🔯বঙাইগাঁৱৰ আটুগাঁৱত বিশেষ স্বাস্থ্য মেলা সম্পন্ন🔯

🔯বঙাইগাঁৱৰ আটুগাঁৱত বিশেষ স্বাস্থ্য মেলা সম্পন্ন🔯

📝বঙাইগাঁওঃ ২৫ জুলাইঃ বঙাইগাঁও প্রাথমিক স্বাস্থ্য কেন্দ্রৰ উদ্যোগত তথা পঞ্চপুৰ ক্ষুদ্র প্রাথমিক স্বাস্থ্য কেন্দ্রৰ সহযোগত বৃহস্পতিবাৰে আটুগাঁও এম ভি স্কুল প্রাংগণত " বিশেষ স্বাস্থ্য মেলা " (স্বাস্থ্য সেৱা অভিযান) অনুষ্ঠিত হয় ৷ এই বিশেষ স্বাস্থ্য মেলাৰ লগত সংগতি ৰাখি এটি ৰোগ সজাগতামূলক সভা  অনুষ্ঠিত হয় ৷ বঙাইগাঁও জিলাৰ যুটীয়া স্বাস্থ্য সেৱা সঞ্চালক ডা:বলেন্দু নাৰায়ন ডেকাই ফিতা কাটি স্বাস্থ্য মেলা তথা ৰোগ সজাগতা মূলক সভাৰ শুভ উদ্বোধন কৰে ৷ ইয়াৰ পিছতে বঙাইগাঁও প্রাথমিক স্বাস্থ্য কেন্দ্রৰ ভাৰপ্রাপ্ত বিষয়া তথা মহকুমা স্বাস্থ্য বিষয়া ডা: মাহবিবুল ইছলামে আঁত ধৰা সভাত যুটীয়া স্বাস্থ্য সেৱা সঞ্চালক ডা:বলেন্দু নাৰায়ন ডেকা, বঙাইগাঁও জিলাৰ প্রাক্তন যুটীয়া স্বাস্থ্য সেৱা সঞ্চালক ডা: আৰ কে পাটোৱাৰী, জিলা ছার্ভিলেন্স বিষয়া ডা: বাদল চন্দ্র সৰকাৰ, জিলা মেলেৰীয়া বিষয়া (ডিএম অ) ডা: ইমদাদুল খান, আটুগাঁও পঞ্চায়তৰ প্রাক্তন সভাপতি দিলীপ সিংহ আদি ব্যক্তিয়ে ৰোগ সজাগতাৰ ওপৰত গুৰুত্বপূৰ্ণ বক্তব্য প্রদান কৰে ৷

উল্লেখ যে অসমত জুন মাহৰ পৰা চেপ্তেম্বৰ মাহলৈকে মহৰ উৎপাত অধিক হয় আৰু এই সময়ছোৱাৰ ভিতৰত মেলেৰীয়া, জাপানীজ এনকেফেলাইটিছ, ডায়েৰিয়া ৰোগৰ প্রাদুর্ভাৱ ঘটে ৷ জনগণ সজাগ থাকিলে এনে ৰোগ প্রতিৰোধ কৰিব পৰা যায় বুলি স্বাস্থ্য বিষয়া সকলে তেওঁলোকৰ বক্তব্যত প্রকাশ কৰে ৷ ইয়াৰ পিছতে অনুষ্ঠিত স্বাস্থ্যমেলাত ডা: আমিনুল এহছান হুছেইন, ডাঃ সুভম দেবনাথ, ডা:মনিৰুজ্জামান, ডাঃ মিজানুৰ ৰহমান, ডাঃ আয়েশা ছিদ্দিকা, চিএইচ বনশ্রী শইকীয়া, ডা: ছাহিনা বেগম, দিপীকা পোদ্দাৰ, ফার্মাচিষ্ট আনোৱাৰ হোছেইন, লেবৰেটৰী টেকনিচিয়ান মুকুট কলিতা তথা পঞ্চপুৰ ক্ষুদ্র প্রাথমিক স্বাস্থ্য কেন্দ্রৰ আশা চুপাৰ ভাইজাৰ উত্তৰা নাথসহ দহ গৰাকী আশাই সহযোগিতা আগবঢ়ায় ৷ স্বাস্থ্যমেলাত ৰোগীসকলক ৰোগ পৰীক্ষা কৰি ঔষধ প্রদান কৰা হয় ৷