🔯বঙাইগাঁৱত অংশীদাৰ পৰামৰ্শ - আলোচনা বিষয়ক কৰ্মশালা🔯

🔯বঙাইগাঁৱত  অংশীদাৰ পৰামৰ্শ - আলোচনা বিষয়ক কৰ্মশালা🔯

স্বেচ্ছামূলক কাৰ্বন বজাৰ প্ৰকল্প গঢ়ি তোলাৰ প্রয়াস 

📝বঙাইগাঁওঃ ২৬ জুলাই : শক্তি আৰু সম্পদ প্রতিষ্ঠান চমুকৈ টেৰিৰ উদ্যোগত আৰু অসম কৃষি বিশ্ববিদ্যালয়ৰ অভয়াপুৰী কৃষি বিজ্ঞান কেন্দ্ৰৰ সহযোগ তথা ৰিনিউৰ সহযোগত অভয়াপুৰীৰ জ্যোতি সাংস্কৃতিক হলত শনিবাৰ ২০ জুলাইত এখন অংশীদাৰ পৰামৰ্শ বিষয়ক আলোচনা কর্মশালা অনুষ্ঠিত হৈ যায়। " অসমত কৃষি বন বাগিচা আৰু পুনৰ উৎপাদনশীল কৃষিৰ বাবে স্বেচ্ছামূলক কাৰ্বন বজাৰ প্ৰকল্প গঢ়ি তোলা" শীৰ্ষক প্ৰকল্পটোৰ মূল উপাদান এই কর্মশালাত কার্বন বিত্তীয় প্রকল্পসমূহৰ বিষয়ে অংশীদাৰসকলক অৱগত কৰা হয় আৰু প্ৰকল্পটোৰ সামগ্রিক ডিজাইন আৰু ৰূপায়ণৰ উন্নতিৰ বাবে তেওঁলোকৰ মতামত আৰু পৰামৰ্শসমূহ বিবেচনা কৰা হয়।অসমৰ দহখন জিলা ক্ৰমে বাক্সা, বৰপেটা, বঙাইগাঁও, দৰং, গোলাঘাট, যোৰহাট, নলবাৰী, শিৱসাগৰ, শোণিতপুৰ আৰু ওদালগুৰিত প্ৰকল্পৰ অধীনত কৰা বাগিচাকেইখনৰ কার্বন নিষ্কাশনৰ সম্ভাৱনাৰ মূল্যায়ন কৰা আৰু বৃক্ষ বাগিচাৰ জৰিয়তে উৎপন্ন হোৱা কাৰ্বন ক্রেডিটৰ ৰূপত অসমৰ বস্তিৰ আৰু কৃষি বন বাগিচাৰ বাবে স্বেচ্ছামূলক কাৰ্বন বজাৰ প্ৰকল্পৰ প্ৰৱৰ্তনৰ ওপৰত গুৰুত্ব আৰোপ কৰা হয় । 

উল্লেখ্য যে অসম কৃষি বিশ্ববিদ্যালয় (এএইউ) ,শক্তি আৰু সম্পদ প্রতিষ্ঠান (টেৰি), আৰু ৰিনিউয়ে কৃষক আৰু বস্তিৰ মালিকে গ্ৰহণ কৰা কৃষি বনানীকৰণ আৰু বস্তিত কৰা বাগিচাৰ বাবে কাৰ্বন বিত্তীয় প্ৰকল্প প্রস্তুত কৰি আছে। এই কর্মশালাত বঙাইগাঁও জিলাৰ ১৯ খন গাঁৱৰ ৫৩ গৰাকী অংশগ্ৰহণকাৰীয়ে অংশগ্ৰহণ কৰে ৷ য'ত অসমৰ বস্তিৰ আৰু কৃষি বন বাগিচাৰ বাবে স্বেচ্ছামূলক কাৰ্বন বজাৰ প্ৰকল্পৰ প্ৰৱৰ্তনৰ ওপৰত গুৰুত্ব আৰোপ কৰা হয় । বঙাইগাঁৱৰ কৃষি বিজ্ঞান কেন্দ্ৰৰ বিষয় বিশেষজ্ঞ বেদান্ত দাসে কর্মশালাত অংশ গ্ৰহণকাৰী সকলক আদৰণি জনাই প্ৰকল্পটোৰ লক্ষ্য, উদ্দেশ্য আৰু অংশীদাৰ পৰামৰ্শ আলোচনা কৰ্মশালাত উদ্দেশ্য সম্পর্কত চমুকৈ বিৱৰণ দাঙি ধৰে। টেৰিৰ উত্তৰ-পূব আঞ্চলিক কেন্দ্ৰৰ জ্যেষ্ঠ ফেলো আৰু আঞ্চলিক  সমন্বয়ক ড° নব কুমাৰ গোস্বামীয়ে প্ৰকল্পৰ কাম-কাজ, অংশীদাৰসকলৰ জড়িততা আৰু প্ৰকল্পটোৰ সুবিধাসমূহৰ ওপৰত আলোকপাত কৰে। ড° গোস্বামীয়ে প্ৰকল্পটোৰ পৰিৱেশ আৰু অৰ্থনৈতিক লাভ,কার্বন বিত্তীয় সাহায্য, কাৰ্বন বজাৰ আৰু তৃতীয় পক্ষৰ পৰীক্ষণ, তথ্য সংগ্ৰহ পদ্ধতি আৰু বিশ্লেষণ পদ্ধতিৰ ভূমিকা, অংশগ্ৰহণকাৰী কৃষকৰ পৰা অৱগত সন্মতি লাভৰ গুৰুত্ব আৰু সামূহিক অংশগ্ৰহণৰ প্ৰয়োজনীয়তাৰ ওপৰতো আলোকপাত কৰে । তেখেতে লগতে অংশগ্রহণকাৰী সকলৰ সৈতে মত বিনিময় কৰি তেওঁলোকে উত্থাপন কৰা একাধিক প্ৰশ্নৰ উত্তৰ দিয়ে। অংশীদাৰ পৰামৰ্শ আলোচনা কর্মশালাত বঙাইগাঁও জিলা কৃষি বিজ্ঞান কেন্দ্ৰৰ পি এ চি চয়নিকা হাজৰিকা ৰয়, গুৱাহাটীস্থিত শক্তি আৰু সম্পদ প্রতিষ্ঠানৰ গৱেষণা বিশ্লেষক দেবব্ৰত বৰুৱা, গৱেষণা সহযোগী বিভাস্বন ৰাকেশ আৰু প্ৰকল্প সহযোগী গৌতম পাটনায়কেও অংশগ্রহণ কৰে। অনুষ্ঠানৰ শেষত বঙাইগাঁৱৰ কৃষি বিজ্ঞান কেন্দ্ৰৰ বিষয় বিশেষজ্ঞ বেদান্ত দাসে সকলোকে ধন্যবাদ জ্ঞাপন কৰি আলোচনাৰ অন্ত পেলায়।