🔯কেন্দ্রীয় চৰকাৰৰ বৈষম্যমূলক বাজেটৰ বিৰোধিতা চি আই টি ইউৰ🔯

🔯কেন্দ্রীয় চৰকাৰৰ বৈষম্যমূলক বাজেটৰ বিৰোধিতা চি আই টি ইউৰ🔯

🔯বঙাইগাঁৱত প্রতিবাদী কার্যসূচী ৰূপায়ণ🔯

এইবাৰৰ বাজেট সম্পূর্ণৰূপে  কর্পৰেটমুখী আৰু বৈষম্যমূলক - হৰেশ্বৰ দাস

বঙাইগাঁওঃ ২৪ জুলাইঃ কেন্দ্রীয় চৰকাৰৰ বৈষম্যমূলক বাজেটৰ তীব্র বিৰোধিতা কৰিছে চি আই টি ইউৱে ৷ বুধবাৰে  বঙাইগাঁও চহৰৰ মাজমজিয়াৰ মায়াপুৰী তিনি আলিত চি আই টি ইউৰ বঙাইগাঁও-চিৰাং জিলা কমিটিয়ে কেন্দ্রীয় বিত্তমন্ত্রীয়ে দাখিল কৰা বাজেটৰ বিৰোধিতা কৰি এক প্রতিবাদী কার্যসূচী ৰূপায়ণ কৰে ৷ প্রতিবাদকাৰী সকলে অসমৰ বানপানী সমস্যাক ৰাষ্ট্ৰীয় সমস্যা হিচাপে স্বীকৃতি দিয়ক, বান নিয়ন্ত্রণৰ বাবে পর্যাপ্ত ধন বাজেটত ধার্য কৰক, বাজেটত অসমৰ বাবে বিশেষ অর্থনৈতিক পেকেজ ঘোষণা কৰক, আঁচনিভুক্ত কর্মচাৰী অঙ্গনাবাদী কর্মী আৰু সহায়িকা,বিদ্যালয়ৰ ৰন্ধন কর্মচাৰী, আশাকর্মী সকলক বঞ্চনা কৰা নচলিব, বাজেটত আঁচনিভূক্ত কর্মচাৰী সকলৰ বাবে অধিক ধন ধার্য কৰক আদি শ্লোগান দি প্রতিবাদ সাব্যস্ত কৰে ৷ প্রতিবাদী কার্যসূচীত অংশগ্রহণ কৰি চি আই টি ইউৰ বঙাইগাঁও জিলা কমিটিৰ সভাপতি হৰেশ্বৰ দাসে কয় যে, " এইবাৰৰ বাজেট সম্পূর্ণৰূপে কর্পৰেটমুখী আৰু বৈষম্যমূলক ৷ বাজেটত শ্রমজীবী জনগণৰ বাবে বিশেষ কোনো সকাহৰ ব্যৱস্থা ৰখা নাই ৷ 

সেইদৰে কর্ম সংস্থাপন সৃষ্টিৰ বাবে ক্ষুদ্র আৰু মজলীয়া উদ্যোগ স্থাপনৰ বাবে কোনো লক্ষ্য বাজেটত ৰখা নাই ৷ শিক্ষা আৰু স্বাস্থ্য শিতানত সামান্য ধন আৱন্টন দিছে ৷ অসমৰ এইবাৰৰ বানপানীত ডেৰ শতাধিক লোকৰ মৃত্যু ঘটিছে ৷ ৰাজ্যখন বানত বিধ্বস্ত ৷ কিন্তু বানপানী প্রতিৰোধৰ বাবে বা বান সাহায্যৰ বাবে বাজেটত বৈষম্যমূলক নীতি গ্রহণ কৰিলে৷ সামান্য মাত্র ধন আবন্টন দিছে ৷ আঁচনিভূক্ত কর্মচাৰী সকলক সম্পূর্ণৰূপে বঞ্চনা কৰা হ’ল ৷ কৃষক শ্রমিকৰ সুৰক্ষা তথা সামাজিক নিৰাপত্তা বিষয়ত বাজেট নিমাত থাকিল ৷ কৃষি উৎপাদিত ফচলৰ লাভজনক মূল্যৰ গেৰান্টি, কৃষকৰ ঋণ ৰেহাই বিষয় বিলাক উল্লেখেই নহ’ল ৷" প্ৰতিবাদকাৰীসকলে শ্রমজীৱী জনগণ তথা কৃষকৰ স্বার্থত নিবনুৱাৰ কর্মসংস্থাপনৰ দাবীত, শিক্ষা-স্বাস্থ্য খণ্ডত অধিক ধন ধার্য কৰা আদি দাবীও উত্থাপন কৰে ৷