🔯বিশিষ্ট লেখক দিলীপ কুমাৰ শৰ্মাক ২০২৩ বৰ্ষৰ 'দ্বিজেন নাথ গৱেষণা গ্ৰন্থ' বঁটা প্ৰদান🔯

🔯বিশিষ্ট লেখক দিলীপ কুমাৰ শৰ্মাক ২০২৩ বৰ্ষৰ 'দ্বিজেন নাথ গৱেষণা গ্ৰন্থ'  বঁটা প্ৰদান🔯

📝News4Bongaigaon: ৪ ডিচেম্বৰঃ সাহিত্য-সংস্কৃতিমূলক বেচৰকাৰী অনুষ্ঠান "স্পন্দন…শব্দৰ পৰা হৃদয়লৈ" ৰ উদ্যোগত গুৱাহাটীৰ কটন বিশ্ববিদ্যালয়ৰ এলুমনাই ভৱনত দেওবাৰে আয়োজিত এক গাম্ভীৰ্যপূৰ্ণ অনুষ্ঠানত গোৱালপাৰাৰ বিশিষ্ট লেখক দিলীপ কুমাৰ শৰ্মাক 'দ্বিজেন নাথ গৱেষণা গ্ৰন্থ বঁটা' ২০২৩ প্ৰদান কৰা হয় । 'গোৱালপাৰা দৰ্পণ' নামৰ গৱেষণা ধৰ্মী গ্ৰন্থখনৰ বাবে তেখেতে এই বঁটা লাভ কৰিছে । উল্লেখ্য যে, গোৱালপৰীয়া লোক-সাহিত্য, সংস্কৃতিৰ গৱেষক- বিশিষ্ট সাহিত্যিক প্ৰয়াত দ্বিজেন নাথৰ স্মৃতিত সাহিত্যিক গৰাকীৰ পৰিয়ালৰ হৈ পুত্ৰ মৃদুল নাথে 'স্পন্দন - শব্দৰ পৰা হৃদয়লৈ' গোট ৰ সৌজন্যত উক্ত বঁটা টি আগবঢ়ায় । উক্ত বঁটাত নগদ পঁচিশ হাজাৰ টকা, স্মাৰক, মানপত্ৰ, অংগবস্ত্ৰ আৰু গ্ৰন্থৰ টোপোলা আগবঢ়োৱা হয় । স্পন্দনৰ সভাপতি ময়ূৰী দত্তই আঁত ধৰা উক্ত অনুষ্ঠানত বিশিষ্ট কবি নীলিম কুমাৰ, আনিছ উজ জামান, গুৱাহাটী বিশ্ববিদ্যালয়ৰ লোকসংস্কৃতি বিভাগৰ মুৰব্বী অধ্যাপক ড° অনিল বড়ো, সাতসৰী  আলোচনীৰ কাৰ্যবাহী সম্পাদক তথা কবি-গল্পকাৰ অতনু ভট্টাচার্য, সাহিত্যিক পৰী  হিলৈদাৰীয়ে  উপস্থিত থাকি বক্তব্য প্ৰদান কৰে । এই সভাতে বিশিষ্ট কবি আনিছ উজ জামানক সাহিত্য সাধনাৰ বাবে স্পন্দনৰ উদ্যোগত জীৱনজোৰা সাহিত্য সাধনা বঁটা প্ৰদান কৰাৰ লগতে আন কেইবাগৰাকী কবি-সাহিত্যিকক  তেওঁলোকৰ সৃষ্টিৰাজি তথা প্ৰতিভাৰ বাবে  বঁটা প্ৰদান কৰে ।