বৈচিত্ৰ্যই ইয়াৰ প্ৰতি প্ৰকৃতিপ্ৰেমীসকলক বিশেষভাৱে আকৰ্ষিত কৰে ।শেহতীয়াভাৱে দলনি বিলৰ নিকটৱৰ্তী দহখন গাঁৱৰ মানুহৰ জীৱিকাৰ থল দলনি বিলৰ উন্নয়নৰ বাবে আগবাঢ়ি আহিছে  "আৰণ্যক" নামৰ বেচৰকাৰী প্ৰকৃতিপ্ৰেমী সংস্থাটোৰ কৰ্মকৰ্তাসকল। যদিও ভাৰত চৰকাৰৰ দ্বাৰা দলনি বিলখন  স্বীকৃত হৈছে, কিন্ত এই বিলখন এতিয়াও অসংৰক্ষিত। এতিয়াও বিলখন সংৰক্ষণৰ বাবে অধিসূচনা জাৰি হোৱা নাই।তাৰ বাবে হয়তো আৰু কিছুদিন বাট চাব লাগিব। যিকি নহওক "আৰণ্যক "নামৰ বেচৰকাৰী সংস্থাটোৱে দলনি বিলৰ উন্নয়নৰ বাবে শনিবাৰে বঙাইগাঁও জিলা প্ৰশাসনৰ কাষ চাপে। সেই উপলক্ষ্যে শনিবাৰে বঙাইগাঁও জিলাৰ জিলা আয়ুক্ত নৱদ্বীপ পাঠকৰ  পৌৰহিত্যত জিলা আয়ুক্ত কাৰ্যালয়ৰ  সভাকক্ষত "আৰণ্যক" নামৰ বেচৰকাৰী সংস্থাটোৰ উদ্যোগত এখন সভা অনুষ্ঠিত হয়। "আৰণ্যক" ৰ প্ৰধান উদ্যোক্তা পাৰ্থ দাস আৰু সমন্বয়ক ডঃঅশোক দাস সমন্বিতে ভালেসংখ্যক কৰ্মকৰ্তা আৰু দলনি বিলৰ নিকটৱৰ্তী দহখন গাঁৱৰ কিছুসংখ্যক বাসিন্দাৰ উপস্থিতিত বঙাইগাঁও জিলাৰ কৃষি, মীন, স্বাস্থ্য, পশুপালন, মহিলা আৰু শিশু বিকাশ, বন, জল সম্পদ, নাবাৰ্ড, ভূমি সংৰক্ষণ, অসম ৰাজ্যিক গ্ৰামীণ জীৱিকা অভিযান, জলসিঞ্চন, প্ৰদূষণ নিয়ন্ত্ৰণ আদি বিভাগৰ বিষয়াৰ সৈতে অনুষ্ঠিত এই সভাত জিলা আয়ুক্ত নৱদ্বীপ পাঠকে দলনি বিলৰ লগত জড়িত ওপৰোক্ত বিভাগসমূহক প্ৰয়োজনীয় সহায় আগবঢ়াবলৈ আহ্বান জনায় ৷ দলনি বিলখন বৰ্তমানে চলি থকা ব্যক্তিগত লীজৰ সলনি যদি সমূহীয়া লীজত দিয়া হয় তেতিয়া নিকটৱৰ্তী মীন ব্যৱসায়ীসকলৰ সমূহীয়া উন্নয়ন হ'ব বুলি "আৰণ্যক "ৰ কৰ্মকৰ্তাসকলে প্ৰশাসনক অৱগত কৰে। আনহাতে বছৰটোৰ ৩৬৫ দিনেই বিলৰ কাষৰীয়া ভূমিত কৃষি কাৰ্য কৰা বাবে খেতিৰ অৱশিষ্ট অংশ বিলৰ মাটিত ৰৈ যোৱা বাবে অনাৱশ্যকীয় গেদ পৰা বুলি আৰণ্যকে ব্যক্ত কৰে। সেই অৱশিষ্ট অংশ মাজে মাজে পৰিস্কাৰ কৰিলে কৃষিভূমিখিনি বেছি উৎপাদনশীল হ'ব বুলিও তেওঁলোকে প্ৰশাসনক জনায়। আনহাতে স্থানীয় লোকৰ পশুধনৰ চিকিৎসাৰ বাবে দলনি বিলৰ নিচেই কাষত পশু চিকিৎসাৰ ব্যৱস্থা কৰা প্ৰয়োজন বুলিও আৰণ্যকে প্ৰশাসনক জনায়। দলনি বিলৰ প্ৰাকৃতিক সৌন্দৰ্য্য, জৈৱ বৈচিত্ৰ্য লগত জড়িত বিষয়সমূহ যিবিলাক চৰকাৰী বিভাগৰ অধীনত পৰে সেইবিলাক ক্ষেত্ৰত বিভাগীয় সহায় আহ্বান কৰি আৰণ্যকে কয় যে দলনি বিলৰ পৰ্যটনৰ দিশটোৱে জিলাখনৰ বাবে নতুন দিগন্তৰ সূচনা কৰিব। গতিকে আৰণ্যকে প্ৰশাসনৰ ওচৰত সহায়ৰ আহ্বান কৰে। সভাত অতিৰিক্ত জিলা আয়ুক্ত অপূৰ্ব কুমাৰ নাথে উপস্থিত থাকি"আৰণ্যক "ক প্ৰশাসনৰ পৰা সহায়ৰ আশ্বাস দিয়ে।