🔯বঙাইগাঁও ৰাজহ চক্ৰ বিষয়াৰ কাৰ্য্যালয়ত দুৰ্নীতি নিবাৰক শাখাৰ অভিযান🔯

🔯বঙাইগাঁও ৰাজহ চক্ৰ বিষয়াৰ কাৰ্য্যালয়ত দুৰ্নীতি নিবাৰক শাখাৰ অভিযান🔯 

🔯চাৰি হাজাৰ টকা উৎকোচ লৈ হাত দাঙিলে লাটমণ্ডল সুধীৰ কুমাৰ পালে🔯 

📝News4Bongaigaon: ১১ ডিচেম্বৰঃ এইবাৰ উৎকোচ লৈ দুৰ্নীতি নিবাৰক শাখাৰ জালত পৰিল বঙাইগাঁও ৰাজহ চক্ৰ বিষয়া কাৰ্য্যালয়ৰ লাট মণ্ডল সুধীৰ কুমাৰ পাল ৷ উল্লেখ্য যে বঙাইগাঁও জিলা আয়ুক্ত কাৰ্য্যালয়ৰ নিচেই ওচৰতে থকা বঙাইগাঁও ৰাজহ চক্ৰ বিষয়াৰ কাৰ্য্যালয়ত দীৰ্ঘ দিনৰে পৰা মাটি সম্পৰ্কীয় বিভিন্ন কামৰ বাবে অহা সৰ্বসাধাৰণ লোকৰ পৰা উৎকোচ লৈ থকা অভিযোগ উত্থাপিত হৈ আহিছে ৷ সেইদৰে কাৰ্য্যালয়টোত ধন নিদিলে কোনো কাম নোহোৱাৰ লগতে মাটিৰ কাম লৈ অহা জনসাধাৰণক নানা হাৰাশাস্তি কৰি অহাৰ অভিযোগ উত্থাপিত হৈ অহাৰ সময়তে সেই অভিযোগক সত্যতাত পৰিণত কৰি অৱশেষত দুৰ্নীতি নিবাৰক শাখাৰ অভিযানত আটক হ'ল কাৰ্য্যালয়টোৰ এগৰাকী ঘোচখোৰ লাট মণ্ডল সুধীৰ কুমাৰ পাল ৷ জানিব পৰা মতে কাৰ্য্যালয়টোৰ লাট মণ্ডল সুধীৰ কুমাৰ পালে এগৰাকী লোকক মাটিৰ নামজাৰি সম্পৰ্কীয় কামৰ বাবে ছল্লিশ হাজাৰ ( ৪০ হাজাৰ)  টকা দাবী কৰিছিল ৷ সোমবাৰে দাবী কৰা ছল্লিশ হাজাৰৰ ভিতৰত চাৰি হাজাৰ টকা লোৱাৰ সময়তে লাট মণ্ডল সুধীৰ কুমাৰ পালক গুৱাহাটীৰ পৰা অহা দুৰ্নীতি নিবাৰক শাখাৰ এটা দলে  হাতে লোটে আটক কৰে ৷ পিছত দুৰ্নীতি নিবাৰক শাখাৰ দলটোৱে কাৰ্য্যালয়ৰ ভিতৰতে সুধীৰ কুমাৰ পালক বিভিন্ন তথ্য আহৰণৰ বাবে সোধাপোছা কৰে যদিও সন্ধিয়া অধিক তথ্য আহৰণ আৰু তদন্তৰ বাবে লাট মণ্ডলজনক দলটোৱে গুৱাহাটীলৈ লৈ যায় ৷ উল্লেখ্য যে বঙাইগাঁও ৰাজহ চক্ৰ বিষয়াৰ কাৰ্য্যালয়টো বিষয়া, কৰ্মচাৰী আৰু লাটমণ্ডল সকলে সোণৰ কণীপৰা হাঁহলৈ ৰূপান্তৰিত কৰি যধে মধে উৎকোচ লৈ থকাৰ অভিযোগ দীৰ্ঘদিনীয়া ৷ আনকি বছৰৰ পিছত বছৰ ধৰি লোকে মাটি সম্পৰ্কীয় কামৰ বাবে কাৰ্য্যালয়টোত তাঁত বাতি কাঢ়ি কাঢ়ি ভাগৰি পৰিলেও কাম সমাধা নহয় বুলি ভুক্তভোগীয়ে কিছুদিন পূৰ্বে সংবাদ মাধ্যমৰ আগত অভিযোগ কৰিছিল ৷ এই সন্দৰ্ভত বিভিন্নজনে ৰাজহ চক্ৰ বিষয়াৰ কাৰ্য্যালয়ত চলি থকা এনে অৰাজকতাৰ বিষয়ে জিলা আয়ুক্তৰ লগতে মুখ্যমন্ত্ৰীলৈকেও অভিযোগ পত্ৰ প্ৰদান কৰিছিল ৷ 

কিন্তু তাৰ পিছতো কোনো ফল ধৰা নাছিল ৷ চৰম অৰাজক পৰিস্থিতি সৃষ্টি কৰি বঙাইগাঁও ৰাজহ চক্ৰ বিষয়াৰ কাৰ্যালয়ত ধনৰ লেনদেনৰ বৃহৎ বজাৰ গঢ়ি তোলাৰ ৰাইজৰ  অভিযোগ অৱশেষত সত্যত পৰিণত হ'ল ৷ প্ৰতিটো কামৰ বিনিময়ত কাৰ্যালয়ৰ বিষয়া, কৰ্মচাৰী, লাটমণ্ডলৰ লগতে আনকি মহৰী সকলেও ৰাইজক বিপথে পৰিচালিত কৰি বিভিন্ন অযুহাতত ধন দাবী কৰি অহাৰ অভিযোগ সৰ্বজনবিদিত হৈ পৰিছিল যদিও কোনো ব্যৱস্থা গ্ৰহণ কৰা হোৱা নাছিল ৷ সেয়ে এই ঘটনাৰ পিছতে ভুক্তভোগী লোক সকলে সন্তোষ লাভ কৰাৰ লগতে আন বিষয়া, লাটমণ্ডল সকলোকো তদন্তৰ আওতাত আনিবলৈ দাবী কৰাৰ লগতে কাৰ্য্যালয়টোৰ প্ৰতিগৰাকী লাটমণ্ডলৰ সম্পত্তিৰ হিচাপ তথা খতিয়াত লবলৈকো ৰাজ্য চৰকাৰৰ বিভাগীয় বিভাগক আহবান জনায় ৷