🔯বঙাইগাঁৱত অঘটন: বৈদ্যুতিক তাঁৰৰ কাম কৰাৰ সময়তে বিদ্যুৎপৃষ্ট হৈ শ্রমিকৰ মৃত্যু🔯

🔯বঙাইগাঁৱত অঘটন: বৈদ্যুতিক তাঁৰৰ কাম কৰাৰ সময়তে বিদ্যুৎপৃষ্ট হৈ শ্রমিকৰ মৃত্যু🔯

📝বঙাইগাঁওঃ ২৮ জুলাই: বঙাইগাঁও চহৰৰ দোলাইগাঁওস্থিত অসম শক্তি বিতৰণ কোম্পানী লিমিটেডৰ সহকাৰী মহাপ্ৰৱন্ধকৰ কাৰ্যাল চৌহদত দেওবাৰে বৈদ্যুতিক তাঁৰৰ কাম কৰাৰ সময়তে বিদ্যুৎপৃষ্ট হৈ এজন শ্রমিকৰ মৃত্যু হয় ৷ মৃত্যু হোৱা শ্রমিকজন অভয়াপুৰী থানাৰ অন্তর্গত নসত্ৰ খাসপাৰাৰ মফিদুল আলী বুলি জানিব পৰা গৈছে ৷ ঘটনা সন্দৰ্ভত এজন শ্রমিকে সংবাদ মাধ্যমক জানিব দিয়া মতে পূর্ব নির্ধাৰিত কামৰ সূচীমতে দেওবাৰে শ্রমিকসকলে দোলাইগাঁওস্থিত অসম শক্তি বিতৰণ কোম্পানী লিমিটেডৰ সহকাৰী মহাপ্ৰৱন্ধকৰ কার্যালয় চৌহদত কাম কৰিবলৈ আহে ৷ কাম কৰাৰ পূৰ্বে বিভাগীয়ভাৱে বিদ্যুৎ সংযোগ বিচ্ছিন্ন কৰি দিছিল ৷ তাৰ পিচত বৈদ্যুতিক খুঁটাৰ ওপৰত উঠি শ্ৰমিকে তাঁৰৰ কাম কৰি আছিল ৷ শ্রমিক মফিদুল আলীয়ে শক্তি বিতৰণ কোম্পানী লিমিটেডৰ সহকাৰী মহাপ্ৰৱন্ধক , উপ মণ্ডল বিষয়া ,কনিষ্ঠ অভিযন্তা আদি  বিষয়াৰ সন্মুখতে বৈদ্যুতিক খুঁটাৰ ওপৰত উঠি ১১ হাজাৰ কেভি ভল্টৰ তাঁৰৰ কাম কৰি আছিল ৷ এবাৰ কাম কৰি নামি অহাৰ পিচত দ্বিতীয়বাৰ পুনৰ শেষৰ কামখিনি কৰিবলৈ বিদ্যুতৰ খুঁটাত উঠিছিল শ্ৰমিকজন ৷ কিন্তু হঠাতে শ্রমিকজনে তাঁৰৰ কাম কৰিবলৈ লওতেই কঁপিবলৈ ধৰে আৰু ওপৰৰ পৰা তললৈ ছিটিকি পৰে ৷ পিছলৈ শ্ৰমিকজনক চিকিৎসালয়লৈ নিয়া হয় যদিও চিকিৎসকে তেওঁক মৃত বুলি ঘোষণা কৰে ৷ উল্লেখ্য যে বিদ্যুৎ বিভাগৰ গাফিলতি আৰু কাম কৰাৰ সময়ত সুৰক্ষাৰ বাবে ব্যৱহাৰ কৰিবলগীয়া সুৰক্ষা ব্যৱস্থা গ্ৰহণ নকৰা তথা সাৱধান অৱলম্বন নকৰাৰ বাবে এই দুৰ্ঘটনা সংঘটিত হয়। বিদ্যুৎ বিভাগৰ বিষয়া- কৰ্মচাৰীৰ সন্মুখতে এই দুৰ্ঘটনা কেনেকৈ সংঘটিত হ'বলৈ পালে তাকে লৈ প্ৰশ্ন উত্থাপিত হৈছে ৷ সেইদৰে শ্রমিক মফিদুল আলীৰ মৃত্যুকলৈ সৃষ্টি হৈছে তীব্ৰ প্ৰতিক্ৰিয়াৰ ৷ পৰিছে শোকৰ ছাঁ ৷ 🔯